ଭୁବନେଶ୍ୱର: କଂଗ୍ରେସର ବରିଷ୍ଠ ବିଧାୟକ ସୁର ରାଉତରାୟଙ୍କର ଏଥରର ହୋଲି ଖେଳରେ ଏକ ରୋଚକ ଦୃଶ୍ୟ ଦେଖିବାକୁ ମିଳିଲା । ନିଶା ମହାରଣା ନାମକ ଜଣେ ଯୁବତୀଙ୍କ ହାତରେ ହାତ ମିଳାଇ ଖାଲି ନାଚ କଲେନି.. ବରଂ ତାଙ୍କ କଳାକୁ ଖୁବ୍ ପ୍ରଶଂସା କଲେ । ଏହାକୁ କୌଣସି ଭିନ୍ନ ଅର୍ଥରେ ଦେଖିବା ଉଚିତ୍ ନୁହେଁ । ବରଂ ତାରିଫ୍ କରାଯାଉଛି ଯେ ଅନ୍ତର୍ଜାତୀୟ ମହିଳା ଦିବସରେ ତାଙ୍କ ନାତୁଣୀ ବୟସର ଜଣେ ଯୁବତୀ ଫ୍ୟାନଙ୍କୁ ସେ ସମ୍ମାନ ଦେଇଛନ୍ତି, ଭଲ ପାଇବା ଦେଇଛନ୍ତି । ତେଣିକି ସେହି ନିର୍ଦ୍ଦିଷ୍ଟ ଯୁବତୀଙ୍କ ପଛରେ ଯେତେ ଅପବାଦ ଥାଉନା କାହିଁକି… ।
ଏହାର ଦିନକ ପୂର୍ବରୁ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କର ଏକ ବକ୍ତବ୍ୟ ଆସିଥିଲା । ମନ୍ତ୍ରୀ ନବ ଦାସଙ୍କ ହତ୍ୟାର କ’ଣ କାରଣ ହୋଇପାରେ ତାହାର ଏକ ଅନୁମାନ ଲଗାଇଥିଲେ । ଗୋପାଳ ଦାସ, ନବ ଦାସଙ୍କ ଉପରେ ବ୍ୟକ୍ତିଗତ ରାଗ ରଖି ମାରିଛନ୍ତି ଏବଂ ଏହି ବ୍ୟକ୍ତିଗତ ରାଗଟି କୁଆଡ଼େ ଗୋପାଳର ସମ୍ପର୍କୀୟକୁ ନେଇ । ହତ୍ୟାର କାରଣଟି ସେଇଠି ଲୁଚି ରହିଥିବା ନରସିଂହ ବାବୁ କୁଆଡ଼େ ବିଭିନ୍ନ ଲୋକଙ୍କଠାରୁ ଶୁଣିଥିଲେ ।
ନରସିଂହ ବାବୁ ଜଣେ ବରିଷ୍ଠ ରାଜନେତା ଏବଂ ସମ୍ମାନସ୍ପଦ ବ୍ୟକ୍ତି । ସବୁବେଳେ ତାଙ୍କ କଥାକୁ ଲୋକମାନେ ଗୁରୁତ୍ୱ ଦିଅନ୍ତି । କିନ୍ତୁ ତାଙ୍କ ଭଳି ଜଣେ ନେତାଙ୍କ ମୁହଁରୁ ଏକ ନିହାତି ସମ୍ବେଦନଶୀଳ ଘଟଣା ସମ୍ପର୍କରେ ଶୁଣାଶୁଣି ଆଧାରରେ ବୟାନ କେହି ଆଶା କରୁ ନ ଥିଲେ । ବିଜ୍ଞ ନରସିଂହ ବାବୁ ଏମିତି କହୁ କହୁ ଯେ କଥାଟି କହି ଦେଇଥିବେ.. ତାହା ଜମାରୁ ବିଶ୍ୱାସ ହେଉନି । ନିଶ୍ଚିତ ଭାବେ କିଛି ରହସ୍ୟ ଥାଇପାରେ.. ମାତ୍ର ସେହି ରହସ୍ୟଟି କ’ଣ?
ଅବଶ୍ୟ ନରସିଂହ ବାବୁ ନିଜର ଏହି ମନ୍ତବ୍ୟ ପାଇଁ ପରବର୍ତ୍ତୀ ସମୟରେ ଅନୁତାପ(!) କରିଛନ୍ତି । ତାହାପୁଣି ସ୍ୱର୍ଗତ ନବ ଦାସଙ୍କ ଝିଅ ଦୀପାଳିଙ୍କ ପ୍ରତିକ୍ରିୟା ପରେ । ନରସିଂହ ବାବୁଙ୍କ ଭଳି ଜଣେ ବ୍ୟକ୍ତିଙ୍କ ମୁହଁରେ ତାଙ୍କ ବାପାଙ୍କ ଚରିତ୍ର ସଂହାରକୁ ସେ ଓ ତାଙ୍କ ପରିବାର ସହ୍ୟ କରିପାରିନାହାନ୍ତି । ଯେଉଁଥିପାଇଁ ନରସିଂହ ବାବୁ କଥା ଫେରାଇବାକୁ ବାଧ୍ୟ ହୋଇଥିଲେ । କିନ୍ତୁ ନରସିଂହ ବାବୁ ଏମିତି କହିଲେ କାହିଁକି ଏବଂ ଟିଭିରେ ବସି ଭୁଲ୍ ମାଗିଲେ କାହିଁକି ତାହା ବଡ଼ ପ୍ରଶ୍ନ । ଏହାଦ୍ୱାରା ତାଙ୍କର ସମ୍ମାନ ବଢ଼ିଲା ନା କମିଲା ତାହା ଚର୍ଚ୍ଚାର ବିଷୟ ହୋଇଛି ।
ପାରାଦ୍ୱୀପଠାରେ ବିଜୁବାବୁଙ୍କ ଜୟନ୍ତୀ ପାଳନ ସଭାରେ ଆଉ ଜଣେ ବିଜ୍ଞ ବ୍ୟକ୍ତି ବିଜେଡିର ବିଧାୟକ ସୌମ୍ୟରଂଜନ ପଟ୍ଟନାୟକ ଦେଇଥିବା ମନ୍ତବ୍ୟକୁ ନେଇ ଚର୍ଚ୍ଚା ହୋଇଛି । ବିଜେଡିକୁ କଟାକ୍ଷ କରି କହିଥିଲେ, ଅଜା ନିଶକୁ ନେଇ ଆମେ କେତେ ଦିନ ଗର୍ବ କରିବା? ଏହି ଅଭ୍ୟାସ ବେଶୀ ଦିନ ତିଷ୍ଠିବ ନାହିଁ । ବିଜୁବାବୁଙ୍କ ପୁଅଙ୍କ ଦ୍ୱାରା ପରିଚାଳିତ ଦଳ ୨୨ ବର୍ଷ ହେଲା କ୍ଷମତାର ମହୁ ଚଖେଇ ଚାଲିଛି । ହେଲେ ଏ ମହୁ ଖାଇବାର ଯେଗ୍ୟତା ତୁମର ଅଛି ତ? ବୋଲି ସୌବାବୁ ପ୍ରଶ୍ନ କରିଥିଲେ ।
ସୌମ୍ୟ ବାବୁ କାହାରିକୁ ଏ ପ୍ରଶ୍ନ ପଚାରୁଛନ୍ତି? ତାଙ୍କର କେଉଁଭଳି ନୀତି ଆଦର୍ଶ ତାହା ଓଡ଼ିଶାର ଦାଣ୍ଡରେ ପଡ଼ି ହାଟରେ ଗଡୁଚି । ତାଙ୍କର ଇତିହାସକୁ ନେଇ ବହୁତ ଚର୍ଚ୍ଚା ହୋଇଛି । ଖବରକାଗଜ ବ୍ୟବସାୟ ଆରମ୍ଭଠାରୁ ଆଜି ବିଧାୟକ ହେବା ପର୍ଯ୍ୟନ୍ତ ତାଙ୍କ ନିଜ ନିଶ ସମ୍ପର୍କରେ ସମସ୍ତେ ଅବଗତ ଅଛନ୍ତି । କାହା ନିଶରେ ସେ ବଳୀୟାନ୍ ତାହା କାହାରିକୁ ଅଛପା ନାହିଁ? ଶ୍ୱଶୁର ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବାବୁ ଏବଂ ମୁଖ୍ୟମନ୍ତ୍ରୀ ନବୀନ ବାବୁଙ୍କ ନିଶକୁ ଧରି ଏହି ସିଢ଼ି ଉଠିଛନ୍ତି ନା ନାହିଁ ନିଜକୁ ଆଗ ପ୍ରଶ୍ନ କରନ୍ତୁ ବୋଲି କୁହାଯାଉଛି । କ୍ଷମତା ମହୁ ଖାଇବାର ଯୋଗ୍ୟତା ତାଙ୍କର ଅଛି ନା ନାହିଁ ତାହା ନିଜକୁ ପଚାରିଲେ ତାଙ୍କର ସମ୍ମାନ ଆହୁରି ବଢ଼ନ୍ତା ।
ଆମର କେନ୍ଦ୍ରମନ୍ତ୍ରୀ ଓଡ଼ିଆ ପୁଅ ଧର୍ମେନ୍ଦ୍ର ପ୍ରଧାନଙ୍କ କଥାକୁ ଏବେ ଆସିବା । ନିକଟରେ ତାଙ୍କର ଦୁଇଟି ମନ୍ତବ୍ୟ ଗଣମାଧ୍ୟମରେ ଆସିଛି । ପ୍ରଥମଟି ହେଉଛି, ତିର୍ତ୍ତୋଲ ବିଧାୟକ ବିଜୟ ଶଙ୍କର ଦାସଙ୍କ ପ୍ରେମ ଓ ପ୍ରତାରଣା କାହାଣୀ ଏବଂ ଦ୍ୱିତୀୟଟି ହେଉଛି ଓଡ଼ିଶାର ଜଣେ ମନ୍ତ୍ରୀଙ୍କ ପ୍ରେମ ଓ ପ୍ରତାରଣାର କାହାଣୀ । ବିଜୟ ଶଙ୍କରଙ୍କ କାହାଣୀ ସମସ୍ତେ ଜାଣନ୍ତି । ମାତ୍ର ମନ୍ତ୍ରୀଙ୍କ ତଥାକଥିତ ପ୍ରେମ ଓ ପ୍ରତାରଣାର କାହାଣୀର ତଥ୍ୟ ତାଙ୍କ ପାଖରେ ନାହିଁ କି କାହାରି ପାଖରେ ନାହିଁ । ନରସିଂହ ବାବୁଙ୍କର ନବ ବାବୁ-ଗୋପାଳ କାହାଣୀ ଭଳି ଧର୍ମେନ୍ଦ୍ର ବାବୁ ତାଙ୍କ ନେତାଙ୍କ କାନକୁହା କଥାରେ ଏହି ବୟାନ ଦେଇଛନ୍ତି ।
ଧର୍ମେନ୍ଦ୍ର ବାବୁ ଦେଶର ଶିକ୍ଷାମନ୍ତ୍ରୀ । ପ୍ରଧାନମନ୍ତ୍ରୀ ମୋଦିଙ୍କ ୧୦ ଜଣିଆ କୋର୍ ଟିମ୍ ର ଜଣେ ସଦସ୍ୟ । ଖୁବ୍ ପାୱାରଫୁଲ୍ । କିନ୍ତୁ ଏଠି କାନକୁହା କଥାରେ ନିଜକୁ ଶସ୍ତା କରିବା ଠିକ୍ ହେଉନାହିଁ । ବିଜେଡ଼ି ବିରୋଧରେ ୩ ବର୍ଷ ହେଲା କାହିଁକି ଚୁପ୍ ଥିଲେ ତାହା ଅବଶ୍ୟ ଭିନ୍ନ ପ୍ରସଙ୍ଗ.. ।
ଆଗାମୀ ନିର୍ବାଚନ ପାଇଁ ଏବେ ଏବେ ପ୍ରସ୍ତୁତି ଆରମ୍ଭ କରିଛନ୍ତି । କୁଆଡ଼େ ଓଡ଼ିଶାରେ ବିଜେପିର ଫେସ୍ ହେବାକୁ ଯାଉଛନ୍ତି । ନବୀନଙ୍କ ସହ ତାଙ୍କର ଲଢ଼େଇ ହେବ । ଆଟାକ୍ ପାଇଁ ବଡ଼ ବଡ଼ ପ୍ରସଙ୍ଗ ଅଛି । ମାତ୍ର ଏଭଳି ଶସ୍ତା କାହାଣୀ କରି ନିଜେ ହୀନସ୍ତା ହେବା ଠିକ୍ ହେଉନି । କାହାରି ବ୍ୟକ୍ତିଗତ ପ୍ରେମ କାହାଣୀ ଉପରେ ତାଙ୍କ ଭଳି ବଡ଼ ନେତାଙ୍କ ମୁହଁରୁ ଶସ୍ତା ପ୍ରତିକ୍ରିୟା ବିଲକୁଲ୍ ଶୋଭା ପାଉନି । ଜୟନାରାୟଣ ମିଶ୍ର, ଗୋଲକ ମହାପାତ୍ର କି ଲେଖାଶ୍ରୀ ସାମନ୍ତସିଂହାରଙ୍କ ସହିତ ଆପଣ ସମକକ୍ଷ ହୋଇଯାଆନ୍ତୁ ନାହିଁ ବୋଲି ଶୁଭେଚ୍ଛୁମାନେ କହିଛନ୍ତି ।
ନିକଟରେ ଜାତୀୟ ମହିଳା କମିସନର ସଦସ୍ୟ ଭାବେ ମନୋନୀତ ହୋଇଥିବା ତାଙ୍କ ଦଳର ଜଣେ ନେତ୍ରୀ ଖୁସବୋ ସୁନ୍ଦର ତାଙ୍କ ବାପାଙ୍କ ବିରୋଧରେ ଯୌନ ନିର୍ଯ୍ୟାତନା ଅଭିଯୋଗ ଆଣିଛନ୍ତି । ରାଜନୈତିକ ଦୃଷ୍ଟିଭଙ୍ଗୀରେ ତାକୁ ନେଇ ଚର୍ଚ୍ଚା କରିବା ଆପଣଙ୍କୁ ଠିକ୍ ଲାଗିବ କି ବୋଲି ସେମାନେ ପ୍ରଶ୍ନ କରିଛନ୍ତି ।
ବିଜେପିର ଏକଘରିକିଆ ବରିଷ୍ଠ ନେତା ବିଜୟ ମହାପାତ୍ର ଆଜି ନବ ଦାସ ହତ୍ୟା ମାମଲା ଉପରେ ପୁଣି ବୟାନ ଦେଇଛନ୍ତି । ଏହି ଘଟଣାର ଷଡ଼ଯନ୍ତ୍ର ପଛରେ ଚିରାଚରିତ ଦୁଇ ଅଣଓଡ଼ିଆ ଅଫିସରଙ୍କୁ ଟାର୍ଗେଟ୍ କରିଛନ୍ତି । ଗତଥର ସେ ଜଣେ ଅବସରପ୍ରାପ୍ତ ଆଇଏଏସ୍ ଅଫିସରଙ୍କ ସଂପୃକ୍ତି କଥା ଉଠାଇଥିଲେ । ଅବଶ୍ୟ ତାଙ୍କ ପାଖରେ ତାଙ୍କ ଅଭିଯୋଗଗୁଡ଼ିକର କିଛି ପ୍ରମାଣ ନାହିଁ । କ୍ରାଇମବ୍ରାଞ୍ଚ ତଦନ୍ତକୁ ନେଇ ଶ୍ରୀ ମହାପାତ୍ର ଆଉ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉଠାଇଛନ୍ତି । କାହିଁକି ହତ୍ୟା ଷଡ଼ଯନ୍ତ୍ର ମାମଲା ୧୨୦(ବି)ରେ ତଦନ୍ତ ହେଉନାହିଁ ବୋଲି ପ୍ରଶ୍ନ କରିଛନ୍ତି ।