ଭୁବନେଶ୍ୱର: ଭେଟେରାନ୍ ମିହିର ଦାସ ଆଉ ଇହଜଗତରେ ନାହାନ୍ତି । ଓଡ଼ିଆ ସିନେ ଜଗତର ଏହି ପ୍ରଖ୍ୟାତ କଳାକାର ଦୀର୍ଘ ଦିନ ଧରି ମୃତ୍ୟୁ ସହ ସଂଗ୍ରାମ କରି ହାରି ଯାଇଛନ୍ତି । ଆଜି ଅପରାହ୍ନରେ କଟକର ଏକ ଘରୋଇ ହସପିଟାଲ୍ ରେ ତାଙ୍କର ପରଲୋକ ହୋଇଛି । ମୃତ୍ୟୁ ବେଳକୁ ତାଙ୍କୁ ୬୩ ବର୍ଷ ହୋଇଥିଲା । ତାଙ୍କ ମୃତ୍ୟୁ ଖବର ଓଡ଼ିଆ ସିନେ ଜଗତରେ ଶୋକର ଛାୟା ଖେଳାଇ ଦେଇଛି । ରାଜ୍ୟପାଳ, ମୁଖ୍ୟମନ୍ତ୍ରୀ, କେନ୍ଦ୍ରମନ୍ତ୍ରୀଙ୍କଠାରୁ ଆରମ୍ଭ କରି ସବୁ ବର୍ଗର ବିଶିଷ୍ଟ ବ୍ୟକ୍ତିମାନେ ଗଭୀର ଶୋକ ପ୍ରକାଶ କରିଛନ୍ତି । ଆସନ୍ତାକାଲି ତାଙ୍କର ଶେଷକୃତ୍ୟ ସମ୍ପନ୍ନ ହେବ ।
କିଡ଼ନୀ ଏବଂ ଅନ୍ୟାନ୍ୟ ରୋଗରେ ପୀଡ଼ିତ ଶ୍ରୀ ଦାସଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ଗତ ଡିସେମ୍ବର ୮ ତାରିଖ ଦିନ ହସ୍ପିଟାଲ୍ ରେ ଭର୍ତ୍ତି ହୋଇଥିଲେ । ତାଙ୍କର କିଡ଼ନୀ ଅକାମୀ ହୋଇଯିବା ସହ ମଲଟି ଅର୍ଗାନ୍ କାମ କରିବା ଏକପ୍ରକାର ବନ୍ଦ ହୋଇଯାଇଥିଲା । ସଙ୍କଟାପନ୍ନ ଅବସ୍ଥାରେ ତାଙ୍କୁ ଭେଣ୍ଟିଲେଟରରେ ରଖାଯାଇ ଚିକିତ୍ସା କରାଯାଉଥିଲା । ତେବେ ଦିନକୁ ଦିନ ତାଙ୍କ ଅବସ୍ଥା ଆହୁରି ଜଟିଳ ହୋଇଯାଇଥିଲା । ଡାକ୍ତରମାନେ ତାଙ୍କୁ ବଞ୍ଚାଇବାକୁ ପ୍ରବଳ ଉଦ୍ୟମ କରିଥିଲେ ମଧ୍ୟ ସେଥିରେ ସଫଳ ହୋଇନାହାନ୍ତି । ଆଜି(ମଙ୍ଗଳବାର) ଅପରାହ୍ନ ୩.୨୫ ମିନିଟ୍ ରେ ଶ୍ରୀ ଦାସ ଆଖି ବୁଜିଦେଇଥିଲେ । ମୃତ୍ୟୁ ବେଳକୁ ପାଖରେ ପୁଅ ଅମ୍ଲାନ ଉପସ୍ଥିତ ଥିଲେ ।
୧୯୫୯ ଫେବ୍ରୁଆରୀ ୧୧ ତାରିଖରେ ବାରିପଦାରେ ଜନ୍ମଗ୍ରହଣ କରିଥିଲେ ମିହିର ଦାସ । ପିଲାଦିନକୁ ଅଭିନୟ ପ୍ରତି ତାଙ୍କର ପ୍ରବଳ ଦୁର୍ବଳତା ଥିଲା । ପରବର୍ତ୍ତୀ ସମୟରେ ଅଭିନୟକୁ ପେଶା କରିଥିଲେ ସେ । ତାଙ୍କର ପ୍ରଥମ ଅଭିନୀତ ଫିଲ୍ମ ଥିଲା ‘ସ୍କୁଲ ମାଷ୍ଟର’ । ତାହା ଏକ ଆର୍ଟ ଫିଲ୍ମ ଥିଲା । ୧୯୭୯ ମସିହାରେ ରିଲିଜ୍ ହୋଇଥିବା ‘ମଥୁରା ବିଜୟ’ ତାଙ୍କର ପ୍ରଥମ ବ୍ୟବସାୟିକ ଫିଲ୍ମ ଥିଲା । ଆଉ ଏହି ଫିଲ୍ମରେ ତାଙ୍କର ଚମତ୍କାର ଅଭିନୟ ତାଙ୍କୁ ରାତାରାତି ପ୍ରସିଦ୍ଧି ଆଣି ଦେଇଥିଲା । ତା’ ପରଠାରୁ ସେ ଆଉ ପଛକୁ ଚାହିଁନାହାନ୍ତି । ତାଙ୍କର ଅଧିକାଂଶ ଫିଲ୍ମ ହିଟ୍ ମାନ୍ୟତା ପାଇଛି ।
୧୯୯୮ ରେ ‘ଲକ୍ଷ୍ମୀ ପ୍ରତିମା’ ଏବଂ ୨୦୦୫ ରେ ‘ଫେରିଆ ମୋ ସୁନା ଭଉଣୀ’ ଫିଲ୍ମ ପାଇଁ ତାଙ୍କୁ ଶ୍ରେଷ୍ଠ ଅଭିନେତା ଭାବେ ରାଜ୍ୟ ଚଳଚିତ୍ର ପୁରସ୍କାର ମିଳିଥିଲା । ୨୦୦୨ ରେ ‘ରାଖି ବାନ୍ଧିଲି ମୋ ରଖିବ ମାନ’ ଏବଂ ୨୦୧୦ ରେ ‘ପ୍ରେମ ଅଢ଼େଇ ଅକ୍ଷର’ ପାଇଁ ତାଙ୍କୁ ଶ୍ରେଷ୍ଠ ପାଶ୍ୱର୍ ଅଭିନେତା ଭାବେ ରାଜ୍ୟ ଚଳଚିତ୍ର ପୁରସ୍କାର ମିଳିଥିଲା । ‘ପୁଅ ମୋର ଭୋଳାଶଙ୍କର’ ଫିଲ୍ମରେ ତାଙ୍କର ବଳିଷ୍ଠ ଅଭିନୟ ପାଇଁ ସେ ସମସ୍ତଙ୍କର ବେଶୀ ଦୃଷ୍ଟି ଆକର୍ଷଣ ହୋଇଥିଲେ ।
ମିହିର ଦାସଙ୍କ ବିୟୋଗରେ ରାଜ୍ୟପାଳ ପ୍ରଫେସର ଗଣେଶୀ ଲାଲ ଗଭୀର ଶୋକ ପ୍ରକଟ କରିବା ସହିତ ତାଙ୍କର ଶୋକସନ୍ତପ୍ତ ପରିବାରବର୍ଗଙ୍କୁ ସାନ୍ତ୍ୱନା ଜଣାଇଛନ୍ତି । ସ୍ୱର୍ଗତ ଦାସ ଜଣେ ଶୀର୍ଷସ୍ତରର କଳାକାର ଭାବେ ନିଜର ଅନନ୍ୟ ଅଭିନୟ କଳା ପାଇଁ ସବୁରି ହୃଦୟରେ ରହିବେ ବୋଲି ରାଜ୍ୟପାଳ କହିଛନ୍ତି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ଶୋକବାର୍ତ୍ତାରେ କହିଛନ୍ତି, ବର୍ଷୀୟାନ ଅଭିନେତା ମିହିର ଦାସଙ୍କ ଦେହାନ୍ତ ବିଷୟରେ ଜାଣି ମୁଁ ଦୁଃଖିତ । ଓଡ଼ିଆ କଳା ଜଗତରେ ସେ ଛାଡ଼ିଯାଇଥିବା ଅଭିନୟର ଛାପ ତାଙ୍କୁ ସର୍ବଦା ଅମର କରି ରଖିବ । ତାଙ୍କ ବିୟୋଗ ଓଡ଼ିଆ କଳାଜଗତ ପାଇଁ ଏକ ଅପୂରଣୀୟ କ୍ଷତି । ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ମୋର ସମବେଦନା ଜଣାଉଛି ।
