ଭୁବନେଶ୍ୱର: ସୁପ୍ରିମକୋର୍ଟଙ୍କ ଦ୍ୱାରା ଅଟକି ଯାଇଛି ଡିଜିପି ଚୟନ ପ୍ରକ୍ରିୟା । ଆଜି ହେବାକୁ ଥିବା ୟୁପିଏସସି ବୈଠକ ସ୍ଥଗିତ ରହିଛି । ୧୬ ତାରିଖରେ ୱାଇ. ବି ଖୁରାନିଆଙ୍କ ଅବସର ଗ୍ରହଣ ପୂର୍ବରୁ ରାଜ୍ୟ ସରକାରଙ୍କ ମନ ପସନ୍ଦର ନୂଆ ଡିଜିପିଙ୍କ ନିଯୁକ୍ତିରେ ଏହା ବ୍ରେକ୍ ଲଗାଇ ଦେଇଛି । ୧୮ ତାରିଖରେ ମାମଲାର ପରବର୍ତ୍ତୀ ଶୁଣାଣି କରିବେ ସୁପ୍ରିମକୋର୍ଟ ।
ଡିଜିପି ନିଯୁକ୍ତିରେ ସର୍ବୋଚ୍ଚ ଅଦାଲତଙ୍କ ନିର୍ଦ୍ଦେଶକୁ ଏଡ଼ାଇ ଅଯୋଗ୍ୟ ଅଧିକାରୀଙ୍କୁ ତାଲିକାରେ ସାମିଲ କରାଯାଇଥିବା ନେଇ ଆଗତ ଜନସ୍ୱାର୍ଥ ମାମଲାରେ ମୁଖ୍ୟ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତଙ୍କ ଖଣ୍ଡପୀଠ ଆଜି ଶୁଣାଣି କରିଥିଲେ । ବରିଷ୍ଠ ଆଇନଜୀବୀ ପି.ଚିଦାମ୍ବରମ୍ ମାମଲାର ଗୁରୁତ୍ୱ ଉପରେ ଖଣ୍ଡପୀଠଙ୍କ ଦୃଷ୍ଟି ଆକର୍ଷଣ କରିଥିଲେ । ଡିଜିପି ନିଯୁକ୍ତି ପ୍ରକ୍ରିୟାରେ ଓଡ଼ିଶା ସରକାର ୟୁପିଏସସିକୁ ପ୍ରଥମ ତିନୋଟି ନାଁ ଏପ୍ରିଲ୍ ମାସରେ ପଠାଇଥିଲେ । ପରବର୍ତ୍ତୀ ସମୟରେ ପୁଣି ୮ଟି ନାଁ ଯୋଡ଼ା ଯାଇଥିଲା । ଅଗଷ୍ଟ ୭ ତାରିଖରେ ଅନୁଷ୍ଠିତ ୟୁପିଏସସି ବୈଠକରେ ପୁଣି ଦୁଇଟି ନାଁ ଫେରାଇ ଦିଆଯାଇଥିଲା । ୧୦ ତାରିଖରେ ସେମାନଙ୍କୁ ଏଡିଜିରୁ ଡିଜିପିକୁ ପଦୋନ୍ନତି ଦିଆଯାଇ ପୁଣି ତାଲିକାରେ ଯୋଡା ଯାଇଥିଲା । ଏହା ବେନିୟମ ଏବଂ ୨୦୦୬ ପ୍ରକାଶ ସିଂ ମାମଲାରେ ସୁପ୍ରିମକୋର୍ଟଙ୍କ ନିର୍ଦ୍ଦେଶାବଳୀର ସ୍ପଷ୍ଟ ଉଲ୍ଲଂଘନ ବୋଲି ଚିଦାମ୍ବରମ୍ ଦର୍ଶାଇଥିଲେ ।
ଓଡ଼ିଶା ସରକାରଙ୍କ ଆଡଭୋକେଟ୍ ଜେନେରାଲ୍ ପୀତାମ୍ବର ଆଚାର୍ଯ୍ୟ ଏହା ବିରୋଧରେ ଦୃଢ଼ ଯୁକ୍ତି ଉପସ୍ଥାପନା କରିଥିଲେ । ଓଡ଼ିଶା ସରକାର ଡିଜିପି ନିଯୁକ୍ତି ନେଇ କୌଣସି ବେନିୟମ କାମ କରିନାହାନ୍ତି ବୋଲି ସେ ରୋକଠୋକ୍ କହିଥିଲେ । ସୁପ୍ରିମକୋର୍ଟଙ୍କ ପୂର୍ବର ପ୍ରକାଶ ସିଂଙ୍କ ମାମଲା ନିର୍ଦ୍ଦେଶକୁ ଅନୁସରଣ କରାଯାଇଛି ବୋଲି ଦର୍ଶାଇଥିଲେ । ତେଣୁ ଏଭଳି ଅଭିଯୋଗ କପୋଳକଳ୍ପିତ, ଅବାଂଛିତ ଏବଂ ଯୁକ୍ତି ଗ୍ରହଣୀୟ ନୁହେଁ ବୋଲି କହିଥିଲେ ।
ତେବେ ଏଜି ଶ୍ରୀ ଆଚାର୍ଯ୍ୟଙ୍କର ଯୁକ୍ତିରେ ସନ୍ତୁଷ୍ଟ ହୋଇନଥିଲେ ମୁଖ୍ୟ ବିଚାରପତିଙ୍କ ଖଣ୍ଡପୀଠ । ଏହା ଉପରେ ଆମିକସକ୍ୟୁରୀ ବରିଷ୍ଠ ଆଇନଜୀବୀ ରାଜୁ ରାମଚନ୍ଦ୍ରନଙ୍କ ମତାମତ ଲୋଡ଼ିଥିଲେ । ଆମିକସକ୍ୟୁରୀ ଆବେଦନକାରୀଙ୍କ ସମର୍ଥନରେ ତାଙ୍କର ମତ ଦେଇଥିଲେ । ଡିଜିପି ଚୟନ ପ୍ରକ୍ରିୟାରେ ତ୍ରୁଟି ଥିବା ଏବଂ ପ୍ରକାଶ ସିଂଙ୍କ ମାମଲାରେ ସୁପ୍ରିମକୋର୍ଟଙ୍କ ନିର୍ଦ୍ଦେଶର ଉଲ୍ଲଂଘନ କରାଯାଇଥିବା କହିଥିଲେ । ଏହାପରେ ସୁପ୍ରିମକୋର୍ଟ ୟୁପିଏସସି ପକ୍ଷରୁ ଉପସ୍ଥିତ ଥିବା କାଉନସେଲ୍ ଙ୍କୁ ଆଜିର ବୈଠକକୁ ସ୍ଥଗିତ ରଖିବା ପାଇଁ ନିର୍ଦ୍ଦେଶ ଦେଇଥିଲେ । ଅଗଷ୍ଟ ୧୮ ରେ ପରବର୍ତ୍ତୀ ଶୁଣାଣି ପାଇଁ ତାରିଖ ଧାର୍ଯ୍ୟ କରିଛନ୍ତି ।
