ଭୁବନେଶ୍ୱର: ରାସ୍ତା ମଝିରେ ଦୁର୍ଘଟଣାରେ ପଡି ଯୁବତୀଜଣଙ୍କ ଛଟପଟ ହେଉଥିଲେ । ଲୋକମାନେ କେବଳ ଚାହିଁ ଦେଇ ଚାଲିଯାଉଥିଲେ । ସେଠାରେ ଅଟକି ଯୁବତୀଙ୍କୁ ଉଦ୍ଧାର କରିବାର ମାନବିକତା ସେମାନଙ୍କ ପାଖରେ ନ ଥିଲା । ଏତିକିବେଳେ ରାସ୍ତାରେ ଯାଉଥିବା ଆଉ ଜଣେ ଯୁବତୀ କିନ୍ତୁ ବ୍ୟତିକ୍ରମ ସାଜିଥିଲେ । ଅଫିସରୁ ବିଳମ୍ବରେ ଫେରୁଥିବାରୁ ଘରକୁ ଯିବାକୁ ତରବର ହେଉଥିବା ସେହି ଯୁବତୀଜଣଙ୍କ ସେଠାରେ ଖାଲି ଅଟକି ନ ଥିଲେ, ବରଂ ଯୁବତୀଙ୍କୁ ରାସ୍ତାରୁ ଉଠାଇ ଡାକ୍ତରଖାନାରେ ଚିକିତ୍ସା କରାଇବା ସହ ଘରଲୋକଙ୍କୁ ହସ୍ତାନ୍ତର କଲାପରେ ଯାଇ ନିଜ ଘରକୁ ଫେରିଥିଲେ । ଘଟଣାଟି ବେଶ୍ ଚର୍ଚ୍ଚାର ବିଷୟ ହୋଇଛି ।
ମଙ୍ଗଳବାର ସଂଧ୍ୟା ପ୍ରାୟ ୯ଟା ବେଳର ଏହି ଘଟଣା । ଭୁବନେଶ୍ୱର-କଟକ ମୁଖ୍ୟରାସ୍ତାର ପଣ୍ଡା କ୍ୟାନସର ହସ୍ପିଟାଲ୍ ସାମନା ଫ୍ଲାଏ ଓଭରବ୍ରିଜ୍ ଉପରେ ସ୍କୁଟିରେ ଯାଉଥିବା ଜଣେ ଯୁବତୀଙ୍କୁ ପଛପଟୁ ଏକ କାର୍ ଧକ୍କା ଦେଇ ଚାଲିଯାଇଥିଲା । ଯୁବତୀଙ୍କ ଜଣଙ୍କ ରାସ୍ତାରେ ଛିଟିକି ପଡ଼ିଥିଲେ । ରକ୍ତ ଜୁଡୁବୁଡୁ ହୋଇ ଯନ୍ତ୍ରଣାରେ ଛଟପଟ ହେଉଥିଲେ । ରାସ୍ତାରେ ଯାଉଥିବା ଲୋକମାନେ ଏହି ଦୃଶ୍ୟ ଦେଖୁଥିଲେ ମଧ୍ୟ କେହି ତାଙ୍କୁ ଉଦ୍ଧାର କରିବାକୁ ଆଗେଇ ଆସି ନ ଥିଲେ ।
ସେତିକି ବେଳେ ସେହି ରାସ୍ତାରେ ଯାଉଥିଲେ ବର୍ଷା ରାଉତରାୟ ନାମ୍ନୀ କଟକର ଜନୈକା ଯୁବତୀ । ଭୁବନେଶ୍ୱରରେ ଅଫିସ କାମ ସାରି ସେଦିନ ବିଳମ୍ବରେ ଘରକୁ ଫେରୁଥିଲେ । ଘରଲୋକଙ୍କ ବ୍ୟସ୍ତତା ଯୋଗୁଁ ଘରେ ପହଞ୍ଚିବା ପାଇଁ ସେ ତରବର ହେଉଥିଲେ । ତେବେ ରାସ୍ତାରେ ଦୁର୍ଘଟଣାଗ୍ରସ୍ତ ଯୁବତୀଙ୍କୁ ଦେଖି ନିଜକୁ ସମ୍ଭାଳି ପାରି ନ ଥିଲେ । ସେଠି ଗାଡ଼ି ଅଟକାଇଥିଲେ । ଆଉ କାଳ ବିଳମ୍ବ ନ କରି ଅନ୍ୟ ଏକ ଗାଡ଼ିରେ ତାଙ୍କୁ ଧରି ନିକଟସ୍ଥ ସାଇ କିରଣ ହସ୍ପିଟାଲ୍ ନେଇ ଆସିଥିଲେ ।
ବର୍ଷା ନିଜଲୋକ ଭଳି ଡାକ୍ତରଙ୍କ ସହ କଥା ହେବା ସହ ସଂପୃକ୍ତା ଯୁବତୀଙ୍କ ଜରୁରୀ ଚିକିତ୍ସା ଏବଂ ଆବଶ୍ୟକ ପରୀକ୍ଷା ନିରୀକ୍ଷା କରାଇଥିଲେ । ଡାକ୍ତରଙ୍କ ପରାମର୍ଶ ଅନୁଯାୟୀ ଔଷଧ ଆଣି ଖୁଆଇ ସେବାଯତ୍ନ କରିଥିଲେ । ଫୋନ୍ କରି ତାଙ୍କ ଘର ଲୋକଙ୍କୁ ଡାକିଥିଲେ । ସେମାନେ ପହଞ୍ଚିଲା ପରେ ଯାଇ ହସ୍ପିଟାଲ୍ ଛାଡ଼ିଥିଲେ ବର୍ଷା । ରାସ୍ତା କଡ଼ରେ ରଖିଯାଇଥିବା ନିଜ ସ୍କୁଟିକୁ ଧରି ଘରକୁ ଫେରିଲା ବେଳକୁ ରାତି ପ୍ରାୟ ୧୧ଟା ହୋଇଯାଇଥିଲା ।
‘ଓଡ଼ିଶା ମୋ ପରିବାର’ ରେ ଚିଫ୍ ଏକଜ୍ୟୁଟିଭ୍ ଅଫିସର(ସିଇଓ) ଭାବେ କାର୍ଯ୍ୟ କରୁଥିବା ବର୍ଷାଙ୍କର ଏହି ମହାନ୍ କାର୍ଯ୍ୟକୁ ସବୁଆଡୁ ପ୍ରଶଂସା ମିଳିଛି ।
