ଭୁବନେଶ୍ୱର: ଲାୟନସ୍ କ୍ଲବ ଅଫ ଭୁବନେଶ୍ଵର ବ୍ୟାଙ୍କର୍ସଙ୍କ ଦ୍ଵାରା ” ସାଇବର ସୁରକ୍ଷା” ଉପରେ ଏକ କର୍ମଶାଳା ଓଡିଶା ଲାୟନ୍ସ ଭବନରେ ଆୟୋଜନ କରାଯାଇଥିଲା । ସାଇବର ଅପରାଧ ନିୟନ୍ତ୍ରଣ ଉପରେ ସମାଜରେ ସଚେତନତା ଓ ସତର୍କତା ସୃଷ୍ଟି କରିବା କର୍ମଶାଳାର ମୁଖ୍ୟ ଉଦ୍ଦେଶ୍ୟ ଥିଲା ।
ଲାୟନସ୍ ଡିଷ୍ଟ୍ରିକ୍ଟ 322 C4 ର ଡିଷ୍ଟ୍ରିକ୍ଟ ଗଭର୍ଣ୍ଣର ଲାୟନ ସରସ୍ଵତୀ ପାତ୍ର କର୍ମଶାଳାର ଉଦଘାଟନ କରିଥିଲେ । ସେ ତାଙ୍କର ଅଭିଭାଷଣରେ ସାଂପ୍ରତିକ ପରିସ୍ଥିତିରେ ସାଇବର ଅପରାଧର ଗମ୍ଭୀରତାକୁ ଉପଲବ୍ଧି କରି ଏହାର ପ୍ରତିରୋଧ କରିବାକୁ ଜନ ସଚେତନତା ସୃଷ୍ଟି ଉପରେ ଆଲୋକପାତ କରିଥିଲେ । ଲାୟନସ୍ କ୍ଲବ ଅଫ ବ୍ୟାଙ୍କର୍ସଙ୍କ ଦ୍ଵାରା ଏହି ପ୍ରକାର କର୍ମଶାଳାର ଆୟୋଜନ ପାଇଁ ସେ ଭୁୟସୀ ପ୍ରଶଂସା କରିଥିଲେ ।
ଭୁବନେଶ୍ଵର ଅତିରିକ୍ତ ପୋଲିସ ଅଧିକ୍ଷକ ( ଅପରାଧ) ସାଇବର ସୁରକ୍ଷା ବିଶେଷଜ୍ଞ ଶ୍ରୀମତୀ ଅଞ୍ଜନା ଟୁଡୁ ଉକ୍ତ କର୍ମଶାଳାରେ ଯୋଗଦାନ କରି ଉପସ୍ଥିତ ଶ୍ରୋତା ଙ୍କୁ ସ୍ଲାଇଡ ମାଧ୍ୟମରେ ସାଇବର ଅପରାଧର ବିଭିନ୍ନ ଦିଗ, କାରଣ, ନିରାକରଣ, ସଚେତନତା ଏବଂ ସତର୍କତା ଉପରେ ବିସ୍ତୃତ ଆଲୋଚନା କରିଥିଲେ । ଆବଶ୍ୟକ ସ୍ଥଳରେ ତୁରନ୍ତ ସାଇବର ହେଲ୍ପ ଲାଇନ ୧୯୩୦ ଏବଂ ସାଇବର ଥାନାର ସାହାଯ୍ୟ ନେବାକୁ ଉପଦେଶ ଦେଇଥିଲେ । ଉପସ୍ଥିତ ଶ୍ରୋତା ମାନଙ୍କର ସାଇବର ସୁରକ୍ଷା ସମ୍ବନ୍ଧୀୟ ବିଭିନ୍ନ ପ୍ରଶ୍ନର ଉତ୍ତର ଦେଇଥିଲେ ।
ଲାୟନ ବାନାମ୍ଵର ସାହୁ, ସଭାପତି, ଲାୟନସ୍ କ୍ଲବ ଅଫ ବ୍ୟାଙ୍କର୍ସ ,ସ୍ଵାଗତ ସମ୍ଭାଷଣ ସହ କର୍ମଶାଳାର ଉଦ୍ଦେଶ୍ୟ ଓ ମହତ୍ତ୍ଵ ଉପରେ ଆଲୋକପାତ କରିଥିଲେ |
ଜୋନାଲ ଚେୟାରମ୍ୟାନ ଲାୟନ ମନୋରଞ୍ଜନ ଭୂୟାଁ କର୍ମଶାଳାରେ ସାଇବର ବିଶେଷଜ୍ଞ ଦେଇଥିବl ପରାମର୍ଶକୁ ଅନୁପାଳନ କରି ସଚେତନ ଓ ସୁରକ୍ଷିତ ରହିବାକୁ ଆହ୍ୱାନ ଦେଇଥିଲେ ।
ଲାୟନ ନୃସିଂହ ପ୍ରସାଦ ମହାପାତ୍ର ସଭା କାର୍ଯ୍ୟ ପରିଚାଳନା କରିଥିଲେ ଏବଂ ଲାୟନ ଶ୍ରୀହର୍ଷ ସାହୁ, ସଂପାଦକ ଧନ୍ୟବାଦ ଅର୍ପଣ କରିଥିଲେ ।
