ଭୁବନେଶ୍ୱର: ବଡ଼ଭାଇ ରାମଚନ୍ଦ୍ର ତହସିଲଦାର, ସାନଭାଇ ଲକ୍ଷ୍ମଣ ବେକାର । ତହସିଲଦାର୍ ଭାଇର ବଳକା ଉପୁରି ଟଙ୍କାକୁ ନିଜ ଆକାଉଣ୍ଟରେ ରଖୁଥିଲେ ଭାଇ ଲକ୍ଷ୍ମଣ । ଦୁଇମାସରେ ଆକାଉଣ୍ଟରେ ଭରିଥିଲେ ୧୦ ଲକ୍ଷ ଟଙ୍କା । ଆଉ ସାଢ଼େ ୪ ଲକ୍ଷ ଟଙ୍କା ଆକାଉଣ୍ଟରେ ରଖିଦେବାକୁ ସାନ ଭାଇ ଲକ୍ଷ୍ମଣକୁ ଆଜି ଡକାଇଥିଲେ । ଆଉ ଏହି ସୂଚନା ପାଇ ଆଗରୁ ଛକି ବସିଥିବା ଭିଜିଲାନସ୍ ହାବୁଡ଼ରେ ପଡ଼ିଗଲେ କରିତକର୍ମା ତହସିଲଦାର । ନଗଦ ୪ ଲକ୍ଷ ୬୫ ହଜାର ଜବତ କରିଥିଲେ । ତାଙ୍କ ସରକାରୀ ଘର ସର୍ଚ୍ଚ ବେଳେ ଆଉ ୫୦ ହଜାର ଟଙ୍କା ବି ଜବତ ହୋଇଛି । ତହସିଲଦାରଙ୍କର କଟକ ସିଡ଼ିଏ ସେକ୍ଟର-୧୧ ରେ ଥିବା ଘର, କେନ୍ଦ୍ରାପଡ଼ା ଜିଲ୍ଲା ଗରଦପୁର ବ୍ଲକ୍ ଧାନମଣ୍ଡଳରେ ଥିବା ପୈତୃକ ଘର ମଧ୍ୟ ସର୍ଚ୍ଚ କରି ବିପୁଳ ସମ୍ପତ୍ତି ଠାବ କରିଛନ୍ତି ଭିଜିଲାନସ୍ ଟିମ୍ ।
ଲୁଟେରା ସାଜିଥିବା ଏହି କରିତକର୍ମା ବାବୁ ହେଉଛନ୍ତି ରାମଚନ୍ଦ୍ର ଜେନା । ନିମାପଡ଼ା ତହସିଲଦାର ଏବଂ ଭାରପ୍ରାପ୍ତ ସବ୍ ରେଜିଷ୍ଟ୍ରାର ଭାବେ କାର୍ଯ୍ୟ କରୁଥିବା ରାମଚନ୍ଦ୍ର ଅସଦ୍ ଉପାୟରେ କଳାଟଙ୍କା କମେଇବାରେ ଖାଲି ମାଷ୍ଟ୍ରି କରିନାହାନ୍ତି, ଜାଲିଆତିରେ ବି ମାଷ୍ଟ୍ରି କରିଛନ୍ତି । ଆଇନର ଆଖିରେ ଧୂଳି ଦେଇ ତାଙ୍କ ନାଁରେ ପାଞ୍ଚ ପାଞ୍ଚଟି ପାନ୍ କାର୍ଡ ବାହାର କରିଛନ୍ତି । ଆଶ୍ଚର୍ଯ୍ୟର କଥା, ଭିନ୍ନ ଭିନ୍ନ କାର୍ଡରେ ଭିନ୍ନ ଭିନ୍ନ ବାପାଙ୍କ ନାଁ ଓ ଜନ୍ମ ତାରିଖ ରହିଛି ।
ତିନୋଟି କାର୍ଡରେ ବାପାଙ୍କ ନାଁ ଖଗେଶ୍ୱର ଜେନା ଏବଂ ଜନ୍ମ ତାରିଖ ଯଥାକ୍ରମେ ୭.୪.୧୯୭୦, ୨୭.୪.୧୯୭୦ ଓ ୨୭.୯.୧୯୭୦ ରହିଛି । ଆଉ ଗୋଟେ କାର୍ଡରେ ବାପାଙ୍କ ନାଁ ବେଅଷ୍ଣବ ଜେନା ଏବଂ ଜନ୍ମ ତାରିଖ ୯.୪.୧୯୭୧ ରହିଛି । ଅନ୍ୟ କାର୍ଡରେ ବାପାଙ୍କ ନାଁ ନାରାୟଣ ଜେନା ଏବଂ ଜନ୍ମ ତାରିଖ ୧୯.୪.୧୯୭୨ ରହିଛି ।
ଏହି କରିତକର୍ମା ବାବୁ ଙ୍କର ଜାଲିଆତି ଓ ଅପରାଧିକ କାର୍ଯ୍ୟ ପଛର ଉଦ୍ଦେଶ୍ୟକୁ ଭିଜିଲାନସ୍ ଛାନଭିନ୍ କରୁଛି । ଆୟକର ବିଭାଗକୁ ମାମଲା ହସ୍ତାନ୍ତର କରାଯାଇଛି ।
ପୂର୍ବରୁ ରାମଚନ୍ଦ୍ର ଜେନା ଦୁଇ ଦୁଇ ଥର ଭିଜିଲାନସ୍ ଜାଲରେ ଧରାପଡ଼ିଛନ୍ତି । ୨୦୧୧ ମସିହାରେ ମୂଲ୍ୟବାନ ସରକାରୀ ଜମିକୁ ବେଆଇନ ଭାବେ ସେଟଲମେଣ୍ଟ କରି ପଟ୍ଟା ଦେଇଥିବା ଅଭିଯୋଗରେ କେସ୍ ଖାଇଥିଲେ । କୋର୍ଟରେ ମାମଲାର ବିଚାର ଚାଲିଛି । ସେହିଭଳି ୨୦୧୮ ମସିହାରେ ଚାଷଜମିକୁ ଅଣଚାଷଜମି କରିଦେଇଥିବା ତାଙ୍କ ନାଁରେ ଅଭିଯୋଗ ରହିଛି ।
ଆଜି ନଗଦ ୫ ଲକ୍ଷ ଟଙ୍କା ସହ ତହସିଲଦାର ଧରାପଡ଼ିବା ପରେ ଭିଜିଲାନସ୍ ତଦନ୍ତରୁ ସବୁ ଗୁମର ଖୋଲିବାରେ ଲାଗିଛି । ନିଜ ସାନଭାଇ ନାଁରେ କଳାଟଙ୍କାକୁ କିଭଳି ରଖୁଥିଲେ ତାହା ବି ଧରାପଡ଼ିଯାଇଛି । ବଡ଼ଭାଇ ରାମଚନ୍ଦ୍ରଙ୍କ ବେଆଇନ ସମ୍ପତ୍ତିକୁ ସାଇତି ରଖି ଏହାର ପରିଚାଳନା ଭାର ବୋହୁଥିଲେ ସାନଭାଇ ଲକ୍ଷ୍ମଣ ।
