ଭୁବନେଶ୍ୱର: ସାଂସଦ ଅପରାଜିତା ଷଡ଼ଙ୍ଗୀଙ୍କୁ ଗୁରୁତ୍ୱ ଦେଉନି ତାଙ୍କ ଦଳ ବିଜେପି । ନିର୍ଦ୍ଦିଷ୍ଟ ଟିଭି ଚାନେଲ୍ ତାଙ୍କର ଗୁରୁତ୍ୱ ବଢ଼ାଇବା ଅଭିଯାନରେ ଥିଲେ ମଧ୍ୟ ରାଜ୍ୟ ବିଜେପି ସଂଗଠନ ତାଙ୍କୁ ହାତେ ମାପି ଚାଖଣ୍ଡେ ଦୂରତାରେ ରଖିଛନ୍ତି । ଗତକାଲି ଖୋର୍ଦ୍ଧା ଜିଲ୍ଲା ଟାଙ୍ଗିଠାରେ ଅନୁଷ୍ଠିତ ବ୍ଲକ୍ ମଣ୍ଡଳ ସମାବେଶ ସଂକ୍ରାନ୍ତରେ ରାଜ୍ୟ ବିଜେପି ମିଡିଆ ସେଲ୍ ପକ୍ଷରୁ ଗଣମାଧ୍ୟମକୁ ଦିଆଯାଇଥିବା ପ୍ରେସ୍ ରିଲିଜ୍ ରୁ ଏହା ପୁନର୍ବାର ସ୍ପଷ୍ଟ ହୋଇଛି । ରାଜ୍ୟ ସଭାପତି ମନମୋହନ ସାମଲଙ୍କୁ ଅପରାଜିତା ନିଜ ଅକ୍ତିଆରରେ ରଖିବା ସତ୍ତ୍ୱେ ଦଳ ତାଙ୍କୁ ପାସଙ୍ଗରେ ନେଉ ନାହିଁ ।
ଗତକାଲି ଟାଙ୍ଗି ସଭାରେ ସାଂସଦ ଅପରାଜିତା ୪୬ ମିନିଟ୍ ର ଲମ୍ବା ଭାଷଣ ଦେଇଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଶାସନ ଶୈଳୀଠାରୁ ଆରମ୍ଭ କରି ୫-ଟି ସଚିବଙ୍କ ଜିଲ୍ଲାଗସ୍ତ ବିରୋଧରେ କେତେ କ’ଣ କହିଗଲେ । ଚନ୍ଦକାରେ ଜଣେ ଅଣ ଓଡ଼ିଆଙ୍କ ସ୍ତ୍ରୀ ଏକର ଏକର ଜମି ଅକ୍ତିଆର କରିଛନ୍ତି ବୋଲି ଅଭିଯୋଗ ଆଣି ଏହି ତଥ୍ୟର ଏକ କାଗଜ ଦେଖାଇଥିଲେ । ଅପରାଜିତାଙ୍କର ଭାଷଣକୁ ନିର୍ଦ୍ଦିଷ୍ଟ ଟିଭି ଚାନେଲ୍ ବ୍ରେକିଂ ନ୍ୟୁଜ୍ କରି ଛିନଛତ୍ର କଲା ।
ଅପରାଜିତାଙ୍କ ଭାଷଣ ପରେ ରାଜ୍ୟ ସଭାପତି ମନମୋହନ ସାମଲ ଭାଷଣ ଦେବାକୁ ଆସିଥିଲେ । ସେତେବେଳକୁ ଖାଇବା ସମୟ ହୋଇଯାଇଥିଲା । ତେଣୁକରି ଲୋକମାନେ ସଭାସ୍ଥଳ ଛାଡ଼ିବା ଆରମ୍ଭ କରିଥିଲେ । ସଭାସ୍ଥଳରେ ଖାଲି ଚେୟାର ଆଡକୁ ଚାହିଁ ଶ୍ରୀ ସାମଲ ‘ବିଜେଡି ମୁକ୍ତ ଓଡ଼ିଶା’ ଗଠନର ଆହ୍ୱାନ ଦେଇ ୧୫ ମିନିଟ୍ ରେ ଭାଷଣ ସାରି ଦେଇଥିଲେ ।
ଏହି କାର୍ଯ୍ୟକ୍ରମ ସଂକ୍ରାନ୍ତରେ ବିଜେପି ମିଡିଆ ସେଲ୍ ପକ୍ଷରୁ ସଂଧ୍ୟାରେ ଗଣମାଧ୍ୟମକୁ ଏକ ଲମ୍ବା ଚଉଡ଼ା ପ୍ରେସ୍ ରିଲିଜ୍ ଦିଆଗଲା । ସେଥିରେ ରାଜ୍ୟ ସଭାପତିଙ୍କର ଭାଷଣକୁ ଅ- ଠ କରି ଲେଖାଯାଇଥିଲା । ମାତ୍ର ସାଂସଦ ଅପରାଜିତା ଷଡ଼ଙ୍ଗୀଙ୍କର ଭାଷଣର ପଦୁଟିଏ ବି ଉଲ୍ଲେଖ ନ ଥିଲା । ଏଥିରୁ ଦଳରେ ତାଙ୍କର ଗୁରୁତ୍ୱ ସ୍ପଷ୍ଟ ବାରି ହୋଇଯାଇଥିଲା । ନିଜସ୍ୱ ସଂଗଠନ ଓ ନିଜସ୍ୱ ପ୍ରଚାରରେ ବିଶ୍ୱାସ ରଖୁଥିବା ଅପରାଜିତା ଦଳକୁ ଅଣଦେଖା କରି ଚାଲିଥିବାରୁ ଦଳ ମଧ୍ୟ ତାଙ୍କୁ ଗୁରୁତ୍ୱ ଦେବାକୁ ଚାହୁଁ ନାହିଁ ବୋଲି କହିଛନ୍ତି ଜିଲ୍ଲା ବିଜେପିର ଜଣେ ବରିଷ୍ଠ କର୍ମକର୍ତ୍ତା ।
ଆଗାମୀ ନିର୍ବାଚନ ପାଖେଇ ଆସୁଥିବା ବେଳେ ସାଂସଦ ଅପରାଜିତା ନିଜର ସଂସଦୀୟ କ୍ଷେତ୍ରରେ ସକ୍ରିୟ ହୋଇଛନ୍ତି । ଭୁବନେଶ୍ୱରରୁ ସେ ପୁନର୍ବାର ଲଢ଼ିବାର ସମ୍ଭାବନା ଅଧିକ ଥିବାରୁ ନେତା ଓ କର୍ମୀଙ୍କ ଉପରକୁ ନଜର ଫେରାଇଛନ୍ତି । ଏହିକ୍ରମରେ ଗତକାଲିର ଟାଙ୍ଗି ସଭାରେ ଏକ ମଜ୍ଜାଦାର ଘଟଣା ଦେଖିବାକୁ ମିଳିଥିଲା । ଅପରାଜିତାଙ୍କ ବିଭିନ୍ନ କାର୍ଯ୍ୟକ୍ରମ ବ୍ୟାନରରେ ରାଷ୍ଟ୍ରୀୟ ନେତାଙ୍କ ସହ ସାଧାରଣତଃ ତାଙ୍କର ବଡ଼ ଫଟୋ ଦେଖିବାକୁ ମିଳିଥାଏ । ସେଥିରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଏପରିକି ରାଜ୍ୟ ସଭାପତିଙ୍କ ଫଟୋ ପ୍ରାୟତଃ ନ ଥାଏ । ମାତ୍ର ଟାଙ୍ଗି ମଣ୍ଡଳ ସମାବେଶ ମଞ୍ଚରେ ଲାଗିଥିବା ବ୍ୟାନରରେ ଏହାର ବ୍ୟତିକ୍ରମ ଦେଖିବାକୁ ମିଳିଥିଲା । ଧର୍ମେନ୍ଦ୍ର ପ୍ରଧାନ ଓ ଅନ୍ୟମାନଙ୍କର ଫଟୋ ବି ସେଠି ଶୋଭା ପାଇଥିଲା ।
ସୂଚନାଥାଉକି, ୨୦୧୯ ନିର୍ବାଚନ ଜିତିବା ପରେ ଅପରାଜିତା କେଉଁ ନେତା ଓ କର୍ମୀଙ୍କୁ ପାସଙ୍ଗରେ ନେଉନାହାନ୍ତି । ରାଜ୍ୟର ବିଜେପି ସଂଗଠନ ସହ ତାଙ୍କର ସମ୍ପର୍କ ନାହିଁ କହିଲେ ଚଳେ । ତେବେ ମନମୋହନ ସାମଲ ରାଜ୍ୟ ସଭାପତି ହେବା ପରେ ସେ ତାଙ୍କୁ ଅକ୍ତିଆର କରିଛନ୍ତି । ଅପରାଜିତାଙ୍କ ସଖୀ କଣ୍ଢେଇ ବୋଲି ମନମୋହନଙ୍କୁ କଟାକ୍ଷ କରାଯାଉଛି । ମନମୋହନଙ୍କ ସହ ଉତ୍ତମ ସମ୍ପର୍କ ସତ୍ତ୍ୱେ ରାଜ୍ୟ ବିଜେପିର ଅଧିକାଂଶ ନେତା ତାଙ୍କୁ ଗ୍ରହଣ କରୁନାହାନ୍ତି । ଅପରାଜିତାଙ୍କର ଅହଂକାର ଏହାର ମୁଖ୍ୟ କାରଣ ବୋଲି ଦଳୀୟ ମହଲରେ ଚର୍ଚ୍ଚା ହେଉଛି ।
