ଭୁବନେଶ୍ୱର: ବାବୁସାନ୍ ଚେନ୍ନାଇରୁ ଫେରିଲେ । ସକାଳେ ଏୟାରପୋର୍ଟରୁ ସିଧା ବରମୁଣ୍ଡା ଜଗନ୍ନାଥବିହାରସ୍ଥିତ ଘରକୁ ଆସିଲେ । ୨୩ ତାରିଖ ସକାଳେ ପ୍ରେମିକା ପ୍ରକୃତି ମିଶ୍ରଙ୍କୁ ସାଙ୍ଗରେ ଧରି ଚେନ୍ନାଇ ଯାଉଥିବା ବାବୁସାନ୍ ଙ୍କୁ ତାଙ୍କ ପତ୍ନୀ ତୃପ୍ତି ରାସ୍ତାରେ ଧରିଥିଲେ । ଲଭର୍ ଯୋଡିଙ୍କୁ ଛେଚିଥିଲେ । ମାମଲା ଏବେ ଥାନାରେ । ବାବୁସାନ୍ ଙ୍କ ପରକୀୟା ପ୍ରୀତିର ଏହି ମାମଲା ଟିଭି ଓ ସୋସିଆଲ୍ ମିଡ଼ିଆରେ ସେବେଠାରୁ ଛାଇ ଯାଇଛି । ଘଣ୍ଟା ଘଣ୍ଟା ଧରି ଟିଭିରେ ଲାଇଭ୍ ହେଉଛି । ହେଇ.. ବାବୁସାନ୍ ବାହାରକୁ ଆସିଲେ । ଗାଡ଼ିରେ ବସିଲେ । ରାସ୍ତାକୁ ଗଲେ । ଘର ଗେଟ୍ ପାଖରେ ପହଞ୍ଚିଲେ । ଘର ଭିତରକୁ ଗଲେ । ଘରେ ତାଙ୍କ ମା’ ଙ୍କୁ ଧରି କାନ୍ଦିଲେ । ଦେଖନ୍ତୁ ବ୍ରେକିଂ ଖବର..ଏସକ୍ଲୁସିଭ୍ ଭିଜୁଆଲ୍ ।
ଆଜି ବାବୁସାନ୍ ଚେନ୍ନାଇରୁ ଫେରିବା ଘଟଣା ଟିଭି ଚାନେଲ୍ ଗୁଡ଼ିକ ପାଇଁ ଏତେ ଗୁରୁତ୍ୱପୂର୍ଣ୍ଣ ଥିଲା ଯେ ବିଧାନସଭା ପ୍ରଶ୍ନୋତ୍ତର ସିଧା ପ୍ରସାରଣକୁ ବି ଜିରୋ କରିଦେଲେ । ବିଲକୁଲ ଦେଖାଇଲେ ନାହିଁ । ବାବୁସାନ୍ ଚେନ୍ନାଇରୁ ଫେରିବା ଘଟଣା ଟିଭି ପରଦାରେ ଓଳିକ ଯାକ ବ୍ରେକିଂ ଖବର ହୋଇ ରହିଲା । ତାଙ୍କ ଘର ବାହାରେ କ୍ୟାମେରା ଥୋଇ ଲାଇଭ୍ ଟେଲିକାଷ୍ଟ ଜାରି ରହିଲା । ସାଢ଼େ ୧୦ଟାରେ ଦୁଇଟି ଚାନେଲ୍ ଅଧଘଣ୍ଟା ପାଇଁ ବିଧାନସଭା ପ୍ରଶ୍ନୋତ୍ତର ଲାଇଭ୍ କରିଥିଲା ବେଳେ ଅନ୍ୟମାନେ ଜମାରୁ କଲେ ନାହିଁ । କୃଷି ବିଭାଗର ପ୍ରଶ୍ନୋତ୍ତର କାର୍ଯ୍ୟକ୍ରମ ସେମାନଙ୍କ ପାଇଁ ଗୁରୁତ୍ୱହୀନ ହୋଇଗଲା ।
ଖାଲି ଆଜି ଏକଥା ନୁହେଁ । ୨୩ ତାରିଖଠାରୁ ସବୁ ଟିଭି ଚାନେଲ୍ କୁ ଫୁରସତ୍ ନାହିଁ । ଘଣ୍ଟା ଘଣ୍ଟା ଧରି ବାବୁସାନ୍- ପ୍ରକୃତି ପ୍ରେମ ଏବଂ ସେମାନଙ୍କ ଘରୋଇ କଳି ଉପରେ ଲାଇଭ୍ ଡିସକ୍ସନ୍, ସାକ୍ଷାତକାର ଚାଲିଛି । କିଏ କାହାର ଆଗ ସାକ୍ଷାତକାର ନେବ ସେଥିପାଇଁ ଚାନେଲ୍ ଗୁଡ଼ିକ ମଧ୍ୟରେ ପ୍ରବଳ ପ୍ରତିଯୋଗିତା ଚାଲିଛି । କିଛି ୱେବ୍ ଚାନେଲ୍ କଞ୍ଚା ଭାଷା କହୁଥିବା କିଛି ଲୋକଙ୍କର କେବଳ ସାକ୍ଷାତକାର ପ୍ରସାରଣ କରୁଛନ୍ତି । ଏଥିରୁ କୁଆଡ଼େ ବଢ଼ିଆ ଟିଆରପି ମିଳୁଛି ।
ବାବୁସାନ୍-ପ୍ରକୃତି ଲଭ୍ ଏପିସୋଡ୍ ଏବଂ ପରିବାର କଳିକୁ ପ୍ରମୁଖ ଟିଭି ଚାନେଲ୍ ଗୁଡ଼ିକ ଘଣ୍ଟା ଘଣ୍ଟା ଧରି ଲାଇଭ୍ କରିବା ଘଟଣାରେ ବୁଦ୍ଧିଜୀବୀ ମହଲ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ଟିଭି ସାମ୍ବାଦିକତା ଆଜି କେଉଁସ୍ତରକୁ ଚାଲିଯାଇଛି ବୋଲି ସେମାନେ ଛିଛାକର କରୁଛନ୍ତି । ସମାଜ ଏବଂ ଯୁବବର୍ଗଙ୍କ ଉପରେ ଏହାର କୁପ୍ରଭାବକୁ ନେଇ ସେମାନେ ବ୍ୟଥିତ । ବାବୁସାନ୍ କିମ୍ବା ପ୍ରକୃତି ମିଶ୍ରଙ୍କ ଭଳି ଫିଲ୍ମ ତାରକା ଯୁବସମାଜର ଜମାରୁ ଆଦର୍ଶ ନୁହଁନ୍ତି । ଦର୍ଶକଙ୍କ ଉପରେ ଏହାକୁ ଜବରଦସ୍ତ ଲଦି ଦିଆଯାଉଥିବାରୁ ସେମାନେ କ୍ଷୋଭ ପ୍ରକାଶ କରିଛନ୍ତି ।
ଅନ୍ୟ ଦିଗକୁ ଦେଖିଲେ, ସମୁଦାୟ ଏହି ଘରୋଇ ମାମଲାରେ ବହୁତ କଥା ଅଛି । ଯେମିତି କି… ପରକୀୟା ପ୍ରୀତି, ନିଶା ସେବନର କଥା ଅଛି । ଅବିବାହିତ ଝିଅ ଭୁବନେଶ୍ୱରର ନିଜ ଘରେ ବାପାମାଆଙ୍କ ସହ ନ ରହି ଅନତି ଦୂରରେ ହୋଟେଲ କି ଗେଷ୍ଟ ହାଉସ୍ ରେ ମାସ ମାସ ଧରି ରହିବାର କଥା ଅଛି । ବିବାହିତ ପୁରୁଷଟି ନିଜ ଘରେ ବାପାମାଆ, ସ୍ତ୍ରୀ, ଛୁଆଙ୍କ ସହ ନ ରହି ମାସ ମାସ ଧରି ବାହାରେ ରହିବାର କଥା ଏଥିରେ ଅଛି । ଅପସଂସ୍କୃତିରେ ବୁଡ଼ିଥିବା ପରିବାର ଅନ୍ୟକୁ ସଂସ୍କାର ଶିଖାଇବାର କଥା ଏଥିରେ ଅଛି । ଭୁଲ୍ କରି ମାଡ଼ ଖାଇବା ପରେ ବି ଅନୁତାପ କି ଲଜ୍ଜା ଅନୁଭବ କରୁ ନ ଥିବା ମଣିଷଙ୍କ କଥା ଏଥିରେ ଅଛି ।
ତେବେ ଟିଭି ପରଦାରେ ଏହି ଚରିତ୍ରମାନଙ୍କୁ ଦେଖାଇ ସେମାନଙ୍କ ଉପରେ ଘଣ୍ଟା ଘଣ୍ଟା ଧରି ତର୍କ ବିତର୍କ ଆଲୋଚନା କରିବା ଦ୍ୱାରା ସମାଜର କି ଲାଭ ହେଉଛି ବୋଲି ସୋସିଆଲ୍ ମିଡ଼ିଆରେ ଅନେକ ପ୍ରଶ୍ନ କରିଛନ୍ତି । ବରଂ ଏହାଦ୍ୱାରା ସମାଜର କ୍ଷତି ହେବା ସାଙ୍ଗକୁ ଗୋଟେ ଗୋଟେ ପରିବାର ଅଧିକ ନଷ୍ଟ ହୋଇଯାଉଛି । ସମାଜରେ ସଂପୃକ୍ତ ପରିବାରର ପ୍ରତିଷ୍ଠା ଆହୁରି କ୍ଷୁର୍ଣ୍ଣ ହେଉଛି ବୋଲି କହିଛନ୍ତି ।
ଅବଶ୍ୟ ଟିଆରପି ଏବଂ ୟୁଟ୍ୟୁବ୍ ଚାନେଲ୍ ରୁ ମୋଟା ରୋଜଗାର ପାଇଁ ଏଭଳି ସନସନି ଖବରର ମହତ୍ତ୍ୱ ରହିଥିବା ସମସ୍ତେ ଜାଣିଛନ୍ତି । ମାତ୍ର ସାମ୍ବାଦିକତାର ଧର୍ମକୁ ଜଳାଞ୍ଜଳି ନ ଦେଇ ତାହା ସୀମା ଭିତରେ ରହିବା ଉଚିତ୍ ବୋଲି ଅନେକ ପରାମର୍ଶ ଦେଇଛନ୍ତି । ଲୋକଙ୍କ ସାମୁହିକ ସମସ୍ୟା ଜଡ଼ିତ ଖବରକୁ ଗୁରୁତ୍ୱହୀନ କରି କାହାର ବ୍ୟକ୍ତିଗତ ଜୀବନର ଶସ୍ତା ଖବରକୁ ଲୋକଙ୍କ ସାମନାରେ ଗୁରୁତ୍ୱପୂର୍ଣ୍ଣ ଢ଼ଙ୍ଗରେ ଉପସ୍ଥାପନ କରାଇବାକୁ ସେମାନେ କଠୋର ସମାଲୋଚନା କରିଛନ୍ତି । ଅନ୍ୟପକ୍ଷରେ ଏଭଳି ଖବର ପ୍ରତି ଦର୍ଶକଙ୍କର ଡିମାଣ୍ଡ ଅଧିକ ହୋଇଥିବାରୁ ଚାନେଲ୍ କର୍ତ୍ତୃପକ୍ଷ ନାଚାର ବୋଲି ମଧ୍ୟ କିଛି ଯୁକ୍ତି କରୁଛନ୍ତି ।
ସୂଚନାଥାଉକି, ଟିଭି ଏବଂ ୱେବ୍ ଚାନେଲ୍ ରେ ଶସ୍ତା ଖବରର ଆଦର ବଢ଼ିଯାଇଛି । ବ୍ରହ୍ମପୁରର ତପସ୍ୱିନୀ-ସୁମିତ୍ ଦାମ୍ପତ୍ତି କଳି ଘଟଣାଠାରୁ ଏହି ଟ୍ରେଣ୍ଡ ବେଶୀ ହୋଇଛି । ନିକଟରେ ଟୁଙ୍ଗୁରୁ ଭୋଳ ଏବଂ ବର୍ଷା ପ୍ରେମ କଳି ଭଳି ଅତି ଶସ୍ତା ଖବର ସୋସିଆଲ୍ ମିଡ଼ିଆରେ ଖୁବ୍ ଜୋର୍ ରେ ଚାଲିଥିଲା । କିଛିଦିନ ସେମାନେ ସେଲିବ୍ରିଟ୍ ପାଲଟିଗଲେ ।
