ଭୁବନେଶ୍ୱର: ଶ୍ରୀମନ୍ଦିରର ଭିତର ରତ୍ନଭଣ୍ଡାରରୁ ଆଜି ରତ୍ନ ଅଳଙ୍କାର ସବୁକୁ ସ୍ଥାନାନ୍ତର କରାଯାଇଛି । ଅନ୍ୟମାନଙ୍କ ସହାୟତା ୧୧ ଜଣିଆ ତଦାରଖ କମିଟି ଦ୍ୱାରା ଏହି ପ୍ରକ୍ରିୟା ସୁରୁଖୁରୁରେ ଶେଷ ହୋଇଛି । ଭିତରେ ୩ଟି ସିନ୍ଦୁକ ଓ ୪ଟି ଆଲମିରାରେ ଅଳଙ୍କାର ଭର୍ତ୍ତି ଥିଲା । ସମ୍ପୂର୍ଣ୍ଣ ଅଳଙ୍କାର ସ୍ଥାନାନ୍ତରଣ ପାଇଁ ସାଢ଼େ ୭ ଘଣ୍ଟା ଲାଗିଥିଲା । ଅସ୍ଥାୟୀ ରତ୍ନଭଣ୍ଡାରକୁ ଅଳଙ୍କାର ସ୍ଥାନାନ୍ତର କରାଯାଇ ତାଲା ପକାଯାଇଛି । ଭିତରେ ଗୁପ୍ତ ଭଣ୍ଡାର ଏବଂ ଗୁପ୍ତ ସୁଡ଼ଙ୍ଗ ରହିଥିବା ଚର୍ଚ୍ଚାକୁ ତଦାରଖ କମିଟି ଅଧ୍ୟକ୍ଷ ଖଣ୍ଡନ କରିଛନ୍ତି । କମିଟି ସଦସ୍ୟମାନଙ୍କ ଆଖିରେ ସେଭଳି କିଛି ଦୃଶ୍ୟମାନ ହୋଇ ନ ଥିବା ସେ ସ୍ପଷ୍ଟ କରିଛନ୍ତି ।
ତଦାରଖ କମିଟି ଅଧ୍ୟକ୍ଷ ଜଷ୍ଟିସ୍ ବିଶ୍ୱନାଥ ରଥଙ୍କ ନେତୃତ୍ୱରେ ୧୧ ଜଣିଆ ଟିମ୍ ଆଜି ସକାଳ ୯ଟା ୫୧ରେ ରତ୍ନଭଣ୍ଡାରରେ ପ୍ରବେଶ କରିଥିଲେ । କୌଣସି ଅଘଟଣ ଏଡ଼ାଇବା ପାଇଁ ସେତେବେଳେ ଶ୍ରୀମନ୍ଦିର ବାହାରେ ସ୍ନେକ ହେଲପଲାଇନ୍ ସଦସ୍ୟ, ଓଡ୍ରାଫ୍ ବାହିନୀକୁ ସଜାଗ ରଖାଯାଇଥିଲା । ରତ୍ନଭଣ୍ଡାରକୁ ତଦାରଖ କମିଟି ଭଲଭାବେ ଅନୁଧ୍ୟାନ କଲା ପରେ ସ୍ଥାନାନ୍ତରଣ ପ୍ରକ୍ରିୟା ଆରମ୍ଭ ହୋଇଥିଲା । ଭିତରେ ତିନୋଟି କାଠ ଆଲାମିରା, ଗୋଟିଏ ଷ୍ଟିଲ୍ ଆଲମିରା, ଦୁଇଟି କାଠ ସିନ୍ଦୁକ ଏବଂ ଗୋଟିଏ ଲୁହା ସିନ୍ଦୁକରେ ଥିବା ରତ୍ନ ଅଳଙ୍କାରକୁ ସମସ୍ତ ସଦସ୍ୟଙ୍କ ଉପସ୍ଥିତିରେ ସ୍ଥାନାନ୍ତର କରାଯାଇଥିଲା । ଏହି ପ୍ରକ୍ରିୟା ଅପରାହ୍ନ ୫ଟା ୧୫ ମିନିଟ୍ ରେ ସରିଥିଲା ।
ତଦାରଖ କମିଟି ଅଧ୍ୟକ୍ଷ କହିଛନ୍ତି, ଭିତରେ ଗୁପ୍ତ ଭଣ୍ଡାର ଏବଂ ଗୁପ୍ତ ସୁଡ଼ଙ୍ଗ ଥିବା ଯାହା କୁହାଯାଉଛି ସେଭଳି କିଛି ଦେଖିବାକୁ ମିଳିନାହିଁ । ଏଭଳି ଚର୍ଚ୍ଚା ତଥ୍ୟ ପର୍ଯ୍ୟବେସିତ ନୁହେଁ । ତଥାପି ଲେଜର ସ୍କାନିଂ ପାଇଁ ସରକାରଙ୍କୁ କହିବୁ ବୋଲି ସେ କହିଥିଲେ । ସରକାର ଏ ନେଇ ଅନୁମତି ଦେଲେ ଲେଜର ସ୍କାନିଂ ପାଇଁ ଆଗେଇବୁ । ରାଜ୍ୟ ସରକାରଙ୍କ ଅନୁମତି ପରେ ଭିତରର ଲେଜର୍ ସ୍କାନିଂ ବେଳେ ସବୁ ସ୍ପଷ୍ଟ ହୋଇଯିବ । ରତ୍ନଭଣ୍ଡାରରେ କ’ଣ ଅଛି ସେ ସମ୍ପର୍କରେ କିଛି କହିବାକୁ ସେ ମନା କରିଥିଲେ । ଭିତରେ ଯାହା ଦେଖିଲୁ ତାହା ମୁଣ୍ଡକୁ ଯିବ, ତୁଣ୍ଡକୁ ଆସିବନି । ଏଥିପାଇଁ ଆମେ ସଦସ୍ୟମାନେ ଶପଥ ନେଇଛୁ ବୋଲି ଜଷ୍ଟିସ୍ ରଥ କହିଥିଲେ ।
