ଭୁୁବନେଶ୍ୱର: ଏବର୍ଷ କରୋନା କଟକଣା ପାଇଁ ରଥଯାତ୍ରା ଦେଖିବାକୁ ପୁରୀ ନ ଯାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟିଭି ପରଦାରେ ଦେଖିଥିଲେ ରଥଯାତ୍ରାର ସିଧା ପ୍ରସାରଣ । ପୂର୍ବାହ୍ନରେ ମୁଖ୍ୟମନ୍ତ୍ରୀ ଲୋକସେବା ଭବନ ନିଜ ଚାମ୍ବରରେ ପଶୁ ପଶୁ ଟିଭି ସାମନାରେ ଛିଡ଼ା ହୋଇ ମହାପ୍ରଭୁଙ୍କୁ ଆଗ ହାତଯୋଡି ମୁଣ୍ଡିଆ ମାରିଥିଲେ । ତାପରେ ନିଜ ଆସନରେ ବସି ରଥଯାତ୍ରାର ସିଧା ପ୍ରସାରଣ ଦେଖିଥିଲେ । ମୁଖ୍ୟମନ୍ତ୍ରୀଙ୍କ ପାଖରେ ବସି ରଥଯାତ୍ରା ଦେଖିଥିଲେ ତାଙ୍କ ସଚିବ(୫-ଟି) ଭି.କେ.ପାଣ୍ଡିଆନ୍ ।
ପରେ ମୁଖ୍ୟମନ୍ତ୍ରୀ ଟ୍ୱିଟ୍ ଜରିଆରେ ନିଜର ଭାବବ୍ୟକ୍ତ କରିଛନ୍ତି । ମୁଖ୍ୟମନ୍ତ୍ରୀ ଲେଖିଛନ୍ତି, ‘ରଥରେ ମହାପ୍ରଭୁଙ୍କୁ ଦେଖି ମନ ବିଭୋର ହୋଇଯାଉଛି । ରଥ ଉପରେ ମହାପ୍ରଭୁଙ୍କ ଅପୂର୍ବ ଶୋଭା ହୃଦୟକୁ ଭକ୍ତିଭାବରେ ରସାଣିତ କରୁଛି । ମହାପ୍ରଭୁ ଆମ ସମସ୍ତଙ୍କର ଗୁହାରି ନିଶ୍ଚିତ ଶୁଣିବେ । ଏ କଠିନ ସମୟ ଶୀଘ୍ର ଦୂର ହେବ ଏବଂ ସମସ୍ତଙ୍କର ମଙ୍ଗଳ ହେବ । ସବୁ ମହାପ୍ରଭୁଙ୍କ ଇଚ୍ଛା ।’
