ନବୀନ ପୁଣି ବିଜେଡି ସଭାପତି

ଭୁୁବନେଶ୍ୱର: କ୍ରମାଗତ ନବମ ଥର ପାଇଁ ବିଜୁ ଜନତା ଦଳର ସଭାପତି ଭାବେ ନିର୍ବାଚିତ ହୋଇଛନ୍ତି ନବୀନ ପଟ୍ଟନାୟକ । ଏହି ପଦ ଲାଗି ସେ ଏକକୀ ନାମାଙ୍କନପତ୍ର ଦାଖଲ କରିଥିଲେ । ଆଜି ଦଳର କାଉନସିଲ୍ ମିଟିଂ ରେ ଆନୁଷ୍ଠାନିକ ଭାବେ ତାଙ୍କୁ ସଭାପତି ଘୋଷଣା କରିଛନ୍ତି ନିର୍ବାଚନ ଅଧିକାରୀ ପ୍ରତାପ ଦେବ । ପୁଣି ଥରେ ସଭାପତି ଦାୟିତ୍ୱ ଗ୍ରହଣ ଅବସରରେ ନବୀନ ଦଳୀୟ ନେତା ଓ କର୍ମୀମାନଙ୍କୁ ଉଦବୋଧନ ଦେଇ ସେମାନଙ୍କ ମନୋବଳ ବଢ଼ାଇବାକୁ ଉଦ୍ୟମ କରିଥିଲେ ।

ବିଜେଡିର ସଭାପତି ଭାବରେ ଦଳର ସେବା କରିବା ପାଇଁ ସୁଯୋଗ ପାଇଥିବାରୁ ସମସ୍ତଙ୍କୁ ଧନ୍ୟବାଦ ଜଣାଇ ନବୀନ କହିଥିଲେ-

ଓଡ଼ିଶାବାସୀଙ୍କ ଆଶୀର୍ବାଦରେ ବିଜୁ ଜନତା ଦଳ ୨୦୦୦ରୁ ୨୦୨୪ ପର୍ଯ୍ୟନ୍ତ ଓଡ଼ିଶା ମା’ ର ସେବାର ସୁଯୋଗ ପାଇଥିଲା । ଏହି ସମୟ ଥିଲା ଓଡ଼ିଶା ବିକାଶର ସୁବର୍ଣ୍ଣ ଯୁଗ । ବିଭିନ୍ନ କ୍ଷେତ୍ରରେ ପଥପ୍ରଦର୍ଶକ ଭୂମିକା ପାଇଁ ଓଡ଼ିଶା ଅନ୍ୟ ରାଜ୍ୟ ପାଇଁ ଆଦର୍ଶ ହୋଇଥିଲା ।

ବିଜୁ ଜନତା ଦଳର ସାଂଗଠନିକ ଶକ୍ତିକୁ କେହି ନ୍ୟୁ ମନେ କରିବା ଉଚିତ ନୁହେଁ । ଆମର ପ୍ରତି କର୍ମୀ ଭାଇ ଭଉଣୀମାନଙ୍କ ମନୋବଳ ବହୁତ ଉଚ୍ଚା ଅଛି । ସେହିମାନେ ହିଁ ହେଉଛନ୍ତି ଆମ ଦଳଲ୍ପ୍ରକୃତ ସମ୍ପଦ । ଆମର ନୀତି ଓ ଆଦର୍ଶ ହେଉଛି ଆମର ଶକ୍ତି । ସରକାରରେ ରହେ ବା ନ ରହେ, ବିଜୁ ଜନତା ଦଳ ସବୁବେଳେ ଓଡ଼ିଶାବାସୀଙ୍କ ସେବା କରି ଚାଲିଛି ଏବଂ କରି ଚାଲିବ । ଓଡ଼ିଶାବାସୀଙ୍କ ସଶକ୍ତିକରଣ ଆମର ଫୋକସ୍ । ମହିଳା, ଚାଷୀ, ଯୁବ ସମାଜ, ଶ୍ରମିକ ଓ ଜନଜାତି ସମସ୍ତଙ୍କ ସଶକ୍ତିକରଣ ଆମର ଫୋକସ୍ । ଓଡ଼ିଶାର ସ୍ୱାର୍ଥ ଓ ସ୍ୱାଭିମାନ ସାଥୀରେ ବିଜେଡି ସବୁବେଳେ ଯୋଡି ହୋଇ ରହିଛି ଓ ରହିବ । ଓଡ଼ିଶାର ହକ୍ ପାଇଁ ଆମର ଲଢ଼େଇ ଜାରି ରହିବ । ଓଡ଼ିଆ ସ୍ୱାଭିମାନ ଓ ଓଡ଼ିଶାଙ୍କ ସ୍ୱାର୍ଥ ଆମ ପାଇଁ ସବୁଠାରୁ ଉପରେ ।

ବିଜୁ ଜନତା ଦଳ ସବୁବେଳେ ତାର ଆଦର୍ଶରେ ଦୃଢ଼ ରହିଛି ଓ ରହିବ । ଆମେ ଗତ ନିର୍ବାଚନରେ ଅଳ୍ପକେ ହାରିଗଲୁ । ଯଦିଓ ଆମେ ଅଧିକ ଭୋଟ ପାଇଲୁ । ଏହାର କାରଣ ଫଲସ୍ ନ୍ୟାରେଟିଭ୍ କୁ ଆମେ ସଠିକ୍ ଭାବେ କାଉଣ୍ଟର କରିପାରିଲୁନୁ । ଏବେ ବି ବିଜେଡି ବିରୋଧରେ ଫଲସ୍ ନ୍ୟାରେଟିଭ୍ ତିଆରି କରାଯାଉଛି । ଏହାକୁ ସୋସିଆଲ୍ ମିଡିଆରେ ଆକ୍ରମଣାତ୍ମକ ଢ଼ଙ୍ଗରେ ଆମେ ମୁକାବିଲା କରିବା ଦରକାର ।

ମୁଁ ସତରେ କହୁଛି ଯେ ଆମର ସୋସିଆଲ୍ ମିଡିଆ ଉପସ୍ଥିତିକୁ ଜୋରଦାର ଢ଼ଙ୍ଗରେ ବଢାଇବାର ଆବଶ୍ୟକତା ଅଛି । ସତ ଜଣାଇବାକୁ ଟେକେନୋଲୋଜିର ସାହାଯ୍ୟ ନେବାକୁ ପଡ଼ିବ । ଏହା ବିନା ଆମେ ଲୋକଙ୍କ ପାଖରେ ପହଞ୍ଚିବା ସମ୍ଭବ ନୁହେଁ ।

ବିଜେଡିର କର୍ମୀ, ଭାଇ ଭଉଣୀମାନଙ୍କ ଉପରେ ମୋର ପୂରା ଭରସା ଅଛି । ସେମାନେ ହିଁ ମିଛ ପ୍ରଚାରର ଉଚିତ୍ ଜବାବ ଦେବେ । ଓଡ଼ିଶାର ସବୁ ଗାଁ, ସବୁ ସହରରେ ଆମର ସେବାର ବାର୍ତ୍ତା ପହଞ୍ଚାଇବେ ।
ନବୀନଙ୍କ ଏହି ଅଭିଭାଷଣ ନେତାଙ୍କ ମନରେ ଉତ୍ସାହ ଭରିବା ପାଇଁ ଉଦ୍ଦିଷ୍ଟ ଥିଲା ବେଳେ ସାଂଗଠନିକ ନବ କଳେବରକୁ ସମସ୍ତଙ୍କର ଅପେକ୍ଷା ରହିଛି । ଏହା କେବେ ଘୋଷଣା ହେବ ବୋଲି ସାମ୍ବାଦିକମାନେ ନିର୍ବାଚନ ଅଧିକାରୀ ପ୍ରତାପ ଦେବଙ୍କୁ ପଚାରିବାରୁ ସେ ଏହା ଦଳର ସଭାପତିଙ୍କ ନିଷ୍ପତ୍ତି ଉପରକୁ ଛାଡ଼ିଥିଲେ ।

ନବୀନଙ୍କୁ ଦଳର ନବମ ପାଳି ସଭାପତି ଘୋଷଣା ପାଇଁ ଆଜି ଶଙ୍ଖଭବନ ଉତ୍ସବମୁଖର ଥିଲା ବେଳେ କିଛି ବରିଷ୍ଠ ନେତାଙ୍କ ଅନୁପସ୍ଥିତି ଚର୍ଚ୍ଚାର ବିଷୟ ହୋଇଛି । ଅନଙ୍ଗ ଉଦୟ ସିଂହଦେଓ, ରଣେନ୍ଦ୍ର ପ୍ରତାପ ସ୍ୱାଇଁ, ପ୍ରଫୁଲ୍ଲ ମଲ୍ଲିକ, ଶଶୀଭୂଷଣ ବେହେରା, ଭୂପିନ୍ଦର ସିଂଙ୍କ ଭଳି ନେତା ଆଜି ଶଙ୍ଖ ଭବନରେ ଅନୁପସ୍ଥିତ ଥିଲେ । ସେହିଭଳି ଦଳର ରାଜ୍ୟସଭା ସାଂସଦ ସସ୍ମିତ ପାତ୍ର, ନିରଞ୍ଜନ ବିଶି ଏବଂ ସୁଲତା ଦେଓଙ୍କୁ ଦେଖିବାକୁ ମିଳି ନ ଥିଲା ।