ଭୁବନେଶ୍ୱର: କେନ୍ଦ୍ରାପଡ଼ା ଜିଲ୍ଲାର ଆଶା ଦିଦି ଶିବାନୀ ମଣ୍ଡଳଙ୍କ ମହନୀୟତା ଏବେ ସବୁଆଡ଼େ ଚର୍ଚ୍ଚାର ବିଷୟ ହୋଇଛି । ବାତ୍ୟା ବିପଦରୁ ସୁରକ୍ଷା ସକାଶେ ଲୋକଙ୍କୁ ଆଶ୍ରୟସ୍ଥଳୀକୁ ସ୍ଥାନାନ୍ତର ଦାୟିତ୍ୱ ମୁଣ୍ଡାଇଥିବା ଶିବାନୀ କେବଳ ସରକାରୀ ଦାୟିତ୍ୱରେ ନିଜକୁ ସୀମିତ ରଖି ନ ଥିଲେ । ବରଂ ମାନବିକତାର ଶ୍ରେଷ୍ଠତ୍ୱ ନିଦର୍ଶନ କରିଥିଲେ । ପ୍ରବଳ ବର୍ଷା ପବନକୁ ଖାତିର ନ କରି ଅସହାୟ ମଣିଷଙ୍କୁ ନିଜ ପିଠିରେ ପକାଇ ଦେଢ଼ କିଲୋମିଟର ଦୂରରେ ଥିବା ଆଶ୍ରୟସ୍ଥଳୀକୁ ବୋହି ଆଣିଥିଲେ । ତାଙ୍କର ଏହି ମହାନ୍ କାର୍ଯ୍ୟକୁ ଖୋଦ୍ ମୁଖ୍ୟମନ୍ତ୍ରୀ ମୋହନ ମାଝୀ କେବଳ ପ୍ରଶଂସା କରିନାହାନ୍ତି । ଟେଲିଫୋନ୍ ରେ ତାଙ୍କ ସହ କଥା ହୋଇ ଧନ୍ୟବାଦ ଜଣାଇଛନ୍ତି ।
ରାଜନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଆଶା ଦିଦି ଭାବେ କାର୍ଯ୍ୟ କରୁଛନ୍ତି ଶିବାନୀ ମଣ୍ଡଳ । ବାତ୍ୟା ପୂର୍ବରୁ ସ୍ଥାନୀୟ ଖସାମୁଣ୍ଡା ଗାଁର ଲୋକମାନଙ୍କୁ ଆଶ୍ରୟସ୍ଥଳୀକୁ ସୁରକ୍ଷିତ ଭାବେ ସ୍ଥାନାନ୍ତର କରିବାର ଦାୟିତ୍ୱ ନେଇଥିଲେ । ପ୍ରବଳ ବର୍ଷାରେ ଭିଜି ସେ ତାଙ୍କ କାର୍ଯ୍ୟ କରିଚାଲିଥିଲେ । ତେବେ ସେହି ପ୍ରତିକୂଳ ପାଗରେ ପାରାଲିସିସ୍ ରେ ଆକ୍ରାନ୍ତ ଗାଁର ଜଣେ ବୟସ୍କା ମହିଳା ଆଶ୍ରୟସ୍ଥଳୀକୁ ଯିବା ଏକପ୍ରକାର ଅସମ୍ଭବ ଥିଲା । ମାତ୍ର ଏହି ପରିସ୍ଥିତିକୁ ସାହାସର ସହ ମୁକାବିଲା କରିଥିଲେ ଶିବାନୀ ।
ଶିବାନୀ ତାଙ୍କୁ ନିଜ ପିଠିରେ ପକାଇ ଦେଢ଼ କିଲୋମିଟର ଦୂରରେ ଥିବା ଆଶ୍ରୟସ୍ଥଳୀକୁ ବୋହି ନେଇଥିଲେ । କେହି ଜଣେ ବ୍ୟକ୍ତି ଏହାର ଫଟୋ ସୋସିଆଲ୍ ମିଡିଆରେ ଛାଡ଼ିଲା ପରେ ତାହା ଭାଇରାଲ୍ ହୋଇଥିଲା । ଆଶା ଦିଦି ଶିବାନୀଙ୍କର ଏହି ମହନୀୟ କାର୍ଯ୍ୟ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲା । ମୁଖ୍ୟମନ୍ତ୍ରୀ ତାଙ୍କୁ ନିଜେ ଫୋନ୍ କରି ଧନ୍ୟବାଦ ଜଣାଇବାକୁ ଆଗ୍ରହ ପ୍ରକାଶ କରିଥିଲେ ।
ମୁଖ୍ୟମନ୍ତ୍ରୀ ଆଜି ତାଙ୍କ ସହ କଥା ହେଲା ବେଳେ ଆଶା ଦିଦି ଶିବାନୀ ସେଦିନ ସମୁଦାୟ ୭ ଜଣ ବୟସ୍କ ଏବଂ ୨ ଜଣ ପ୍ରସୂତୀଙ୍କୁ ପିଠିରେ ବୋହି ଆଶ୍ରୟସ୍ଥଳୀକୁ ନେଇଥିବା ଜାଣିବାକୁ ପାଇଥିଲେ । ମୁଖ୍ୟମନ୍ତ୍ରୀ ତାଙ୍କର ଏହି ଉତ୍ସର୍ଗୀକୃତ ସେବାର ଉଚ୍ଚ ପ୍ରଶଂସା କରି କହିଥିଲେ- ‘ସରକାର ଏବଂ ମୁଁ ବ୍ୟକ୍ତିଗତ ଭାବେ ତୁମ କାମ ଉପରେ ବହୁତ ଖୁସି । ମହାପ୍ରଭୁ ଶ୍ରୀ ଜଗନ୍ନାଥ ତୁମକୁ ସବୁବେଳେ ଭଲରେ ରଖନ୍ତୁ । ବିପଦ ବେଳେ ତୁମେ ସମସ୍ତଙ୍କୁ ଏହିଭଳି ସାହାଯ୍ୟ କରୁଥାଅ’ ।
କେବଳ ସେତିକି ନୁହେଁ, ମୁଖ୍ୟମନ୍ତ୍ରୀ ତାଙ୍କ ପରିବାରର ଭଲମନ୍ଦ ବିଷୟରେ ବୁଝିଥିଲେ ଏବଂ ତାଙ୍କର ଘର ନ ଥିବା ଜାଣିବା ପରେ ରାଜନଗର ବିଡିଓଙ୍କୁ ଟେଲିଫୋନ୍ କରି ତୁରନ୍ତ ଏକ ଘର ଯୋଗାଇ ଦେବା ପାଇଁ ନିର୍ଦ୍ଦେଶ ଦେଇଥିଲେ । ଏହା ସହିତ ଶିବାନୀଙ୍କୁ ଅନ୍ୟାନ୍ୟ ଆବଶ୍ୟକ ସହାୟତା ଯୋଗାଇ ଦେବା ପାଇଁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି ।
