ଭୁବନେଶ୍ୱର: ଓଡ଼ିଆ ଅସ୍ମିତା ଦ୍ୱାହିରେ ଓଡ଼ିଆ ଜାତିର ପ୍ରାଣକେନ୍ଦ୍ର ରେଭେନ୍ସା କଲେଜର ନାଁ ବଦଳିଯିବ? କେନ୍ଦ୍ର ଶିକ୍ଷାମନ୍ତ୍ରୀ ଆମ ଓଡ଼ିଆ ପୁଅ ଧର୍ମେନ୍ଦ୍ର ପ୍ରଧାନଙ୍କ ମୁହଁରୁ ଏଭଳି ଇସାରା ଓଡ଼ିଶାବାସୀଙ୍କ ମନରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି । ଆଜି କଟକରେ ନେତାଜୀ ସ୍ମାରକୀ ଉଦଘାଟନ ଅବସରରେ ଧର୍ମେନ୍ଦ୍ର କହିଛନ୍ତି ରେଭେନ୍ସା ନାଁ ବଦଳିବା ନେଇ ବିତର୍କ ହେବା ଦରକାର । କାରଣ ରେଭେନ୍ସା ସାହେବଙ୍କ ସମୟରେ ଓଡ଼ିଶାରେ ନଅଙ୍କ ଦୁର୍ଭିକ୍ଷ ହୋଇଥିଲା । ସେ ଓଡ଼ିଶା ପାଇଁ ଗୌରବର ବିଷୟ ନୁହଁନ୍ତି । ଏହା ତାଙ୍କର ବ୍ୟକ୍ତିଗତ ମତ ବୋଲି ସେ କହିଛନ୍ତି ।
ଧର୍ମେନ୍ଦ୍ରଙ୍କ ମନ୍ତବ୍ୟକୁ ସରଳ ଭାଷାରେ ବୁଝିଲେ, ବ୍ୟକ୍ତିଗତ ଭାବେ ରେଭେନ୍ସାର ନାଁ ବଦଳିବା ସେ ଚାହୁଁଛନ୍ତି । ଏଥିପାଇଁ ବିତର୍କର ଆବଶ୍ୟକତା ଅଛି ବୋଲି କେବଳ ଚତୁର ଭାଷା ବ୍ୟବହାର କରିଛନ୍ତି । ତାଙ୍କର ମତ ବ୍ୟକ୍ତିଗତ ବୋଲି କହିଥିଲେ ମଧ୍ୟ ଯେହେତୁ କେନ୍ଦ୍ରରେ ମୋଦୀ ସରକାରର ସେ ଶିକ୍ଷାମନ୍ତ୍ରୀ ଏବଂ ଓଡ଼ିଶାରେ ତାଙ୍କର ଡବଲ ଇଞ୍ଜିନ୍ ସରକାର ଚାଲିଛି ତେଣୁ ସ୍ୱାଭାବିକ ଭାବେ ତାଙ୍କର ମନ୍ତବ୍ୟ ସମସ୍ତଙ୍କ ମନରେ ଛନକା ପଶେଇ ଦେଇଛି ।
ଗଣମାଧ୍ୟମରେ ତାଙ୍କର ମନ୍ତବ୍ୟ ଆସିବା ପରେ ରେଭେନ୍ସା ନାଁ ବଦଳିବା ଉଦ୍ୟମ ଏକ ଅବାସ୍ତବ ଓ ଉଦ୍ଭଟ ଚିନ୍ତାଧାରା କହି ଅନେକ ସମାଲୋଚନା କରିଛନ୍ତି । ଏଥିପାଇଁ ଆଦୌ ବିତର୍କର ଆବଶ୍ୟକତା ହିଁ ନାହିଁ ବୋଲି ଦଳମତ ନିର୍ବିଶେଷରେ ସାଧାରଣ ନାଗରିକ ଏବଂ ବୁଦ୍ଧିଜୀବୀ ମହଲରୁ ପ୍ରତିକ୍ରିୟା ଆସିଛି । ରେଭେନ୍ସା ଆମ ଓଡ଼ିଶା ଏବଂ ଜାତିର ଗର୍ବ ଏବଂ ଗୌରବ ବୋଲି ସମସ୍ତଙ୍କର ମତ । ରେଭେନ୍ସା ନାଁ ବଦଳିବା ଚିନ୍ତାଧାରାକୁ ସେମାନେ କଡ଼ା ବିରୋଧ କରି ପ୍ରତିକ୍ରିୟାବ୍ୟକ୍ତ କରିଛନ୍ତି ।
ଏହାକୁ ଅବାସ୍ତବ କହି ସମାଲୋଚନା କରିଛନ୍ତି ପ୍ରଫେସର ହେମେନ୍ଦ୍ର ନାରାୟଣ ଦାସ । ରେଭେନ୍ସା କେବଳ ଏକ ନାମ ନୁହେଁ, ଏହା ଆମ ଜୀବନର ଧାରା ବୋଲି ସେ କହିଛନ୍ତି । ରେଭେନ୍ସାର ପୂର୍ବତନ ପ୍ରଫେସର ଓ ଛାତ୍ରମାନେ ଏହାକୁ ହୀନମନ୍ୟତା କହି କଡ଼ା ଭାଷାରେ ନିନ୍ଦା କରିଛନ୍ତି ।
ସୋସିଆଲ୍ ମିଡିଆରେ ଏହାକୁ ନେଇ ଭଳିକି ଭଳି ପ୍ରତିକ୍ରିୟା ଦେଖିବାକୁ ମିଳିଛି । ରେଭେନ୍ସା ନାମ ସହ ଯୋଡି ହୋଇ ରହିଛି ଭାବ ଓ ଭଲ ପାଇବା ବୋଲି ଅନେକ ଲେଖିଛନ୍ତି । ରେଭେନ୍ସା ବିରୁଡ଼ି ବସା । ହାତ ମାରିଦେଲେ ଅବସ୍ଥା ବେହାଲ ହେବ ବୋଲି ଜଣେ ଲେଖିଛନ୍ତି । ରେଭେନ୍ସା ନାଁ ବଦଳାଇବାକୁ ଉଦ୍ୟମ କରାଗଲେ ଓଡ଼ିଆରେ ନିଆଁ ଜଳିବ ବୋଲି ଅନେକ ଚେତାବନୀ ଦେଇଛନ୍ତି ।
ରେଭେନ୍ସା ସାହେବଙ୍କ ସମୟରେ ଓଡ଼ିଶାରେ ନଅଙ୍କ ଦୁର୍ଭିକ୍ଷ ହୋଇଥିଲା । ତେଣୁ ସେ ଓଡ଼ିଶା ପାଇଁ ଗୌରବର ବିଷୟ ନୁହଁନ୍ତି ବୋଲି ଧର୍ମେନ୍ଦ୍ରଙ୍କ ମନ୍ତବ୍ୟକୁ ଭୁଲ୍ ଦର୍ଶାଇ କିଛି ବୁଦ୍ଧିଜୀବୀ ଇତିହାସ ପୃଷ୍ଠା ଖୋଲିଛନ୍ତି । ଗୋଟିଏ ପୃଷ୍ଠାରେ ‘ଇଂରେଜମାନଙ୍କ ଜନହିତକର କାର୍ଯ୍ୟ’ ଶୀର୍ଷକରେ ଲେଖାଅଛି-
ଓଡ଼ିଶାରେ ନ’ଙ୍କ ଦୁର୍ଭିକ୍ଷ ପରେ ଇଂରାଜୀମାନେ ଅନେକ ଜନକଲ୍ୟାଣକାରୀ ଯୋଜନା ପ୍ରସ୍ତୁତ କରିଥିଲେ । କମିସନର ଟି.ଇ. ରେଭେନ୍ସା ଓଡ଼ିଶାର ଉନ୍ନତି ପାଇଁ ବହୁ କାର୍ଯ୍ୟକ୍ରମ ନିଜ ହାତକୁ ନେଇଥିଲେ । ସେ ଆଳି ଓ ବାଙ୍କୀଠାରେ ନୂତନ ବନ୍ଧନିର୍ମାଣ ତଥା ପୁରୁଣାବନ୍ଧର ମରାମତି କରାଇଥିଲେ । ତା’ ବ୍ୟତୀତ ବାଣିଜ୍ୟର ଉନ୍ନତି ପାଇଁ ଓଡ଼ିଶା ଭାରତର ଅନ୍ୟ ପ୍ରଦେଶ ସହିତ ପକ୍କା ପିଚୁ ରାସ୍ତା ଦ୍ୱାରା ସଂଯୋଜିତ ହୋଇଥିଲା । ଭୌଗୋଳିକ ଅବରୋଧରୁ ମୁକ୍ତ କରି ଏହା ଓଡ଼ିଶାବାସୀଙ୍କୁ ଆଧୁନିକ ସଭ୍ୟତା ସହିତ ପରିଚିତ କରାଇ ପାରିଥିଲା ଏବଂ ସେମାନଙ୍କ ମନରେ ଜାତୀୟ ଚେତନା ସୃଷ୍ଟି କରିବାରେ ସହାୟକ ହୋଇଥିଲା ।
