ଭୁବନେଶ୍ୱର: ଗଳାବାଟରେ ଧକ୍କା ଖାଇ କାମଚଳାରେ ଅଟକିଲେ ମୋହନ ସରକାର । ପୁଲିସ ବିଭାଗରେ କାମଚଳା ଡିଜିଙ୍କୁ ନିଯୁକ୍ତି ଦେବାକୁ ବାଧ୍ୟ ହେଲେ । ଆଉ ମାତ୍ର ତିନି ମାସ ଚାକିରି ଥିବା ୧୯୯୩ ବ୍ୟାଚ୍ ର ଆଇଏଏସ୍ ବିନୟତୋଷ ମିଶ୍ରଙ୍କୁ ଆଜି କାମଚଳା ଡିଜି ଭାବେ ନିଯୁକ୍ତି ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । କ୍ରାଇମବ୍ରାଞ୍ଚ ଡିଜି ପଦରେ ଥିବା ବିନୟତୋଷ ଓଡ଼ିଶା ପୁଲିସର ମୁଖିଆ ଭାବେ ଅତିରିକ୍ତ ଦାୟିତ୍ୱ ସମ୍ଭାଳିବେ । ଆସନ୍ତା ୧୬ ତାରିଖରେ ଅବସର ନେଉଥିବା ବର୍ତ୍ତମାନର ଡିଜିପି ୱାଇ. ବି ଖୁରାନିଆଙ୍କଠାରୁ ସେ ଦାୟିତ୍ୱ ନେବେ ।
ଏପ୍ରିଲ୍ ମାସରୁ ନୂଆ ଡିଜିପି ଚୟନର କସରତ୍ ଆରମ୍ଭ ହୋଇଥିଲେ ମଧ୍ୟ ରାଜ୍ୟ ସରକାରଙ୍କ ପ୍ରିୟାପ୍ରୀତି ପାଇଁ ଆଜି ରାଜ୍ୟକୁ ଏଭଳି ଦୁର୍ଦ୍ଦଶାର ସମ୍ମୁଖୀନ ହେବାକୁ ପଡ଼ିଛି । ଚୟନ ପ୍ରକ୍ରିୟାରେ ଅନିୟମିତତା ପାଇଁ ଡିଜିପି ନିଯୁକ୍ତି ଅଟକି ରହିବା ସାରା ଦେଶରେ ପ୍ରଥମ ଘଟଣା ବୋଲି କୁହାଯାଉଛି । ଏହି ଘଟଣାରେ ସୁପ୍ରିମକୋର୍ଟରୁ ରାଜ୍ୟ ସରକାରଙ୍କୁ ଝଟକା ମିଳିବା ରାଜ୍ୟବାସୀଙ୍କ ମୁଣ୍ଡ ତଳକୁ କରିଦେଇଛି ।
ସୂଚନାଥାଉକି, ଡିଜିପି ନିଯୁକ୍ତି ପ୍ରକ୍ରିୟାରେ ବେନିୟମ କାର୍ଯ୍ୟ ହେଉଥିବା ନେଇ ସୁପ୍ରିମକୋର୍ଟରେ ଏକ ଜନସ୍ୱାର୍ଥ ମାମଲା ହୋଇଛି । ସର୍ବୋଚ୍ଚ ଅଦାଲତଙ୍କ ନିର୍ଦ୍ଦେଶକୁ ଏଡ଼ାଇ ଅଯୋଗ୍ୟ ଅଧିକାରୀଙ୍କୁ ତାଲିକାରେ ସାମିଲ କରାଯାଇଥିବା ଏଥିରେ ଅଭିଯୋଗ ହୋଇଛି । ଗତକାଲି ସୁପ୍ରିମକୋର୍ଟରେ ଶୁଣାଣି ପାଇଁ ମାମଲା ତାଲିକାଭୁକ୍ତ ହୋଇ ନ ଥିଲେ ମଧ୍ୟ ବରିଷ୍ଠ ଆଇନଜୀବୀ ପି. ଚିଦାମ୍ବରମଙ୍କ ଦୃଷ୍ଟି ଆକର୍ଷଣ ଯୋଗୁଁ ମୁଖ୍ୟ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତଙ୍କ ଖଣ୍ଡପୀଠ ଏହାର ବିଚାର କରିଥିଲେ ।
ଡିଜିପି ନିଯୁକ୍ତି ପ୍ରକ୍ରିୟାରେ ଓଡ଼ିଶା ସରକାର ୟୁପିଏସସିକୁ ପ୍ରଥମ ତିନୋଟି ନାଁ ଏପ୍ରିଲ୍ ମାସରେ ପଠାଇଥିଲେ । ପରବର୍ତ୍ତୀ ସମୟରେ ପୁଣି ୮ଟି ନାଁ ଯୋଡ଼ା ଯାଇଥିଲା । ଅଗଷ୍ଟ ୭ ତାରିଖରେ ଅନୁଷ୍ଠିତ ୟୁପିଏସସି ବୈଠକରେ ପୁଣି ଦୁଇଟି ନାଁ ଫେରାଇ ଦିଆଯାଇଥିଲା । ୧୦ ତାରିଖରେ ସେମାନଙ୍କୁ ଏଡିଜିରୁ ଡିଜିପିକୁ ପଦୋନ୍ନତି ଦିଆଯାଇ ପୁଣି ତାଲିକାରେ ଯୋଡା ଯାଇଥିଲା । ଏହା ବେନିୟମ ଏବଂ ୨୦୦୬ ପ୍ରକାଶ ସିଂ ମାମଲାରେ ସୁପ୍ରିମକୋର୍ଟଙ୍କ ନିଦେ୍ର୍ଦଶାବଳୀର ସ୍ପଷ୍ଟ ଉଲ୍ଲଂଘନ ବୋଲି ଚିଦାମ୍ବରମ୍ ଦର୍ଶାଇଥିଲେ ।
ମାତ୍ର ଓଡ଼ିଶା ସରକାର ଡିଜିପି ନିଯୁକ୍ତି ନେଇ କୌଣସି ଅନିୟମିତତା ହୋଇନାହିଁ ବୋଲି ଏଜି ପୀତାମ୍ବର ଆଚାର୍ଯ୍ୟ ଯୁକ୍ତି ବାଢ଼ିଥିଲେ । ଅଭିଯୋଗକୁ କପୋଳକଳ୍ପିତ ଓ ଅବାଂଛିତ ବୋଲି କହିଥିଲେ । ସୁପ୍ରିମକୋର୍ଟଙ୍କ ପୂର୍ବର ପ୍ରକାଶ ସିଂଙ୍କ ମାମଲା ନିର୍ଦ୍ଦେଶକୁ ଅନୁସରଣ କରାଯାଇଛି ବୋଲି ଯୁକ୍ତି ରଖିଥିଲେ ।
ତେବେ ଏଜି ଶ୍ରୀ ଆଚାର୍ଯ୍ୟଙ୍କର ଯୁକ୍ତିରେ ସନ୍ତୁଷ୍ଟ ହୋଇନଥିଲେ ମୁଖ୍ୟ ବିଚାରପତିଙ୍କ ଖଣ୍ଡପୀଠ । ଏହା ଉପରେ ଆମିକସକ୍ୟୁରୀ ଭାବେ କାର୍ଯ୍ୟ କରୁଥିବା ବରିଷ୍ଠ ଆଇନଜୀବୀ ରାଜୁ ରାମଚନ୍ଦ୍ରନଙ୍କ ମତାମତ ଲୋଡ଼ିଥିଲେ । ଆବେଦନକାରୀଙ୍କ ପକ୍ଷର ଯୁକ୍ତିକୁ ସେ ସମର୍ଥନ କରି ନିଜର ମତ ରଖିଥିଲେ । ଡିଜିପି ଚୟନ ପ୍ରକ୍ରିୟାରେ ତ୍ରୁଟି ଥିବା ଏବଂ ପ୍ରକାଶ ସିଂଙ୍କ ମାମଲାରେ ସୁପ୍ରିମକୋର୍ଟଙ୍କ ନିର୍ଦ୍ଦେଶର ଉଲ୍ଲଂଘନ କରାଯାଇଥିବା କହିଥିଲେ । ଏହାପରେ ସୁପ୍ରିମକୋର୍ଟ ଡିଜିପି ଚୟନ ପ୍ରକ୍ରିୟା ଉପରେ ରୋକ୍ ଲଗାଇଥିଲେ । ଅଗଷ୍ଟ ୧୮ ରେ ପରବର୍ତ୍ତୀ ଶୁଣାଣି ପାଇଁ ତାରିଖ ଧାର୍ଯ୍ୟ କରିଛନ୍ତି ।
ୟୁପିଏସସି ଚୟନ କମିଟି ବୈଠକରେ ଯୋଗଦେବାକୁ ଯାଇଥିବା ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ ଏବଂ ଡିଜିପି ୱାଇ. ବି ଖୁରାନିଆ ଦିଲ୍ଲୀରୁ ଫେରି ଆଜି ଲୋକସେବା ଭବନରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଭେଟି ଏ ସଂକ୍ରାନ୍ତରେ ଅବଗତ କରିଥିଲେ ।
