ବ୍ୟବସ୍ଥା ଫେଲ୍: ଓଟିଇଟି ପ୍ରଶ୍ନପତ୍ର ଲିକ୍, ପରୀକ୍ଷା ସ୍ଥଗିତ

ଭୁବନେଶ୍ୱର: ଆଜି(ରବିବାର) ସକାଳ ୯ଟାରେ ଥିଲା ସ୍ପେଶାଲ୍ ଓଟିଇଟି ପେପର୍-୧ ଏବଂ ଦିନ ୨ଟାରେ ଥିଲା ଓଟିଇଟି ପେପର୍-୨ ପରୀକ୍ଷା । ଇନସର୍ଭିସ୍ ବା ଚାକିରିରେ ଥିବା ୭୫ ହଜାର ଶିକ୍ଷକ/ଶିକ୍ଷୟିତ୍ରୀ ଏହି ପରୀକ୍ଷା ଦେଇଥାନ୍ତେ । ପରୀକ୍ଷା ପାଇଁ ପ୍ରସ୍ତୁତି ସାରି ଆଜି ଭୋରୁ ଭୋରୁ ପରୀକ୍ଷା ଦେବାକୁ ଘରୁ ବାହାରି ଆସିଥିଲେ । ମାତ୍ର ବାଟରେ ଖବର ପାଇଲେ ପରୀକ୍ଷା ହେବନି । ପରୀକ୍ଷା ପରିଚାଳନା କରୁଥିବା ମାଧ୍ୟମିକ ଶିକ୍ଷା ବୋର୍ଡ ରାତି ଅଧରେ ପରୀକ୍ଷାକୁ ସ୍ଥଗିତ ଘୋଷଣା କରିଥିଲା । ଏ ନେଇ ବୋର୍ଡ ପକ୍ଷରୁ ଏକ ଧାଡ଼ିକିଆ ନୋଟିସ୍ ଜାରି ହୋଇଥିଲା ।

ସ୍ୱତନ୍ତ୍ର ଓଟିଇଟି ପରୀକ୍ଷାରେ ବ୍ୟାପକ ବିଭ୍ରାଟ ନେଇ ପୂର୍ବରୁ ସଙ୍କେତ ମିଳିସାରିଥିଲା । ଦୁଇଦିନ ହେଲା ପ୍ରଶ୍ନପତ୍ର ଏବଂ ଉତ୍ତର ଦଲାଲଙ୍କ ଜରିଆରେ ଚଢ଼ା ଦରରେ ବିକ୍ରୀ ହେଉଥିବା ଆଲୋଚନା ହେଉଥିଲା । ଦୁଇଟି ଯାକ ପେପର୍ ର ଅଧିକାଂଶ ପ୍ରଶ୍ନ ଏବଂ ହାତଲେଖା ଉତ୍ତର ମୋବାଇଲ୍ ରେ ଘୂରି ବୁଲୁଥିଲା ।

ତେବେ ବୋର୍ଡ କର୍ତ୍ତୃପକ୍ଷ ଏହାକୁ ଖାମଖିଆଲ ଭାବେ ଗ୍ରହଣ କରିଥିଲେ । ଏହାର ସତ୍ୟାସତ୍ୟ ଜାଣିବା ପାଇଁ ସାମାନ୍ୟ ଚେଷ୍ଟା ବି କରି ନ ଥିଲେ ।

ତେବେ ବିଶ୍ୱସ୍ତ ସୂତ୍ରର ସୂଚନା ଅନୁଯାୟୀ, ପ୍ରଶ୍ନପତ୍ର ଛପା ଯାଇଥିବା ପ୍ରିଣ୍ଟିଂ ପ୍ରେସ୍ ରୁ ପ୍ରଶ୍ନପତ୍ର ଲିକ୍ ହୋଇଥିବା ନେଇ ଗତକାଲି ସଂଧ୍ୟାରେ ବିଭାଗୀୟ ମନ୍ତ୍ରୀଙ୍କ ପାଖକୁ ପ୍ରଶ୍ନପତ୍ର ସଂଲଗ୍ନ ନିର୍ଦ୍ଦିଷ୍ଟ ଅଭିଯୋଗ ଆସିଥିଲା । ଏହାର ସତ୍ୟାସତ୍ୟ ଅନୁସନ୍ଧାନ ପାଇଁ ବୋର୍ଡ କର୍ତ୍ତୃପକ୍ଷଙ୍କୁ ବିଭାଗ ପକ୍ଷରୁ ତୁରନ୍ତ ନିଦେ୍ର୍ଦଶ ଦିଆଯାଇଥିଲା । ବୋର୍ଡ କର୍ତ୍ତୃପକ୍ଷ ପ୍ରଥମେ ଏହାକୁ ହସରେ ଉଡ଼ାଇ ଦେବାକୁ ବସିଥିବା ବେଳେ ଅନୁସନ୍ଧାନ ବେଳେ ଅସଲ ପ୍ରଶ୍ନପତ୍ର ସହ ପ୍ରଘଟ ହୋଇଥିବା ପ୍ରଶ୍ନପତ୍ର ମେଳ ଖାଉଥିଲା । ପ୍ରଶ୍ନପତ୍ର ଲିକ୍ ହୋଇଥିବା ସୁନିଶ୍ଚିତ ହେଲା ପରେ ରାତି ଅଧରେ ବୋର୍ଡ ସଭାପତି ଶ୍ରୀକାନ୍ତ ତରାଇ ପରୀକ୍ଷାକୁ ସ୍ଥଗିତ ଘୋଷଣା କରିଥିଲେ । ପରବର୍ତ୍ତୀ ତାରିଖ ଘୋଷଣା ପର୍ଯ୍ୟନ୍ତ ଏହା ସ୍ଥଗିତ ରହିଲା ବୋଲି ବିଜ୍ଞପ୍ତି ବାହାର କରିଥିଲେ ।