ଭୁବନେଶ୍ୱର: ଓଡ଼ିଶା ସାମ୍ବାଦିକ ଜଗତରେ ସମସ୍ତଙ୍କର ଅତି ପ୍ରିୟ ‘ରତି ଭାଇ’ ଆଉ ଇହ ଜଗତରେ ନାହାନ୍ତି । ଏହି ବରିଷ୍ଠ ତଥା ଲୋକପ୍ରିୟ ସାମ୍ବାଦିକ ରତିକାନ୍ତ ମହାନ୍ତିଙ୍କର ୭୦ ବର୍ଷରେ ଆଜି ପରଲୋକ ହୋଇଯାଇଛି । ପତ୍ନୀ ସିପ୍ରା ମହାନ୍ତି ଏବଂ ଦୁଇ ଝିଅଙ୍କୁ ଛାଡ଼ି ସେ ଦୁନିଆରୁ ବିଦାୟ ନେଇଛନ୍ତି । କିଛି ବର୍ଷ ହେଲା ସେ ଅସୁସ୍ଥ ଥିଲେ । ଏକ ଘରୋଇ ହସ୍ପିଟାଲ୍ ରେ ଚିକିତ୍ସାଧୀନ ଅବସ୍ଥାରେ ଆଜି ସକାଳେ ତାଙ୍କର ମୃତ୍ୟୁ ହୋଇଥିଲା । ତାଙ୍କ ବିୟୋଗ ସାମ୍ବାଦିକ ମହଲରେ ଶୋକର ଛାୟା ଖେଳାଇ ଦେଇଛି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବିରୋଧୀ ଦଳ ନେତା ନବୀନ ପଟ୍ଟନାୟକ ପ୍ରମୁଖ ଗଭୀର ଶୋକ ପ୍ରକାଶ କରିବା ସହ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି ।
ଅତି ସରଳ, ସ୍ନେହୀ, ଭଦ୍ର ଏବଂ ମାର୍ଜିତ ସ୍ୱଭାବର ରତିକାନ୍ତ ମହାନ୍ତି ଦୈନିକ ଖବରକାଗଜ ଦିନଲିପି ରେ ଜଣେ ସାମ୍ବାଦିକ ଭାବେ କ୍ୟାରିୟର୍ ଆରମ୍ଭ କରିଥିଲେ । ଦକ୍ଷତା, ନୈତିକତା ଏବଂ ନିର୍ଭିକତା ପାଇଁ ଖୁବ କମ ଦିନରେ ନିଜକୁ ପ୍ରତିଷ୍ଠିତ କରିଥିଲେ । ଖବରର ଗଭୀରତାକୁ ଯାଇ ସୂକ୍ଷ୍ମ ଅନୁଶୀଳନରେ ତାଙ୍କର ସ୍ୱତନ୍ତ୍ର ପରିଚୟ ହୋଇଥିଲା । ପରବର୍ତ୍ତୀ ସମୟରେ ସେ ଦୈନିକ ଖବରକାଗଜ ପର୍ଯ୍ୟବେକ୍ଷକ ରେ ଯୋଗଦେଇଥିଲେ । ତାଙ୍କ ଖବରଗୁଡ଼ିକରେ ସମାଜରେ ଅବହେଳିତ ବର୍ଗର ସ୍ୱରକୁ ସେ ଅତି ନିଖୁଣ ଭାବରେ ଉପସ୍ଥାପନ କରୁଥିଲେ । ଉଭୟ ରାଜନୀତି ଏବଂ ସାମାଜିକ କ୍ଷେତ୍ରର ତାଙ୍କର ବିଚକ୍ଷଣ ଦଖଲ ଥିଲା । ଏହି ଯାତ୍ରାରେ ସେ ଇଂରାଜୀ ଖବରକାଗଜ ଦ ଏସିଆନ୍ ଏଜ୍ ରେ ଯୋଗ ଦେଇ ଜାତୀୟ ସ୍ତରରେ ମଧ୍ୟ ଖ୍ୟାତି ଅର୍ଜନ କରିଥିଲେ । କ୍ୟାରିଅରର ଶେଷ ପର୍ଯ୍ୟାୟରେ ହିନ୍ଦୁସ୍ଥାନ ସମାଚାର ସହ ସେ ଜଡ଼ିତ ରହି ନିଜର ଉତ୍କର୍ଷତା ପ୍ରଦର୍ଶନ କରିଥିଲେ ।
ସେ କେବଳ ଯେ ଜଣେ ଭଲ, ନିର୍ଭିକ, ସଚ୍ଚୋଟ ଏବଂ ଉଚ୍ଚକୋଟିର ସାମ୍ବାଦିକ ଥିଲେ, ତାହା ନୁହେଁ । ନିଜର ଆଚାର ବ୍ୟବହାର ଏବଂ ସ୍ନେହବୋଳା କଥାରେ ସମସ୍ତଙ୍କୁ ଆପଣାର କରିପାରୁଥିବା ଜଣେ ଭଲ ମଣିଷ ଥିଲେ । କାହାର ଦୁଃଖ କି ଅନ୍ୟାୟ ଅତ୍ୟାଚାରକୁ ସେ ସହିପାରୁ ନ ଥିଲେ । ସାମ୍ବାଦିକ ଭାବେ ତାଙ୍କ ମନରେ ବଡ଼ ସାନ ଭେଦଭାବ ନ ଥିଲା । ଯୁବ ସାମ୍ବାଦିକଙ୍କ ସହ ସେ ସାଙ୍ଗ ଭଳି ବ୍ୟବହାର କରୁଥିଲେ ଏବଂ ସମସ୍ତଙ୍କୁ ସ୍ନେହ ଓ ସମ୍ମାନ ଦେଉଥିଲେ । ଗୋଟିଏ ବଡ଼ ଖବରକୁ ଅତି ସରଳ ଓ ସାବଲୀଳ ଭାବେ କେମିତି ଲେଖିବାକୁ ହୁଏ ତାହା ବୁଝାଇ ଦେଉଥିଲେ । ତାଙ୍କର ପରାମର୍ଶ ସମସ୍ତଙ୍କ ପାଇଁ ମୂଲ୍ୟବାନ ଥିଲା । ସବୁ ବର୍ଗର ସାମ୍ବାଦିକମାନଙ୍କ ପାଇଁ ସେ ଥିଲେ ଗାଇଡ୍ । ବିଧାନସଭା ରିପୋର୍ଟିଂ ବେଳେ ସେ ଯୁବ ସାମ୍ବାଦିକମାନଙ୍କର ଦ୍ୱନ୍ଦ ଦୂର କରୁଥିଲେ ।
ରତିକାନ୍ତ ମହାନ୍ତିଙ୍କ ମୃତ୍ୟୁ ଓଡ଼ିଶା ସାମ୍ବାଦିକ ଜଗତ ପାଇଁ ଏକ ଅପୂରଣୀୟ କ୍ଷତି ଆଣିଛି । ତାଙ୍କ ବିୟୋଗ ସାମ୍ବାଦିକମାନଙ୍କୁ ଦାରୁଣ ଦୁଃଖ ଦେଇଛି । ୟୁନିଟ୍-୩ ସ୍ଥିତ ବାସଭବନରେ ତାଙ୍କର ଶେଷ ଦର୍ଶନ ପାଇଁ ପ୍ରବଳ ଭିଡ଼ ହୋଇଥିଲା ।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କ ଶୋକବାର୍ତ୍ତାରେ କହିଛନ୍ତି ଯେ ବରିଷ୍ଠ ସାମ୍ବାଦିକ ରତିକାନ୍ତ ମହାନ୍ତିଙ୍କ ଦେହାନ୍ତ ଖବର ଶୁଣି ମୁଁ ଦୁଃଖିତ ଓ ମର୍ମାହତ । ରତି ଭାଇ ଭାବରେ ରାଜ୍ୟର ସାମାଜିକ ଓ ରାଜନୈତିକ କ୍ଷେତ୍ରରେ ସେ ବେଶ୍ ଜଣାଶୁଣା ଥିଲେ । ତାଙ୍କର ଦୀର୍ଘ ସାମ୍ବାଦିକତା ଜୀବନରେ ସଚ୍ଚୋଟତା, ନିରପେକ୍ଷତା ଓ କର୍ତ୍ତବ୍ୟନିଷ୍ଠା ପାଇଁ ସ୍ମରଣୀୟ ରହିବେ । ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକ ସନ୍ତପ୍ତ ପରିବାର ବର୍ଗଙ୍କୁ ସମବେଦନା ଜ୍ଞାପନ କରୁଛି ।
ବିରୋଧୀ ଦଳ ନେତା ନବୀନ ପଟ୍ଟନାୟକ ତାଙ୍କ ଶୋକବାର୍ତ୍ତାରେ କହିଛନ୍ତି, ସ୍ୱଗତ ମହାନ୍ତି ତାଙ୍କର ବୃତ୍ତିସହ ସମ୍ପୂର୍ଣ୍ଣ ଭାବେ ଉତ୍ସର୍ଗୀକୃତ ଥିଲେ । ସାମ୍ବାଦିକତା କ୍ଷେତ୍ରରେ ତାଙ୍କର ଦକ୍ଷତା ଓ ନିଷ୍ଠା ଅତୁଳନୀୟ ଥିଲା । ତାଙ୍କର ବିୟୋଗରେ ଆମେ ଜଣେ ଆଦର୍ଶ ସାମ୍ବାଦିକ ଓ ଭଲ ମଣିଷଙ୍କୁ ହରାଇଲୁ । ତାଙ୍କର ଶୋକସନ୍ତପ୍ତ ପରିବାରବର୍ଗଙ୍କୁ ଗଭୀର ସମବେଦନା ଜଣାଇବା ସହ ପରଲୋକଗତ ଆତ୍ମାର ସଦଗତି କାମନା କରୁଛି ।
