ଭୁବନେଶ୍ୱର: ଓଡ଼ିଶା ଡିଜିପି ନିଯୁକ୍ତି ସମ୍ପର୍କିତ ମାମଲାର ସୁପ୍ରିମକୋର୍ଟରେ ଆଜି ଶୁଣାଣି ଆରମ୍ଭ ହୋଇଛି । ତେବେ ସମୟ ଅଭାବରୁ ସମ୍ପୂର୍ଣ୍ଣ ହୋଇପାରିନାହିଁ । ଆସନ୍ତାକାଲି ଶୁଣାଣି ଜାରି ରହିବ ବୋଲି କୋର୍ଟ କହିଛନ୍ତି । ଆସନ୍ତାକାଲି ବରିଷ୍ଠ ଆଇପିଏସ୍ ସୁଶାନ୍ତଙ୍କ ନାଥଙ୍କ ଓକିଲ ଏବଂ ୟୁପିଏସସି ସେମାନଙ୍କ ପକ୍ଷ ରଖିବେ । ଆଜିର ଶୁଣାଣି ବେଳେ ସରକାରୀ ଦଳର କାର୍ଯ୍ୟଶୈଳୀକୁ ନେଇ ପ୍ରଶ୍ନ ଉଠାଇଥିଲେ ବରିଷ୍ଠ ଆଇନଜୀବୀ ପି. ଚିଦାମ୍ବରମ୍ । ଆସନ୍ତାକାଲି ଶୁଣାଣିରେ ତାଙ୍କର ଯୁକ୍ତି ଉପସ୍ଥାପନ ପାଇଁ ଅଧିକ ସମୟ ମାଗିଛନ୍ତି ।
ସୂଚନାଥାଉକି, ଓଡ଼ିଶା ଡିଜିପି ନିଯୁକ୍ତି ପ୍ରକ୍ରିୟାକୁ ନେଇ ସୁପ୍ରିମକୋର୍ଟରେ ଏକ ଜନସ୍ୱାର୍ଥ ମାମଲା ରୁଜୁ ହୋଇଛି । ଅଗଷ୍ଟ ୧୩ରେ ୟୁପିଏସସି ଚୟନ କମିଟିର ବୈଠକ ବସି ନୂଆ ବରିଷ୍ଠତା ତାଲିକା ଉପରେ ମୋହର ବଜାଇବାର ଥିଲା । ଏ ସମ୍ପର୍କରେ ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ପି. ଚିଦାମ୍ବରମ୍ ପ୍ରଧାନ ବିଚାରପତିଙ୍କ ଜରୁରୀ ଦୃଷ୍ଟି ଆକର୍ଷଣ କରିଥିଲେ । ୨୦୦୬ ମସିହା ପ୍ରକାଶ ସିଂ ମାମଲାରେ ସୁପ୍ରିମକୋର୍ଟଙ୍କ ଗାଇଡଲାଇନ୍ ଉଲ୍ଲଂଘନ କରାଯାଇ ଓଡ଼ିଶାରେ ଡିଜିପି ଚୟନ ପ୍ରକ୍ରିୟା ଚାଲିଥିବା ସେ ଜଣାଇଥିଲେ । ପ୍ରଧାନ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତ ଏହା ଉପରେ ଆମିକସକ୍ୟୁରି ରାଜୁ ରାମଚନ୍ଦ୍ରନଙ୍କ ମତାମତ ଲୋଡ଼ିବା ପରେ ପରବର୍ତ୍ତୀ ନିଷ୍ପତ୍ତି ପର୍ଯ୍ୟନ୍ତ ଡିଜିପି ନିଯୁକ୍ତି ପ୍ରକ୍ରିୟା ଉପରେ ରୋକ୍ ଲଗାଇଥିଲେ ।
ତେବେ ଓଡ଼ିଶା ସରକାରଙ୍କ ପକ୍ଷରୁ ଏଜି ପୀତାମ୍ବର ଆଚାର୍ଯ୍ୟ ଅଭିଯୋଗକୁ କପୋଳକଳ୍ପିତ କହିଛନ୍ତି । ଏହି ମାମଲାରେ କିଛି ଅଫିସରଙ୍କ ଚକ୍ରାନ୍ତ ଥିବା ଗତଥର ସେ ଗଣମାଧ୍ୟମକୁ ପ୍ରତିକ୍ରିୟା ଦେଇଥିଲେ । ଆଜି ପୁଣି ଥରେ ପ୍ରତିକ୍ରିୟା ଦେଇଛନ୍ତି । ନାଁ ସୁପାରିଶରେ ରାଜ୍ୟ ସରକାର କୋ÷ଣସି ଅନିୟମିତତା କରି ନାହାନ୍ତି ବୋଲି ସେ କହିଛନ୍ତି । ପ୍ରକାଶ ସିଂ ରାୟ ଆଧାରରେ ରାଜ୍ୟ ସରକାର ନାଁ ସୁପାରିଶ କରିଛନ୍ତି । ରାଜ୍ୟ ସରକାର ୧୧ ଜଣିଆ ବରିଷ୍ଠ ଅଧିକାରୀଙ୍କ ତାଲିକା ଦେଇଥିଲେ । ସେମାନଙ୍କ ଭିତରୁ ଜଣଙ୍କ ନାଁରେ ସିବିଆଇ ତଦନ୍ତ କରିପାରେ ସୂଚନା ମିଳିଲା । ତେଣୁ ଜଣଙ୍କ ନାଁକୁ ରାଜ୍ୟ ସରକାର ବାଦ ଦେଇଛନ୍ତି । ସେଥିରେ ଆଉ କିଛି ବଦଳିନି । କେତେଜଣଙ୍କ ନାଁ ୟୁପିଏସସିକୁ ପଠାଯିବ ତାହା ସୁପ୍ରିମକୋର୍ଟ କହି ନାହାନ୍ତି । ୟୁପିଏସସି ସରକାର ପଠାଇଥିବା ନାଁରୁ ୩ ଜଣଙ୍କ ନାଁ ଡିଜିପି ପାଇଁ ପଠାଇବ । ସେହି ତିନିଜଣଙ୍କ ମଧ୍ୟରୁ ରାଜ୍ୟ ସରକାର କାହାକୁ ଡିଜିପି କରିବେ ସମ୍ପୂର୍ଣ୍ଣ ନିଜସ୍ୱ ବ୍ୟାପାର । ଯେଉଁମାନେ ଭାବୁଛନ୍ତି ସରକାର ୟୁପିଏସସିକୁ ୩ଟି ନାଁ ଦେବା କଥା, ତାହା ଭୁଲ୍ ବୋଲି ଏଜି ଶ୍ରୀ ଆଚାର୍ଯ୍ୟ କହିଛନ୍ତି ।
