ପୁରୀ: ବହୁ ପ୍ରତୀକ୍ଷିତ ଶ୍ରୀମନ୍ଦିର ଐତିହ୍ୟ କରିଡରର ତିନିଦିନିଆ ଭୂମି ପୂଜନ ପର୍ବ ଆରମ୍ଭ ହୋଇଛି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ଚାଲିଛି ମହାଯଜ୍ଞ । ବ୍ରାହ୍ମଣଙ୍କ ବେଦପାଠ ଏବଂ ମନ୍ତ୍ରଧ୍ୱନିରେ କମ୍ପୁଛି ଶ୍ରୀମନ୍ଦିର ଚାରିପାଖ । ଆସନ୍ତା ୨୪ ତାରିଖ ପୂର୍ବାହ୍ନରେ ଯଜ୍ଞରେ ପୂର୍ଣ୍ଣାହୁତି ଦିଆଯିବା ସହ ଶିଳାନ୍ୟାସ ଉତ୍ସବ ଅନୁଷ୍ଠିତ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଶିଳାନ୍ୟାସ କରିବେ ।
ଉତ୍ତରପାଶ୍ୱର୍ ମଠ ସମ୍ମୁଖ ଦୋଳବେଦି କୋଣରେ ଯଜ୍ଞମଣ୍ଡପ ତିଆରି ହୋଇଛି । ଯଜ୍ଞ ମଣ୍ଡପର ଠିକ୍ ସମ୍ମୁଖରେ ଚତୁର୍ଦ୍ଧା ବିଗ୍ରହ ବିରାଜମାନ କରୁଛନ୍ତି । ପ୍ରକଳ୍ପ ପୂଜା ପାଇଁ ଗତକାଲି ଶ୍ରୀନଅରରେ ଗଜପତି ମହାରାଜଙ୍କ ଦ୍ୱାରା ଗୁଆଟେକା ବିଧି ସମ୍ପନ୍ନ ହୋଇଥିଲା । ଆଜି ସକାଳେ ପଞ୍ଚକର୍ମ ଓ ସୂର୍ଯ୍ୟପୂଜା ସରିଲା ପରେ ସାଢ଼େ ଦୁଇଟାରେ ମହାଯଜ୍ଞ ଆରମ୍ଭ ହୋଇଥିଲା ।
ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ୫-ଟି ସଚିବ ଭି.କେ.ପାଣ୍ଡିଆନ୍, ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର କ୍ରିଷନ୍ କୁମାର, ରାଜ୍ୟ ସରକାରଙ୍କ ଗଣମାଧ୍ୟମ ପରାମର୍ଶଦାତା ମାନସ ମଙ୍ଗରାଜ, ପୁରୀ ଜିଲ୍ଲାପାଳ ସମର୍ଥ ବର୍ମା ସେଠାରେ ପହଞ୍ଚି ଯଜ୍ଞ କାର୍ଯ୍ୟର ତଦାରଖ କରିବା ସହ ଶିଳାନ୍ୟାସ ପ୍ରସ୍ତୁତିର ସମୀକ୍ଷା କରିଥିଲେ । ଉଭୟ କାର୍ଯ୍ୟ ସୁରୁଖୁରୁରେ ସମ୍ପନ୍ନ କରିବା ପାଇଁ ସେମାନେ ସମସ୍ତଙ୍କ ସହଯୋଗ ଲୋଡ଼ିଥିଲେ ।
ଯଜ୍ଞ ଚାଲୁଥିବା ସମୟରେ ମହାପ୍ରଭୁଙ୍କ ଦର୍ଶନରେ କୌଣସି ଅସୁବିଧା କିମ୍ବା କଟକଣା ରଖାଯାଇନାହିଁ । କେବଳ ପୂର୍ଣ୍ଣାହୁତି ଓ ଶିଳାନ୍ୟାସ ଉତ୍ସବ ବେଳେ ଦୁଇ ଘଣ୍ଟା ପାଇଁ ଉତ୍ତର ଦ୍ୱାରରେ ଭକ୍ତଙ୍କ ପ୍ରସ୍ଥାନ ବନ୍ଦ ହୋଇ ସିଂହଦ୍ୱାର ବାଟେ ପ୍ରବେଶ/ ପ୍ରସ୍ଥାନ ହେବ ବୋଲି ମୁଖ୍ୟ ପ୍ରଶାସକ ସୂଚନା ଦେଇଛନ୍ତି ।
