ଭୁବନେଶ୍ୱର: ପ୍ରତ୍ୟେକ ଓଡ଼ିଆଙ୍କ ପାଇଁ ଖୁସି ଓ ଗର୍ବର ବିଷୟ । ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ଭାବେ ନିଯୁକ୍ତି ପାଇଛନ୍ତି ପୂର୍ବତନ ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ । ପି.କେ. ମିଶ୍ରଙ୍କ ସହ ଦ୍ୱିତୀୟ ପ୍ରମୁଖ ସଚିବ ଭାବେ ସେ ଦାୟିତ୍ୱ ତୁଲାଇବେ । ଶକ୍ତିକାନ୍ତଙ୍କ ନିଯୁକ୍ତି ସଂକ୍ରାନ୍ତୀୟ କେନ୍ଦ୍ର ସରକାରଙ୍କ ବିଜ୍ଞପ୍ତି ଆଜି ପ୍ରକାଶ ପାଇଛି ।
୨୦୧୪ ମସିହାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦାୟିତ୍ୱ ନେବା ପରେ ୧୯୭୨ ବ୍ୟାଚ୍ ଗୁଜୁରାଟ କ୍ୟାଡରର ଓଡ଼ିଆ ପୁଅ ପ୍ରମୋଦ କୁମାର(ପି.କେ) ମିଶ୍ରଙ୍କୁ ପିଏମଓରେ ଅତିରିକ୍ତ ପ୍ରମୁଖ ସଚିବ ଭାବେ ନିଯୁକ୍ତି ମିଳିଥିଲା । ପ୍ରମୁଖ ସଚିବ ନୃପେନ୍ଦ୍ର ମିଶ୍ର ୨୦୧୯ ମସିହାରେ ଅବସର ନେବା ପରେ ପି.କେ.ମିଶ୍ର ପ୍ରମୁଖ ସଚିବ-୧ ଭାବେ ଦାୟିତ୍ୱ ପାଇଛନ୍ତି । ସେବେଠାରୁ ସେ ତାଙ୍କର ଦାୟିତ୍ୱକୁ ସୂଚାରୁରୂପେ ତୁଲାଇ ଆସୁଛନ୍ତି । ଏବେ ଶକ୍ତିକାନ୍ତ ଦାସ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ-୨ ଭାବେ ନିଯୁକ୍ତି ପାଇଥିବାରୁ ପ୍ରଧାନମନ୍ତ୍ରୀଙ୍କ ଦପ୍ତରର ଦୁଇ ସର୍ବୋଚ୍ଚ ପଦବୀରେ ଦୁଇ ଓଡ଼ିଆ ପୁଅ କାର୍ଯ୍ୟ କରିବେ ।
ଓଡ଼ିଶାରେ ଜନ୍ମିତ ୬୮ ବର୍ଷୀୟ ଶକ୍ତିକାନ୍ତ ୧୯୮୦ ବ୍ୟାଚ୍ ର ତାମିଲନାଡୁ କ୍ୟାଡର ଆଇଏଏସ୍ ଅଫିସର । ୨୦୧୫ ରୁ ୨୦୧୭ ମସିହା ପର୍ଯ୍ୟନ୍ତ ସେ ଅର୍ଥ ମନ୍ତ୍ରଣାଳୟର ସଚିବ ଭାବେ କାର୍ଯ୍ୟ କରିଥିଲେ । ଏହି ସମୟରେ ମୋଦୀ ସରକାର ବିମୁଦ୍ରାକରଣ ନିଷ୍ପତ୍ତି ନେଇଥିଲେ । ଏହି ନିଷ୍ପତ୍ତି ଓ ଏହାର ନିୟମକାନୁନ ସଂକ୍ରାନ୍ତରେ ଲୋକଙ୍କୁ ଅବଗତ କରାଇବା ସହ ସେମାନଙ୍କ ମଧ୍ୟରେ ବିଶ୍ୱାସ ସୃଷ୍ଟି କରିବାରେ ଶ୍ରୀ ଦାସ ଗୁରୁତ୍ୱପୂର୍ଣ୍ଣ ଭୂମିକା ନେଇ ଚର୍ଚ୍ଚାକୁ ଆସିଥିଲେ । ଉଭୟ ମନମୋହନ ସିଂ ଓ ନରେନ୍ଦ୍ର ମୋଦୀଙ୍କ ସରକାରରେ ବଜେଟ୍ ପ୍ରସ୍ତୁତିରେ ସେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଉଥିଲେ । ଚାକିରିରୁ ଅବସର ନେଲା ପରେ ପଞ୍ଚଦଶ ଅର୍ଥ କମିସନ ସଦସ୍ୟ ପଦରେ ନିଯୁକ୍ତି ପାଇଥିଲେ । ଏଥିସହ ଜି-୨୦ରେ ତାଙ୍କୁ ଭାରତର ପ୍ରତିନିଧିତ୍ୱ ମିଳିଥିଲା ।
୨୦୧୮ ମସିହାରେ ଶକ୍ତିକାନ୍ତ ଆରବିଆଇ ଗଭର୍ଣ୍ଣର ପଦ ଅଳଙ୍କୃତ କରିଥିଲେ । ମହାମାରୀ କୋଭିଡ୍ ସମୟରେ ଭାରତ ସମେତ ସମଗ୍ର ବିଶ୍ୱ ଅର୍ଥନୈତିକ ସଙ୍କଟରେ ପଡ଼ିଥିବା ବେଳେ ସେ ଏହାକୁ ସଫଳତାର ସହ ସାମନା କରିଥିଲେ । ଭାରତୀୟ ଅର୍ଥନୀତିକୁ ସୁଦୃଢ଼ କରିବାରେ ତାଙ୍କର ଯଥେଷ୍ଟ ଅବଦାନ ଥିଲା । ଆରବିଆଇ ଗଭର୍ଣ୍ଣର ଭାବେ ପ୍ରଥମ ଥର ପାଇଁ ସେ ଦୁଇଟି ପାଳି ପୂରଣ କରି ୨୦୨୩ ମସିହାରେ ଅବ୍ୟାହତି ନେଇଥିଲେ ।
