ଅଶୋକ ପଣ୍ଡାଙ୍କ ହୀନିମାନିଆ ରାଜନୀତି

ଭୁବନେଶ୍ୱର: ମନ୍ତ୍ରୀ ଅଶୋକ ପଣ୍ଡାଙ୍କ କାର୍ଯ୍ୟକଳାପରେ ଅତିଷ୍ଠ ହୋଇଛନ୍ତି ଭୁବନେଶ୍ୱର ଜିଲ୍ଲା ସଂଗଠନର ନେତା ଓ କର୍ମୀ । କର୍ମୀମହଲରେ ଗ୍ରହଣୀୟତା ହରାଇଥିବା ଏବଂ ଯାବତୀୟ ଅପବାଦରେ ଘେରା ଅଶୋକ ନିଜକୁ ଜିଲ୍ଲା ବିଜେଡ଼ିର ସର୍ବେସର୍ବା ବୋଲାଇବାର ନିଶା ଛାଡ଼ିପାରୁନାହାନ୍ତି । ଭୁବନେଶ୍ୱର ଜିଲ୍ଲା ସଂଗଠନର ନେତୃତ୍ୱ ଦାୟିତ୍ୱରୁ ତଡ଼ା ଖାଇଲା ପରେ ବି ତାଙ୍କର ମୋହ ତୁଟିନି । ଆଜି ବିଜେଡ଼ିର ଜନସଂପର୍କ ପଦଯାତ୍ରା କାର୍ଯ୍ୟକ୍ରମରେ ଅଶୋକ ପଣ୍ଡାଙ୍କ କାର୍ଯ୍ୟକଳାପ ଜିଲ୍ଲା ସଂଗଠନରେ ଖାଲି ଚର୍ଚ୍ଚାର ବିଷୟ ହୋଇନି, ବରଂ ତାଙ୍କୁ ନେଇ ଦଳରେ ଭୀଷଣ ଅସନ୍ତୋଷ ସୃଷ୍ଟି ହୋଇଛି ।

ଭୁବନେଶ୍ୱର ୱାର୍ଡ ନଂ ୬୨ର କାରଗିଲ୍ ରୋଡ୍ ରେ ଆଜି ବିଜେଡ଼ିର ଜନସଂପର୍କ ପଦଯାତ୍ରା ଉତ୍ସବ ଆୟୋଜିତ ହୋଇଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଥିଲେ ମୁଖ୍ୟ ଅତିଥି । ଗୁୁରୁତ୍ୱପୂର୍ଣ୍ଣ କଥା ହେଉଛି, ପ୍ରତିବର୍ଷ ଏହି ପଦଯାତ୍ରା ଉତ୍ସବର ଆୟୋଜନ ଜିଲ୍ଲା ସଂଗଠନ ଉପରେ ନ୍ୟସ୍ତ ଥାଏ । ମାତ୍ର ଏଥର ସେଥିରେ ବ୍ୟତିକ୍ରମ ଦେଖିବାକୁ ମିଳିଥିଲା । ଏହି ୱାର୍ଡଟି ମନ୍ତ୍ରୀ ଅଶୋକ ପଣ୍ଡାଙ୍କ ଏକାମ୍ର ନିର୍ବାଚନମଣ୍ଡଳୀ ଅର୍ନ୍ତଭୁକ୍ତ ହୋଇଥିବାରୁ ନିଜକୁ ସେ ସର୍ବେସର୍ବା ବୋଲାଇ ଜିଲ୍ଲା ସଂଗଠନକୁ ଅନ୍ଧାରରେ ରଖି ଦେଇଥିଲେ । କାର୍ଯ୍ୟକ୍ରମର ଆୟୋଜନଠାରୁ ଉତ୍ସବ ଶେଷ ପର୍ଯ୍ୟନ୍ତ ଜିଲ୍ଲା ସଭାପତି ଅମରେଶ(ବାଇଁଆ) ଜେନା ଓ ଅନ୍ୟାନ୍ୟ କର୍ମକର୍ତ୍ତାଙ୍କୁ ବାସିରେ ପଚାରି ନ ଥିଲେ । ଦଳର ଲୋକସଭା ପ୍ରାର୍ଥୀ ଅରୂପ ପଟ୍ଟନାୟକଙ୍କ ଘର ଏହି ଏକାମ୍ର ନିର୍ବାଚନମଣ୍ଡଳୀରେ ହୋଇଥିଲେ ମଧ୍ୟ ତାଙ୍କୁ ପଚାରି ନ ଥିଲେ କି ସହଯୋଗ ନେଇ ନ ଥିଲେ ।

ଜନସଂପର୍କ ପଦଯାତ୍ରା ପାଇଁ ପ୍ରସ୍ତୁତ କୌଣସି ବ୍ୟାନର୍ ଓ ପୋଷ୍ଟରରେ ଅରୂପ ଏବଂ ଜିଲ୍ଲା ସଭାପତି ବାଇଁଆଙ୍କର ଫଟୋ କି ନାଁ ବି ଦେଖିବାକୁ ମିଳିଲା ନାହିଁ । ଏହାର ପ୍ରସ୍ତୁତକର୍ତ୍ତା ମନ୍ତ୍ରୀ ଅଶୋକ ପଣ୍ଡାଙ୍କର ସେଥିପାଇଁ ସାମାନ୍ୟତମ ସୌଜନ୍ୟତା ରହିଲା ନାହିଁ । ବ୍ୟାନରରେ ଅରୂପ କି ବାଇଁଆଙ୍କର ଫଟୋ ନ ରଖିବାକୁ ମନ୍ତ୍ରୀ ହ୍ୱିପ୍ ଜାରି କରିଥିବା କୁହାଯାଉଛି ।

ଆହୁରି ସଙ୍ଗୀନ କଥା ହେଉଛି, ଉତ୍ସବ ମଞ୍ଚରେ ଅରୂପ ଏବଂ ବାଇଁଆଙ୍କୁ ସମ୍ପୂର୍ଣ୍ଣ କୋଣଠେସା କରିଥିଲେ ମନ୍ତ୍ରୀ ପଣ୍ଡା । ଉତ୍ସବରେ ଜିଲ୍ଲା ସଭାପତି ସଭାପତିତ୍ୱ କରିବାର ପରମ୍ପରା ରହିଆସିଛି । ମାତ୍ର ଜିଲ୍ଲା ସଭାପତିଙ୍କୁ ପଛରେ ବସାଇ ମନ୍ତ୍ରୀ ନିଜେ ଏହି କାର୍ଯ୍ୟକ୍ରମର ପୁରୋହିତ ସାଜିଥିଲେ । ଜିଲ୍ଲା ସଭାପତିଙ୍କୁ ଭାଷଣ ଦେବାକୁ ସୁଯୋଗ ଦେଲେନାହିଁ କି ସ୍ୱାଗତ ଭାଷଣରେ ଜିଲ୍ଲା ସଭାପତିଙ୍କ ନାଁ ମନେ ପକାଇ ପାରିଲେନି । ଧନ୍ୟବାଦ ଦେବାକୁ ବି ତାଙ୍କୁ ଯୋଗ୍ୟ ମଣିଲେନି ମନ୍ତ୍ରୀ । ଗଂଜାମ ନେତା ପ୍ରଦୀପ ପାଣିଗ୍ରାହୀଙ୍କୁ ସେହି ସୁଯୋଗ ଦେଲେ । ତେବେ ଅରୂପଙ୍କ ସୌଭାଗ୍ୟ ହେଉ କି ଦୁର୍ଭାଗ୍ୟ ହେଉ, ମୁଖ୍ୟମନ୍ତ୍ରୀଙ୍କ ଆଗମନ ପୂର୍ବରୁ ମନ୍ତ୍ରୀ ଅଶୋକ ପଣ୍ଡା ତାଙ୍କୁ ସଭାମଞ୍ଚରେ ଭାଷଣ ଦେବାର ସୁଯୋଗ ଦେଇ ବାଆଁରେଇବାକୁ ଚେଷ୍ଟା କରିଥିଲେ ।

ମିିଳିଥିବା ସୂଚନା ଅନୁଯାୟୀ, କାର୍ଯ୍ୟକ୍ରମ ଆୟୋଜନର ବାହାବା ଏକା ନେବାକୁ ମନ୍ତ୍ରୀ ଅଶୋକ ପଣ୍ଡା ଜିଲ୍ଲା ସଂଗଠନର ସହଯୋଗ ଚାହିଁ ନ ଥିଲେ । ମଧ୍ୟ ବିଧାୟକ ଅନନ୍ତ ନାରାୟଣ ଜେନା ଏବଂ ଉତ୍ତର ବିଧାୟକ ସୁଶାନ୍ତ ରାଉତଙ୍କୁ ହାତରେ ରଖି ନିଜକୁ ସର୍ବେସର୍ବା କରିଛନ୍ତି । ମେୟରରୁ ବିଧାୟକ ବନିଥିବା ବିବାଦୀୟ ଅନନ୍ତ ଜେନାଙ୍କୁ ସେ ବହୁ ପୂର୍ବରୁ ପକେଟରେ ରଖି ସାରିଥିବା ବେଳେ ଠିକାଦାରି ବେପାରରୁ ବିଧାୟକ ବନିଥିବା ସୁଶାନ୍ତଙ୍କୁ ଏବେ ନୂଆ ନୂଆ କବଜା କରିଥିବା ଚର୍ଚ୍ଚା ହେଉଛି । କୁଆଡ଼େ ଏହି ତ୍ରିମୁଖୀଙ୍କ ଶୁଭଦୃଷ୍ଟିରେ ଜିଲ୍ଲା ସଂଗଠନ ନାହିଁ କି ୯୦ ଭାଗ ପୂର୍ବତନ କର୍ପୋରେଟର ନାହାନ୍ତି । ଆଗକୁ ବିଏମସି ନିର୍ବାଚନ ଥିବା ବେଳେ ମନ୍ତ୍ରୀ ଶ୍ରୀ ପଣ୍ଡା ସମସ୍ତଙ୍କୁ ସାଙ୍ଗରେ ନେଇ ଚାଲିବା ବଦଳରେ ଭୁବନେଶ୍ୱର ବିଜେଡ଼ିରେ ଗୋଷ୍ଠୀ ବିଭେଦ ସୃଷ୍ଟି କରି ଦଳକୁ ଛାରଖାର କରୁଥିବା ଅନେକ ଅଭିଯୋଗ କରିଛନ୍ତି ।

ସୂଚନାଯୋଗ୍ୟ, ଗତ ନିର୍ବାଚନରେ ଲୋକସଭା ପ୍ରାର୍ଥୀ ଅରୂପ ପଟ୍ଟନାୟକଙ୍କ ପରାଜୟ ପାଇଁ ଅଶୋକ ପଣ୍ଡା ଓ ଅନନ୍ତ ନାରାୟଣ ଜେନାଙ୍କ ଭୂମିକା ଉପରେ ସିଧାସଳଖ ଅଙ୍ଗୁଳି ଉଠିଛି । ଦଳୀୟ ଫୋରମ୍ ରେ ନିଜେ ଅରୂପ ଏହି କଥା ବାରମ୍ବାର ଉଠାଇଛନ୍ତି । ମାତ୍ର ତାଙ୍କ କଥାକୁ ହାଇକମାଣ୍ଡ ଗୁରୁତ୍ୱ ନ ଦେବା ଦଳୀୟ କର୍ମୀଙ୍କୁ ଆଚମ୍ବିତ କରିଛି । ଅଶୋକଙ୍କ ଏକଚାଟିଆ କାର୍ଯ୍ୟକଳାପ ଉପରେ ରୋକ୍ ଲଗାଇବା ପରିବର୍ତ୍ତେ ହାଇକମାଣ୍ଡ ଚୁପ୍ ରହି ତାଙ୍କ କାର୍ଯ୍ୟକୁ ପ୍ରଶୟ ଦେଉଥିବା ଅନେକଙ୍କର ଅନୁଭବ ହେଉଛି ।

ଶ୍ରୀ ପଣ୍ଡା ନିଜକୁ ମୁଖ୍ୟମନ୍ତ୍ରୀଙ୍କ ଖାସ୍ ଲୋକ ବୋଲାଉଥିବାରୁ ଡରରେ ଚୁପ୍ ରହିଥିବା ଛାମୁଆ ନେତାମାନେ ଆଉ ସମ୍ଭାଳିବା ଅବସ୍ଥାରେ ନାହାନ୍ତି । ଯେ କୌଣସି ମୁହୁର୍ତ୍ତରେ ଏହା ବିସ୍ଫୋରଣ ଘଟାଇବ ବୋଲି କର୍ମୀମହଲରୁ ଚେତାବନୀ ଦିଆଯାଇଛି ।