ଭୁବନେଶ୍ୱର: ଓଡ଼ିଶା ବାହାରେ ଦୁର୍ଦ୍ଦଶାଗ୍ରସ୍ତ ଓଡ଼ିଆଙ୍କ ପାଇଁ ସଦାସର୍ବଦା ସହଯୋଗର ହାତ ବଢ଼ାଉଥିବା ‘ଓଡ଼ିଶା-ମୋ ପରିବାର’ ର ଆଉ ଏକ ମହନୀୟ କାର୍ଯ୍ୟ ଚର୍ଚ୍ଚାର ବିଷୟ ହୋଇଛି । ଆନ୍ଧ୍ର ପ୍ରଦେଶରେ ବନ୍ୟା ବିତ୍ପତ୍ତି ଯୋଗୁଁ ରାମେଶ୍ୱରମ୍ ଷ୍ଟେସନ୍ ରେ ଫସି ଯାଇଥିବା ୧୬ ଓଡ଼ିଆ ଯାତ୍ରୀଙ୍କୁ ଓଡ଼ିଶା- ମୋ ପରିବାର ଉଦ୍ଧାର କରି ବିମାନରେ ଭୁବନେଶ୍ୱର ଏବଂ ଏଠାରୁ ନିଜ ଘରକୁ ଫେରାଇ ଆଣିବାର ବନ୍ଦୋବସ୍ତ କରିଛି । ଆଜି ଅପରାହ୍ନରେ ଇଣ୍ଡିଗୋ ବିମାନ ଯୋଗେ ୮ ଜଣ ଫେରିଥିବା ବେଳେ ଆସନ୍ତାକାଲି ଅନ୍ୟ ୮ ଜଣ ଫେରିବେ । ଉଦ୍ଧାର ହୋଇଥିବା ଏହି ଓଡ଼ିଆ ଯାତ୍ରୀଙ୍କ ମଧ୍ୟରେ ଅର୍ଦ୍ଧାଧିକ ବୟସ୍କ ବ୍ୟକ୍ତିଙ୍କ ସହ ମହିଳା ଓ ଶିଶୁ ଅଛନ୍ତି ।
ଘଟଣାରୁ ପ୍ରକାଶ ଯେ କିଛି ଓଡ଼ିଆ ତୀର୍ଥ ଯାତ୍ରୀ ଦଳ ତାମିଲନାଡୁର ପ୍ରସିଦ୍ଧ ରାମେଶ୍ୱରମ୍ ଭ୍ରମଣରେ ଯାଇଥିଲେ । ତୀର୍ଥ ସାରି ସେଠାରୁ ଗତ ଶନିବାର ଦିନ ଟ୍ରେନ୍ ଯୋଗେ ଓଡ଼ିଶା ଫେରିବାର ଥିଲା । ମାତ୍ର ଆନ୍ଧ୍ର ପ୍ରଦେଶରେ ପ୍ରବଳ ବନ୍ୟା ଯୋଗୁଁ ଅଚାନକ ସବୁ ଟ୍ରେନ୍ ବାତିଲ ହୋଇଯାଇଥିଲା । ତାମିଲନାଡୁ ଏବଂ ଆଖପାଖରୁ ଆଉ କୌଣସି ଟ୍ରେନ୍ ନ ଥିଲା । ଫଳରେ ରାମେଶ୍ୱରମ୍ ଷ୍ଟେସନ୍ ରେ ଓଡ଼ିଆ ତୀର୍ଥଯାତ୍ରୀମାନେ ଫସି ରହିଥିଲେ । କିଛି ଯାତ୍ରୀ ଅନ୍ୟତ୍ର ନିଜର ରହିବା ଯୋଗାଡ଼ କରିଥିଲା ବେଳେ ୧୬ ଜଣ ଯାତ୍ରୀ କିନ୍ତୁ କୁଆଡ଼େ ଯାଇ ନ ପାରି ଅସହାୟ ଅବସ୍ଥାରେ ଅଟକି ରହିଥିଲେ । ସେମାନଙ୍କ ପାଖରେ ନା ଥିଲା ରହିବାର ସୁବିଧା ନା ଖାଇବାର ସୁବିଧା । ଅତ୍ୟନ୍ତ ଦହନୀୟ ଅବସ୍ଥାରେ ସେଠାରେ ପଡ଼ି ରହିଥିଲେ । ସେମାନଙ୍କ ମଧ୍ୟରେ ଅର୍ଦ୍ଧାଧିକ ଥିଲେ ବୟସ୍କା ମହିଳା ଓ ଶିଶୁ । ଅଧିକାଂଶଙ୍କ ଘର ଗଞ୍ଜାମ ଜିଲ୍ଲା ବୋଲି ଜଣାପଡ଼ିଛି ।
ଫସି ରହିଥିବା ବ୍ୟକ୍ତିମାନଙ୍କ ମଧ୍ୟରୁ ନିହାରିକା ଦାଶ ନାମକ ଜଣେ ଯୁବତୀ ଏହି ଦୁର୍ଦ୍ଦଶା ସମ୍ପର୍କରେ ଗତ ନଭେମ୍ବର ୨୦ ତାରିଖ ସଂଧ୍ୟାରେ ଓଡ଼ିଶା- ମୋ ପରିବାର ଆବାହକଙ୍କୁ ପ୍ରଥମେ ଖବର ଦେଇଥିଲେ । ଆବାହକ ତୁରନ୍ତ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଏହା ଜଣାଇଥିଲେ । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଏଥିନେଇ ତତ୍ପରତା ପ୍ରକାଶ କରିଥିଲେ । ଓଡ଼ିଶା-ମୋ ପରିବାର ଆବାହକଙ୍କ ନିଦେ୍ର୍ଦଶରେ ସଂଗଠନର ଚେନ୍ନାଇ ପ୍ରତିନିଧି(ସଦସ୍ୟ) କ୍ଷୀରୋଦ ଜେନା ଏବଂ ସଦସ୍ୟ ପଞ୍ଚାନନ ଜେନା ଅସହାୟମାନଙ୍କ ପାଖରେ ତୁରନ୍ତ ପହଞ୍ଚି ସେମାନଙ୍କର ରହଣୀ ଓ ଖାଇବାର ସୁବନ୍ଦୋବସ୍ତ କରିଥିଲେ ।
ସେମାନଙ୍କ ଓଡ଼ିଶା ଫେରନ୍ତା ପାଇଁ ସବୁପ୍ରକାର ବନ୍ଦୋବସ୍ତ କରାଯାଇଥିଲା । ଓଡ଼ିଶା-ମୋ ପରିବାର ଯୁଗ୍ମ ସମ୍ପାଦକ ଶ୍ରୀଯୁକ୍ତ ରୁଦ୍ର ନାରାୟଣ ସାମନ୍ତରାୟ ଏସବୁର ସଂଯୋଜନା କରିଥିଲେ ।
ଆଜି ଅପରାହ୍ନରେ ୮ ଜଣ ଭୁବନେଶ୍ୱରରେ ପହଞ୍ଚଥିଲେ । ସେମାନଙ୍କୁ ପାଛୋଟି ଆଣିବା ପାଇଁ ବିମାନବନ୍ଦରରେ ଓଡ଼ିଶା-ମୋ ପରିବାର ଇନଚାର୍ଜ ବିଧାୟକ ବିକ୍ରମ ପଣ୍ଡା, ଓଡ଼ିଶା-ମୋ ପରିବାର ସଦସ୍ୟ ବିଧାୟକ ସୁଶାନ୍ତ ରାଉତ, ଯୁଗ୍ମ ସମ୍ପାଦକ ସମୀର ପ୍ରଧାନ, ବିଜୁ ଯୁବ ଜନତା ଦଳର ସମ୍ପାଦକ ଲଗ୍ନଦୀପା ମିଶ୍ର ପ୍ରମୁଖ ଉପସ୍ଥିତ ଥିଲେ ।
ଆସନ୍ତାକାଲି ସକାଳେ ବିମାନ ଯୋଗେ ଅନ୍ୟ ୮ ଜଣ ଫେରିବେ । ଫେରିବାକୁ ଥିବା ଜଣେ ଯୁବକଙ୍କ ସମେତ ୮ ମହିଳା ଚେନ୍ନାଇ ଉପକଣ୍ଠ କାନାତୁର ରେଡିକୁପମ୍ ଠାରେ ଥିବା ଜଗନ୍ନାଥ ମନ୍ଦିର ପ୍ରାଙ୍ଗଣରେ ଆଶ୍ରୟ ନେଇଛନ୍ତି । ସେମାନଙ୍କର ଖାଇବା ପିଇବାଠାରୁ ଆରମ୍ଭ କରି ଯାବତୀୟ ଭଲମନ୍ଦ ବୁଝୁଛନ୍ତି ଓଡ଼ିଶା-ମୋ ପରିବାର ପ୍ରତିନିଧି ।
