ଭୁବନେଶ୍ୱର: ଆସନ୍ତାକାଲି ଦ୍ୱିତୀୟ ପର୍ଯ୍ୟାୟ ପଞ୍ଚାୟତ ମତଦାନ । ୩୦ଟି ଜିଲ୍ଲାର ୬୮ ଟି ବ୍ଲକର ୧୮୬ ଟି ଜିଲ୍ଲା ପରିଷଦ ଜୋନ୍, ୧୫୧୪ ଟି ଗ୍ରାମ ପଞ୍ଚାୟତ ପାଇଁ ୨୦,୪୩୬ ଟି ବୁଥ୍ ରେ ମତଦାନ ହେବ । ପ୍ରଥମ ପର୍ଯ୍ୟାୟ ଭୋଟ ବେଳେ ଘଟିଥିବା ଗଣ୍ଡଗୋଳ, ହିଂସାକାଣ୍ଡର ଯେଭଳି ପୁନରାବୃତ୍ତି ନ ହୁଏ ସେଥିପାଇଁ ନିର୍ବାଚନ କମିସନ କଠୋର ଆଭିମୁଖ୍ୟ ଗ୍ରହଣ କରିଛନ୍ତି । ଆଜି ଅପରାହ୍ନରେ ନିର୍ବାଚନ କମିଶନର ଆଦିତ୍ୟ ପ୍ରସାଦ ପାଢ଼ୀ ମୁଖ୍ୟ ଶାସନ ସଚିବ, ଗୃହ ସଚିବ ଏବଂ ପୁଲିସ ଡିଜିଙ୍କ ସହ ଏକ ଜରୁରୀ ବୈଠକରେ ଏହା ଉପରେ ଆଲୋଚନା କରିଛନ୍ତି । ବୈଠକ ପରେ ପୁଲିସ ଡିଜି ସୁନୀଲ ବଂଶଲ କହିଛନ୍ତି, ନିର୍ବାଚନୀ ହିଂସାକୁ ବରଦାସ୍ତ କରାଯିବନି । ଭୋଟ ଗ୍ରହଣ ପ୍ରକ୍ରିୟାରେ ଯେଉଁମାନେ ବାଧା ଦେବେ, ଛଡ଼ା ଯିବନି ।
ଡିଜିପି କହିଛନ୍ତି, କାଲି ଗୋଟିଏ ଦୁଇଟି ଜାଗାରେ ହିଂସା, ଗଣ୍ଡଗୋଳ ହୋଇଥିବା ନଜରକୁ ଆସିଛି । ଗଣ୍ଡଗୋଳରେ ସଂପୃକ୍ତ ଥିବା ବ୍ୟକ୍ତିଙ୍କୁ ଗିରଫ କରାଯାଉଛି । ସେମାନଙ୍କ ବିରୋଧରେ ଆଇନ ଅନୁଯାୟୀ କଡ଼ା କାର୍ଯ୍ୟାନୁଷ୍ଠାନ ହେବ । ବାକି ୪ଟି ପର୍ଯ୍ୟାୟ ନିର୍ବାଚନ ବିନା ହିଂସାରେ କରିବାକୁ ପଦକ୍ଷେପ ନେଉଛୁ ।
ସେପଟେ ପ୍ରଥମ ପର୍ଯ୍ୟାୟ ନିର୍ବାଚନରେ ଘଟିଥିବା ହିଂସାକାଣ୍ଡ ଘଟଣାରେ ବିଜେଡ଼ି-ବିଜେପି ପରଷ୍ପର ଉପରେ ଦୋଷ ଲଦାଲଦି ଜାରି ରଖିଛନ୍ତି । ବିଜେଡିର ଏକ ପ୍ରତିନିଧି ଦଳ ଆଜି ନିର୍ବାଚନ କମିସନଙ୍କୁ ଏକ ସ୍ମାରକପତ୍ର ଦେଇ ଗଞ୍ଜାମ ହିଂସାକାଣ୍ଡ ଘଟଣାରେ ସିଧାସଳଖ ବିଜେପି ନେତାଙ୍କ ସଂପୃକ୍ତି ଅଭିଯୋଗ ଆଣି କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଏହାପୂର୍ବରୁ ଆଜି ସକାଳେ ବିଜେପି ରାଜ୍ୟ ସଭାପତି ସମୀର ମହାନ୍ତି ଏକ ସାମ୍ବାଦିକ ସମ୍ମିଳନୀରେ କହିଥିଲେ ଯେ ରାଜ୍ୟରେ ଅରାଜକତା, ହିଂସା ଶୀର୍ଷରେ ପହଞ୍ଚିଛି । ନିର୍ବାଚନୀ ହିଂସାକାଣ୍ଡରେ ଶାସକ ଦଳ କର୍ମୀଙ୍କ ସିଧା ସଂପୃକ୍ତି ଅଛି । ସ୍ଥିତି ଏପରି ଭୟାନକ ହୋଇ ପଡୁଛି ଯେ ଭୋଟରମାନେ ଭୋଟ୍ ଦେବାକୁ ଡରୁଛନ୍ତି । ନିର୍ବାଚନରେ ଜିତିବା ପାଇଁ ଶାସକ ଦଳ କଳବଳ କୌଶଳ ଲଗାଇ ସ୍ପଷ୍ଟ ଦିବାଲୋକରେ ଟଙ୍କା ବାଣ୍ଟୁଛନ୍ତି । ବିଧାୟକଙ୍କ ଭାଇ ଓ ମନ୍ତ୍ରୀଙ୍କ ଝିଅ ଟଙ୍କା ବାଣ୍ଟିବା ଏବଂ ଭୋଟ ଜବରଦଖଲର ଭିଡ଼ିଓ ଭାଇରାଲ ହେଉଛି । ସତସାହାସ ଥିଲେ ନିର୍ବାଚନକୁ ମୁକ୍ତ, ଅବାଧ ଓ ନିରପେକ୍ଷ କରିବା ନେଇ ମୁଖ୍ୟମନ୍ତ୍ରୀ ରାଜନୈତିକ ଜବାବ ଦିଅନ୍ତୁ ବୋଲି ଶ୍ରୀ ମହାନ୍ତି କହିଥିଲେ ।
ତେବେ ବିଜେଡ଼ି ଏହାର କଡ଼ା ଜବାବ ଦେଇଛି । ରାଉରକେଲା ଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଜେଡିର ରାଷ୍ଟ୍ରୀୟ ମୁଖପାତ୍ର ଡକ୍ଟର ସସ୍ମିତ ପାତ୍ର କହିଛନ୍ତି ଯେ ଓଡିଶା ହେଉଛି ଏକ ଶାନ୍ତିପ୍ରିୟ ରାଜ୍ୟ ଓ ବିଜେଡି ସବୁବେଳେ ଅହିଂସାରେ ବିଶ୍ୱାସ କରେ । ହେଲେ ନିର୍ବାଚନରେ ପରାଜୟ ଭୟରେ ବିଜେପି ଏବେ ରକ୍ତମୁଖା ହୋଇଛି ଏବଂ ରାଜ୍ୟର ବିଭିନ୍ନ ସ୍ଥାନରେ ହିଂସାକାଣ୍ଡ କରୁଛି । ପ୍ରଥମ ପର୍ଯ୍ୟାୟ ନିର୍ବାଚନ ପରେ ବିଜେପି ଜାଣିଲାଣି ଯେ ବିଜେଡି ଏକ ବୃହତ୍ ବିଜୟ ଆଡକୁ ଅଗ୍ରସର ହେଉଛି । ତେଣୁ ପରାଜୟ ଭୟରେ ବିଜେପି ତାହାର ପୁରୁଣା ଫର୍ମୁଲା ପକାଇ ଗଣ୍ଡଗୋଳ କରୁଛନ୍ତି । ନିର୍ବାଚନ ହାରିବାକୁ ଥିବାରୁ ମୁହଁ ବଞ୍ଚାଇବା ପାଇଁ ବିଜେଡିକୁ ଗାଳିଦେବା ସହିତ ବିଜେପି ଏବେ ହିଂସାକାଣ୍ଡ ଆରମ୍ଭ କରିଦେଉଛି ।
ଡକ୍ଟର ପାତ୍ର ରାଜ୍ୟ ବିଜେପି ସଭାପତିଙ୍କୁ ଆହ୍ୱାନ ଦେଇ କହିଛନ୍ତି ଯେ ଆପଣ ହିଂସାକୁ ପ୍ରଶୟ ଦିଅନ୍ତୁ ନାହିଁ । ହିଂସାକୁ ପ୍ରଶୟ ଦେଇଥିବାରୁ ଆପଣ ବିଗତ ଦିନରେ ବାରମ୍ବାର ନିର୍ବାଚନରେ ହାରୁଛନ୍ତି । ବିଜେପିର ନେତା ଓ କ୍ୟାଡରମାନେ ହିଂସାତ୍ମକ ନହୋଇ ଗଣତନ୍ତ୍ରର ଏହି ମହାପର୍ବରେ ଶାନ୍ତିଶୃଙ୍ଖଳାର ସହ ସାମିଲ ହୁଅନ୍ତୁ । ଯଦି ବିଜେପି ତାହାରା ହିଂସାତ୍ମକ ଆଚରଣ ପରିବର୍ତ୍ତନ ନକରେ ତେବେ ପୂର୍ବଥର ଭଳି ଶାନ୍ତିପ୍ରିୟ ଓଡିଶାବାସୀ ଚଳିତ ନିର୍ବାଚନରେ ମଧ୍ୟ ଆପଣଙ୍କୁ ପରାଜୟର ରାସ୍ତା ଦେଖାଇଦେବେ ।
