ଭୁୁବନେଶ୍ୱର: ନିମାପଡ଼ାର ହାରୁ ବିଜେଡି ନେତା ଦିଲ୍ଲୀପ ନାୟକ ଟଙ୍କା ଠକେଇ ମାମଲାରେ ଗିରଫ ହୋଇ ଗତକାଲିଠାରୁ ଜେଲ୍ ରେ । ତାଙ୍କ ବିରୋଧରେ ଇଓଡବ୍ଲୁ କାର୍ଯ୍ୟାନୁଷ୍ଠାନ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ପୁଲିସ ହେପାଜତରୁ ଗଣମାଧ୍ୟମକୁ ଠାଏ ପ୍ରତିକ୍ରିୟା ଦେଇଛନ୍ତି । ରାଜନୀତିରେ ଥିବା ବ୍ୟକ୍ତିଙ୍କର ଏହା ଘୋଷା ଲାଇନ୍ । ନିଜର ଅପରାଧକୁ ଘୋଡ଼ାଇବା ପାଇଁ ଚିରାଚରିତ ବୟାନ । ଦିଲ୍ଲୀପଙ୍କ କ୍ଷେତ୍ରରେ ଏହାର ବ୍ୟତିକ୍ରମ ଘଟିନି ।
ମାତ୍ର ବ୍ୟତିକ୍ରମ ହେଉଛନ୍ତି ବିଜୁ ଜନତା ଦଳର ନେତୃତ୍ୱ । ଦଳ ପାଇଁ ବଦନାମ ଆଣିଥିବା ଏହି ବ୍ୟକ୍ତିଙ୍କ ବିରୋଧରେ ଏ ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ନାହିଁ । ଇଓଡବ୍ଲୁ କାର୍ଯ୍ୟାନୁଷ୍ଠାନ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ଦିଲ୍ଲୀପଙ୍କ କଥାରେ ବିଜେଡି ନେତୃତ୍ୱ ସତେ ଯେମିତି ସହମତ । ନିମାପଡ଼ାରେ ବିଜେଡି ପାଇଁ ଏହା ଭୟଙ୍କର କ୍ଷତିକାରକ ହୋଇଥିଲେ ମଧ୍ୟ ଶୀର୍ଷ ନେତୃତ୍ୱଙ୍କର ଚିନ୍ତା ନାହିଁ । ସ୍ଥାନୀୟ ବିଜେପି ବିଧାୟିକା ତଥା ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ାଙ୍କ ଉପରେ ଲୋକେ ସନ୍ତୁଷ୍ଟ ନ ଥିବା ବେଳେ ବିଜେଡି ନେତୃତ୍ୱ ଦିଲ୍ଲୀପଙ୍କଠାରୁ ମୋହ ନ ତୁଟାଇବା ଏବଂ ସଠିକ ଢ଼ଙ୍ଗରେ ପରିଚାଳନା ନ କରିବା ଦଳୀୟ କର୍ମୀମାନଙ୍କୁ ବ୍ୟଥିତ କରିଛି ।
ପୂର୍ବରୁ ସମୀର ଦାଶଙ୍କ ଟିକେଟ୍ କାଟିବା ଏବଂ ତାଙ୍କ ଜାଗାରେ ଦଳ ବଦଳିଆ ଦିଲ୍ଲୀପଙ୍କୁ ଟିକେଟ୍ ଦେବା ବିଜେଡି ପାଇଁ ମହଙ୍ଗା ସାବ୍ୟସ୍ତ ହୋଇସାରିଛି । ନେତୃତ୍ୱଙ୍କ ଭୁଲ୍ ବିଚାର ଯୋଗୁଁ ବିଜେଡି ଏହି ଦୁର୍ଗକୁ ହାତଛଡ଼ା କରିଛି । ଏହାପରେ ମଧ୍ୟ ଦଳ ନିଜର ପୂର୍ବ ସ୍ଥିତି ଫେରାଇ ଆଣିବାକୁ ଯତ୍ନଶୀଳ ହୋଇପାରିନାହିଁ । ସମୀର ଦାଶଙ୍କ ପରେ ଲୋକସମ୍ପର୍କ ଓ ସାଂଗଠନିକ କାର୍ଯ୍ୟକ୍ରମ ଦୃଷ୍ଟିରୁ ଯୁବନେତା ସୁବ୍ରତ ଛାଟୋଇ ସର୍ବାଗ୍ରେ ଥିଲେ ମଧ୍ୟ ଦିଲ୍ଲୀପଙ୍କ ଗୋଷ୍ଠୀ ତାଙ୍କ ପଛରେ ପଡ଼ିଛନ୍ତି । ଏହା ସଂଗଠନକୁ ସଶକ୍ତ କରିବା ବଦଳରେ ଦୁର୍ବଳ କରିବାରେ ସହାୟକ ହେଉଥିବା କୁହାଯାଉଛି । ନିର୍ବାଚନମଣ୍ଡଳୀରେ ପ୍ରଭାତୀ ବିରୋଧୀ ହାୱା ବୋହିବାକୁ ଆରମ୍ଭ କଲା ବେଳେ ବିଜେଡି ଘର ସଜଡ଼ା ନ ହେବା କର୍ମୀମାନଙ୍କୁ କ୍ଷୁବ୍ଧ କରିଛି ।
ସୂଚନାଥାଉକି, ଦିଲ୍ଲୀପ ନାୟକଙ୍କ ବିରୋଧରେ ଆସିଥିବା ଅଭିଯୋଗଟି ସାଂଘାତିକ । ରିୟଲ ଇଷ୍ଟେଟରେ ଟଙ୍କା ଲଗାଇ ପ୍ରଚୁର ଅର୍ଥ ପାଇବା ଲୋଭ ଦେଖାଇ କଟକର ଜଣେ ବ୍ୟକ୍ତିଙ୍କଠାରୁ ସେ ୧୨ କୋଟି ୪୨ ଲକ୍ଷ ଟଙ୍କା ଠକିନେଇଥିବା ଅଭିଯୋଗ ହୋଇଛି । ଘଟଣାଟି ୨୦୨୦ ସେପ୍ଟେମ୍ବର ମାସର । ମାମଲା ହୋଇଥିଲା ୨୦୨୩ ନଭେମ୍ବରରେ । ଚଳିତମାସ ୧୮ ତାରିଖରେ ଏହି ମାମଲା ଇଓଡବ୍ଲୁକୁ ହସ୍ତାନ୍ତର ହୋଇଥିଲା । ଇଓଡବ୍ଲୁ ଦିଲ୍ଲୀପଙ୍କ କଟକସ୍ଥିତ ବାସଭବନରେ ଚଢ଼ଉ କରିବା ପରେ ଶନିବାର ତାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ।
୨୦୧୯ ନିର୍ବାଚନରେ ଦିଲ୍ଲୀପ ନିମାପଡ଼ାରୁ କଂଗ୍ରେସ ପ୍ରାର୍ଥୀ ଭାବେ ଲଢ଼ି ତୃତୀୟ ସ୍ଥାନରେ ଥିଲେ । ପରେ ସେ ବିଜେପିକୁ ଡେଇଁଥିଲେ । ୨୦୨୪ ସାଧାରଣ ନିର୍ବାଚନ ପୂର୍ବରୁ ସେ ବିଜେଡିକୁ ଚାଲି ଆସିଥିଲେ । ବିଜେଡିରେ ତାଙ୍କର ନାଁ ଗନ୍ଧ ନ ଥିଲେ ମଧ୍ୟ ସମୀର ଦାଶଙ୍କ ଜାଗାରେ ତାଙ୍କୁ ଦିଆଗଲା ଟିକେଟ ।
