ଭୁବନେଶ୍ୱର: ବିଶ୍ୱବିଖ୍ୟାତ ତବଲା ବାଦକ ଉସ୍ତାଦ ଜାକିର ହୁସେନ ଆଉ ନାହାନ୍ତି । ହୃଦରୋଗରେ ପୀଡ଼ିତ ହୋଇ ଆମେରିକାର ସାନ ଫ୍ରାନସିସକୋର ଏକ ହସ୍ପିଟାଲ୍ ରେ ଆଖି ବୁଜି ଦେଇଛନ୍ତି । ତାଙ୍କୁ ୭୩ ବର୍ଷ ହୋଇଥିଲା । ଜାକିର ହୁସେନଙ୍କ ପରଲୋକରେ ସମଗ୍ର ଦେଶରେ ଶୋକର ଛାୟା ଖେଳିଯାଇଛି । ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ସବୁ ବର୍ଗର ବିଶିଷ୍ଟ ବ୍ୟକ୍ତିମାନେ ଗଭୀର ଶୋକ ପ୍ରକାଶ କରିଛନ୍ତି ।
ହୃଦଜନିତ ସମସ୍ୟା ଯୋଗୁଁ ତିନି ଦିନ ତଳେ ସାନ ଫ୍ରାସସିସକୋର ଏକ ହସ୍ପିଟାଲ୍ ରେ ଭର୍ତ୍ତି ହୋଇଥିଲେ ଜାକିର ହୁସେନ । ମାତ୍ର ଡାକ୍ତରମାନଙ୍କ ସମସ୍ତ ଚେଷ୍ଟା ସତ୍ତ୍ୱେ ତାଙ୍କୁ ବଞ୍ଚାଇ ପାରିନାହାନ୍ତି । ଆଖି ବୁଜି ଦେଇଛନ୍ତି ସଙ୍ଗୀତ ଜଗତର ଏହି ମହାନ ବ୍ୟକ୍ତିତ୍ୱ ।
ମୁମ୍ବାଇରେ ଜନ୍ମଗ୍ରହଣ କରିଥିଲେ ଜାକିର ହୁସେନ । ତାଙ୍କ ପିତା ଉସ୍ତାଦ୍ ଆଲ୍ଲା ରାଖା ମଧ୍ୟ ଜଣେ ପ୍ରସିଦ୍ଧ ତବଲା ବାଦକ ଥିଲେ । ପିତାଙ୍କୁ ଦେଖି ଜାକିର ହୁସେନ ଖୁବ କମ ବୟସରେ ତବଲା ଶିଖିବା ଆରମ୍ଭ କରିଥିଲେ । ତାଙ୍କ ପିତା ହିଁ ଥିଲେ ତାଙ୍କର ପ୍ରଥମ ଗୁରୁ । ୧୧ ବର୍ଷ ବୟସରେ ସେ ପିତାଙ୍କଠାରୁ ତବଲା ତାଲିମ ନେଇଥିଲେ । ପରବର୍ତ୍ତୀ ସମୟରେ ବିଶ୍ୱ ଦରବାରରେ ସେ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ । ତବଲା ଜଗତର ସେ ବନିଥିଲେ ବାଦଶାହା ।
ଶାସ୍ତ୍ରୀୟ ସଙ୍ଗୀତ ଜଗତକୁ ତାଙ୍କର ଅତୁଳନୀୟ ଅବଦାନ ପାଇଁ ୩ ଥର ଗ୍ରାମି ପୁରସ୍କାର ପାଇଥିଲେ । ୧୯୮୮ ରେ ପଦ୍ମଶ୍ରୀ, ୨୦୦୨ରେ ପଦ୍ମ ବିଭୂଷଣ ସମ୍ମାନ ପାଇଥିଲେ । ୧୯୯୯ ମସିହାରେ ତାଙ୍କୁ ଆମେରିକାର ନ୍ୟାସନାଲ୍ ଆଣ୍ଡୋମେଣ୍ଟ ଫର୍ ଦି ଆର୍ଟ ପକ୍ଷରୁ ନ୍ୟାସନାଲ୍ ହେରିଟେଜ୍ ଫେଲୋସିପ୍ ପ୍ରଦାନ କରାଯାଇଥିଲା ।
