ଭୁବନେଶ୍ୱର: କ୍ୟାମେରାମ୍ୟାନ୍ ମାନସ ସ୍ୱାଇଁ ଅପହରଣ ଓ ହତ୍ୟାକାଣ୍ଡର ମାଷ୍ଟରମାଇଣ୍ଡ୍ ଶର୍ମିଷ୍ଠା ରାଉତ ଏବଂ ସହଯୋଗୀ ଝୁନା ଭୋଇ ଶେଷରେ ଧରାପଡ଼ିଛନ୍ତି । କୋଲକତାରୁ ବସ୍ ରେ ଫେରୁଥିବା ବେଳେ ଭଦ୍ରକ ଜିଲ୍ଲା ନଳାଙ୍ଗ ଛକରୁ ପୁଲିସ ଦୁହିଁଙ୍କୁ ଗିରଫ କରିଛି । ସେମାନଙ୍କ ବିରୋଧରେ ଆଇପିସି ଧାରା ୩୬୩(ଅପହରଣ), ୩୬୪(ହତ୍ୟା ଉଦ୍ଦେଶ୍ୟରେ ଅପହରଣ), ୪୬୫(ଜାଲିଆତି), ୪୭୧(ପ୍ରମାଣ ନଷ୍ଟ), ୩୦୨(ହତ୍ୟା) ଏବଂ ୨୦୧ ଦଫାରେ ମାମଲା ରୁଜୁ ହୋଇଛି । ତିହିଡ଼ି ଥାନାରେ ସେମାନଙ୍କୁ ଜେରା କରାଯାଇଛି । ଅପରାହ୍ନରେ ଚାନ୍ଦବାଲି ଜେଏମଏଫସି କୋର୍ଟରେ ହାଜର
କରାଯାଇ ୧୦ ଦିନିଆ ରିମାଣ୍ଡ ଆବେଦନ କରାଯିବ ବୋଲି କ୍ରାଇମବ୍ରାଞ୍ଚ ଏଡିଜି ସଞ୍ଜୀବ ପଣ୍ଡା ସୂଚନା ଦେଇଛନ୍ତି ।
ସୂଚନା ଅନୁଯାୟୀ, କୋଲକତାରୁ ଏକ ବସ୍ ରେ ଶର୍ମିଷ୍ଠା ଏବଂ ଝୁନା ଆସୁଥିଲେ । ଦୁହେଁ ୨୨ ଏବଂ ୨୩ ନମ୍ବର ସିଟ୍ ରେ ବସିଥିଲେ । ଏ ସମ୍ପର୍କରେ କ୍ରାଇମବ୍ରାଞ୍ଚ ଓ ଭଦ୍ରକ ପୁଲିସକୁ ସୂଚନା ମିଳିଯାଇଥିଲା । ସକାଳ ପ୍ରାୟ ସାଢ଼େ ୫ଟା ବେଳେ ନଳାଙ୍ଗ ଛକରେ ବସ୍ ଅଟକିବା ମାତ୍ରେ ପୁଲିସ ବସ୍ ଭିତରୁ ଶର୍ମିଷ୍ଠା ଏବଂ ଝୁନାଙ୍କୁ ଟେକି ଆଣିଥିଲା । ସେମାନଙ୍କୁ ସିଧା ତିହିଡ଼ି ଥାନାକୁ ଅଣାଯାଇଥିଲା । କ୍ରାଇମବ୍ରାଞ୍ଚ ଡିଏସପି କଳ୍ପନା ସାହୁ ସେଠାରେ ପହଞ୍ଚି ସେମାନଙ୍କୁ ଜେରା କରିଥିଲେ ।
ପୁଲିସ ଆଖିରେ ଧୂଳି ଦେଇ ଶର୍ମିଷ୍ଠା ଏବଂ ଝୁନା ରାଜ୍ୟ ବାହାରକୁ ପଳାଇଥିବା ସୂଚନା ମିଳିଛି । ପ୍ରାୟ ୧୫ ଦିନ ହେଲା ସେମାନେ କେତେବେଳେ କୋଲକତା ତ ଆଉ କେବେ ଗୌହାଟୀରେ ଲୁଚିଥିଲେ । କୋଲକତା ରେଳଷ୍ଟେସନ୍ ରେ ଦୁହେଁ କିଛି ରାତି ବିତାଇଥିଲେ । ତେବେ କ୍ରାଇମବ୍ରାଞ୍ଚସେମାନଙ୍କୁ ପିଛା କରୁଥିବା ଜାଣି ଉପାୟଶୂନ୍ୟ ଶର୍ମିଷ୍ଠା କୋଲକତାରୁ ଭୁବନେଶ୍ୱର ପଳାଇ ଆସୁଥିବା କୁହାଯାଉଛି ।
ଗତ ଫେବ୍ରୁଆରୀ ୬ ତାରିଖରେ ମାନସ ସ୍ୱାଇଁ ଚାନ୍ଦବାଲି ପଳାସପୁରକୁ ଏକ ବାହାଘର ସୁଟିଂରେ ଯାଇଥିବା ବେଳେ ଶର୍ମିଷ୍ଠା ଏବଂ ତା’ର ସହଯୋଗୀମାନେ ମାନସଙ୍କୁ ଭୁବନେଶ୍ୱର ଅପହରଣ କରି ଆଣିଥିଲେ । ଶର୍ମିଷ୍ଠାଙ୍କ ଦୟାଲ ଆଶ୍ରମରେ ୭ ତାରିଖ ସଂଧ୍ୟାରେ ମାନସଙ୍କୁ ପିଟି ପିଟି ହତ୍ୟା କରାଯାଇଥିବାର ଅଭିଯୋଗ ହୋଇଛି । ଶବକୁ ରଣପୁର ଅଞ୍ଚଳର ଏକ ଜଙ୍ଗଲ ତଳେ ସେମାନେ ପୋତି ଦେଇଥିଲେ । ମାର୍ଚ୍ଚ ୧୨ ତାରିଖରେ ମାନସଙ୍କ ମୃତଦେହ ଉଦ୍ଧାର କରାଯାଇଥିଲା ।
ପୁଲିସ ଏହି ଘଟଣାରେ ପ୍ରଥମେ ୩ ଜଣଙ୍କୁ ଗିରଫ କରିବା ପରେ ହତ୍ୟାକାଣ୍ଡର କାରଣ ଜାଣିବାକୁ ପାଇଥିଲା । ମାନସଙ୍କ ପାଖରେ ଥିବା ଏକ ଚିପ୍ ଥିଲା ହତ୍ୟାର କାରଣ । ସେମାନଙ୍କ ସୂଚନା ଏବଂ ଶର୍ମିଷ୍ଠାଙ୍କ ଫୋନ୍ କଲ୍ ତଥ୍ୟ ଆଧାରରେ ପୁଲିସ ସୂଚନା ଓ ଲୋକସମ୍ପର୍କ ବିଭାଗର ପୂର୍ବତନ ନିର୍ଦ୍ଦେଶକ(ବୈଷୟିକ) ନିରଞ୍ଜନ ସେଠୀଙ୍କୁ ଗତ ୨୧ ତାରିଖରେ ଗିରଫ କରିଥିଲା । ମାନସଙ୍କୁ ଅପହରଣ, ହତ୍ୟା ଏବଂ ଶବ ପୋତିଦେବାରେ ଶର୍ମିଷ୍ଠାଙ୍କୁ ସେ ସହଯୋଗ କରିଥିବା ପୁଲିସ କହିସାରିଛି । ପ୍ରକୃତରେ ଏହି ଚିପ୍ ରେ କ’ଣ ଥିଲା ତାହା ଶର୍ମିଷ୍ଠା ଏବଂ ନିରଞ୍ଜନଙ୍କ ମୁହଁରୁ କ୍ରାଇମବ୍ରାଞ୍ଚ ପୁଲିସ ବାହାର କରିବ ।
ସୂଚନାଯୋଗ୍ୟ, ସମ୍ପୂର୍ଣ୍ଣ ୱେବ୍ ଚାନେଲ ମାଲିକାଣୀ ଶର୍ମିଷ୍ଠା ଅନେକ ପ୍ରଭାବଶାଳୀ ବ୍ୟକ୍ତିଙ୍କ ସମ୍ପର୍କରେ ଥିଲେ । କିଛି ମନ୍ତ୍ରୀ, ବିଧାୟକ, ଅଫିସର ଏବଂ ସମାଜସେବୀଙ୍କ ସହ ତାଙ୍କର ନିବିଡ଼ ସମ୍ପର୍କ ଥିଲା । ଆଜି ବିଧାନସଭାରେ କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ଏହି ପ୍ରସଙ୍ଗ ଉଠାଇ ମାମଲାର ସିବିଆଇ ତଦନ୍ତ ଦାବି କରିଥିଲେ । ତେବେ ବିଧାନସଭାରେ ପ୍ରସଙ୍ଗ ଉଠିବାର କିଛି ସମୟ ପରେ ଶର୍ମିଷ୍ଠାଙ୍କ ଗିରଫଦାରି ସମ୍ପର୍କରେ କ୍ରାଇମବ୍ରାଞ୍ଚ ପକ୍ଷରୁ ସୂଚନା ଆସିଥିଲା ।
