ଭୁବନେଶ୍ୱର: ବିଜେଡି ସଭାପତି ନବୀନ ପଟ୍ଟନାୟକଙ୍କ ଦସ୍ତଖତରେ ଦଳର ସବୁ ବିଧାୟକଙ୍କୁ ମିଳିଛି ସରକାରୀ ବିଭାଗର ଦାୟିତ୍ୱ । ସଂପୃକ୍ତ ବିଭାଗଗୁଡ଼ିକର କାର୍ଯ୍ୟକଳାପକୁ ସେମାନେ ଜଗିବେ । ଏହି ଦାୟିତ୍ୱ ଘୋଷଣା ହେବା ପରେ କିଛି ବିଧାୟକଙ୍କ ଖୁସି କହିଲେ ନ ସରେ । ନବୀନ ସରକାରରେ ମନ୍ତ୍ରୀ ତାଲିକାରେ ନାଁ ଯୋଡିବା ପାଇଁ ପୂର୍ବରୁ ଆଶା ବାନ୍ଧିଥିବା କିଛି ବିଧାୟକ ସୋସିଆଲ୍ ମିଡିଆରେ ନବୀନ ପଟ୍ଟନାୟକଙ୍କୁ କୃତଜ୍ଞତା ଜଣାଇଛନ୍ତି । ଛାୟା ସରକାରରେ ସେମାନେ ଯେ ଜଣେ ଜଣେ ମନ୍ତ୍ରୀ ସେହି ଭାବନାରେ ଉତଫୁଲ୍ଲିତ ହୋଇଛନ୍ତି । ଗତକାଲିଠାରୁ ଏହି ପ୍ରସଙ୍ଗ ସବୁଆଡ଼େ ଚର୍ଚ୍ଚାର ବିଷୟ ହୋଇଥିଲା ବେଳେ ବିଜେଡିର ଏହି ଛାୟା ସରକାରରେ ପ୍ରକୃତରେ କିଏ ମୁଖ୍ୟମନ୍ତ୍ରୀ ବୋଲି ଅନେକ ପ୍ରଶ୍ନ କରିଥିବାରୁ ତାହା କୌତୁହଳ ସୃଷ୍ଟି କରିଛି ।
ଏହି ପ୍ରଶ୍ନ ଏଥିପାଇଁ ଉଠିଛି ଯେ ନବୀନ ପଟ୍ଟନାୟକଙ୍କ ପାଖରେ ଭି.କେ.ପାଣ୍ଡିଆନ ପୂର୍ବଭଳି ଛାଇ ହୋଇ ରହିଥିବା ସମସ୍ତେ ହୃଦୟଙ୍ଗମ କରୁଛନ୍ତି । ବିଜେଡିର ନିର୍ବାଚନ ବିପର୍ଯ୍ୟୟ ପାଇଁ ପାଣ୍ଡିଆନ ମୁଖ୍ୟ କାରଣ ହୋଇଥିଲେ ମଧ୍ୟ ନବୀନ ତାଙ୍କୁ ଛାଡ଼ି ପାରୁନାହାନ୍ତି । ପାଣ୍ଡିଆନ କାଳେ ଅସୁବିଧାରେ ପଡ଼ିବେ ସେଥିପାଇଁ ବିଧିବଦ୍ଧ ଭାବେ ପରାଜୟର କାରଣ ଖୋଜିବାକୁ ଇଚ୍ଛା କରୁନାହାନ୍ତି । ସେହି କାରଣରୁ ନିର୍ବାଚନ ବିପର୍ଯ୍ୟୟକୁ ଦେଢ଼ମାସ ବିତି ଯାଇଥିଲେ ମଧ୍ୟ ଦଳର ଫ୍ୟାକ୍ଟ ଫାଇଣ୍ଡି ଟିମ୍ ଗଠନ ହୋଇପାରୁନାହିଁ । ଦଳର ବରିଷ୍ଠ ନେତାମାନେ ଏ ସମ୍ପର୍କରେ ବାରମ୍ବାର ନବୀନଙ୍କ ଦୃଷ୍ଟି ଆକର୍ଷଣ କରି ବିଫଳ ହେଲେଣି ।
ପବିତ୍ର ଗୁଣ୍ଡିଚା ଯାତ୍ରା ଅବସରରେ ବିଜେଡିର ପୁରୁଣା ରାଜ୍ୟ ସଂଗଠନଗୁଡ଼ିକୁ ଭାଙ୍ଗି ଦିଆଗଲା । ନୂଆ ପଦକ୍ଷେପରେ, ନବୀନ ପଟ୍ଟନାୟକଙ୍କ ରାଜନୈତିକ ସଚିବ ଭାବେ ସଂତୃପ୍ତ ମିଶ୍ର ନିଯୁକ୍ତି ପାଇଲେ । ୪ ଜଣ ଗଣମାଧ୍ୟମ ସଂଯୋଜକ, ୧୪ ଜଣ ରାଜ୍ୟ ମୁଖପାତ୍ର, ୫ ଜଣ ରାଷ୍ଟ୍ରୀୟ ମୁଖପାତ୍ରଙ୍କୁ ନିଯୁକ୍ତି ଦିଆଗଲା । ବାକି ସବୁ ରାଜ୍ୟ ସଂଗଠନରେ ନବକଳେବରକୁ ଅପେକ୍ଷା କରାଯାଇଛି ।
ତେବେ ନବୀନ ବାବୁଙ୍କ ରାଜନୈତିକ ସଚିବ ଭାବେ ରାଜନୀତିରେ ସମ୍ପୂର୍ଣ୍ଣ ନବାଗତ ସଂତୃପ୍ତ ମିଶ୍ରଙ୍କ ନିଯୁକ୍ତିକୁ କେହି ଗ୍ରହଣ କରୁୂନାହାନ୍ତି । ପ୍ରକୃତରେ ଏହା ନବୀନଙ୍କର ନୁହେଁ, ବରଂ ପାଣ୍ଡିଆନଙ୍କ ନିଷ୍ପତ୍ତି ବୋଲି କୁହାଯାଉଛି । ଅର୍ଥାତ୍ ପୂର୍ବରୁ ନବୀନଙ୍କ ନାଁରେ ପାଣ୍ଡିଆନ୍ ଯେଉଁଭଳି ସବୁ ନିଷ୍ପତ୍ତି ନେଉଥିଲେ ସେହି ଧାରା ଏବେ ବି ଅପରିବର୍ତ୍ତିତ ରହିଛି । ସଂତୃପ୍ତଙ୍କୁ ଆଗରେ ରଖି ପାଣ୍ଡିଆନ ଦଳ ଉପରେ ନିୟନ୍ତ୍ରଣ ଜାରି ରଖିବାର କୌଶଳକୁ ଦଳରେ ସମସ୍ତେ ବୁଝିସାରିଲେଣି ।
ଏହା ସତ୍ୟ ଯେ, ଏକମାତ୍ର ପାଣ୍ଡିଆନଙ୍କ ପାଇଁ ନବୀନ ପଟ୍ଟନାୟକଙ୍କ ଉଜ୍ଜଳ ରାଜନୈତିକ କ୍ୟାରିୟରରେ କଳା ଛିଟା ଲାଗିଛି । ମାତ୍ର ଏହା ତାଙ୍କ ଉପରେ କୌଣସି ପ୍ରଭାବ ପକାଇ ପାରିନାହିଁ । ପାଣ୍ଡିଆନଙ୍କୁ ନେଇ ନବୀନ ଅବିଚଳିତ ଥିବା କୁହାଯାଉଛି । ରାଜନୀତିରେ ଅପରିପକ୍ୱ ଓ ଅସଫଳ ପାଣ୍ଡିଆନଙ୍କୁ ନବୀନ ଛାଡ଼ିପାରୁନାହାନ୍ତି କି ଲୋକଙ୍କଠାରୁ ପ୍ରତ୍ୟାଖ୍ୟାତ ପାଣ୍ଡିଆନ୍ ନବୀନଙ୍କ ଉତ୍ତରାଧିକାରୀ ମାୟା ଜାଲରୁ ନିଜକୁ ମୁକ୍ତ କରିପାରୁନାହାନ୍ତି । ଯାହା ବିଜେଡି ପାଇଁ ଏବେ ବଡ଼ ସମସ୍ୟା ହୋଇଛି । ଏହାକୁ ନେଇ ଦଳର ବରିଷ୍ଠ ନେତାମାନେ ଆଶଙ୍କାରେ ପଡ଼ିଛନ୍ତି ।
ପାଣ୍ଡିଆନ୍ ସାମନାକୁ ଆସିବା ବନ୍ଦ କରିଥିଲେ ମଧ୍ୟ ନବୀନ ନିବାସରୁ ବିଜେଡିକୁ ପୂର୍ବଭଳି ନିୟନ୍ତ୍ରଣ କରୁଛନ୍ତି ଏବଂ ତାଙ୍କୁ ହିଁ ବିଜେଡି ଛାୟା ସରକାରର ମୁଖ୍ୟମନ୍ତ୍ରୀ କହିବା ଯଥାର୍ଥ ହେବ ବୋଲି ଦଳର ଜଣେ ବରିଷ୍ଠ ନେତା କ୍ଷୋଭର ସହ କହିଛନ୍ତି ।
