‘ଅହିଂସା’କୁ ସମ୍ବିଧାନରେ ଯୋଡିବା ସପକ୍ଷରେ ନବୀନ, ରାଷ୍ଟ୍ରପତି ଭବନରେ ଉଚ୍ଚ ପ୍ରଶଂସିତ

ନୂଆଦିଲ୍ଲୀ: ଭାରତର ସମ୍ବିଧାନକୁ ସଂଶୋଧନ କରି ଏହାର ମୁଖବନ୍ଧ(ପ୍ରିଅମ୍ବୁଲ)ରେ ‘ଅହିଂସା’କୁ ସ୍ଥାନିତ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରସ୍ତାବ ଆଜି ସାରା ଦେଶରେ ଚର୍ଚ୍ଚାର ବିଷୟ ହୋଇଛି । ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀ ସମାରୋହ ଉପଲକ୍ଷେ ରାଷ୍ଟ୍ରପତି ଭବନରେ ଆୟୋଜିତ ସମାରୋହରେ ଯୋଗଦେଇ ନବୀନ ଏହି ପ୍ରସ୍ତାବ ଦେଇଛନ୍ତି । ନବୀନଙ୍କ ପ୍ରସ୍ତାବକୁ ସେଠାରେ କରତାଳି ଦେଇ ସମସ୍ତେ ସମର୍ଥନ କରିଛନ୍ତି । ଉଚ୍ଚ ପ୍ରଶଂସା ବି କରିଛନ୍ତି । ଖାଲି ସେତିକି ନୁହେଁ ଦାରିଦ୍ର୍ୟ ଓ ସାମାଜିକ ଅନ୍ୟାୟକୁ ‘ହିଂସା’ର ଆଖ୍ୟା ଦେଇ ନବୀନଙ୍କ ଭାଷଣ ବେଶ ଆଦୃତଲାଭ କରିଛି ।

ରାଷ୍ଟ୍ରପତି ରାମ ନାଥ କୋବିନ୍ଦଙ୍କ ଅଧ୍ୟକ୍ଷତାରେ ଆୟୋଜିତ ସମାରୋହରେ ମୁଖ୍ୟମନ୍ତ୍ରୀ କହିଥିଲେ, ଅହିଂସା ହେଉଛି ସମ୍ପୂର୍ଣ୍ଣ ଭାବେ ଭାରତୀୟ ଚିନ୍ତାଧାରା । ଏହାକୁ ଭାରତୀୟ ସମ୍ବିଧାନରେ ସ୍ଥାନିତ କରିପାରିଲେ ତାହା ଗାନ୍ଧୀଜୀଙ୍କ ପ୍ରତି ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ । ମୁଖ୍ୟମନ୍ତ୍ରୀ ତାଙ୍କ ଭାଷଣରେ ଏହାର ଯଥାର୍ଥତା ରଖିଥିଲେ । କହିଥିଲେ, ମହାତ୍ମା ଗାନ୍ଧୀଙ୍କ ଅହିଂସା ସମ୍ପର୍କିତ ସିଦ୍ଧାନ୍ତର ଗୁରୁତ୍ୱପୂର୍ଣ୍ଣ ଦିଗ ହେଉଛି ଦାରିଦ୍ର୍ୟ ଓ ସାମାଜିକ ଅନ୍ୟାୟ । ଏହା ହିଁ ସବୁଠାରୁ ବଡ଼ ହିଂସା । ଯେ ପର୍ଯ୍ୟନ୍ତ ଦାରିଦ୍ର୍ୟ ଅଛି, ସେ ପର୍ଯ୍ୟନ୍ତ ସ୍ୱାଧୀନତାର ମାନେ ନାହିଁ । କୌଣସି ସରକାରଙ୍କ ପାଇଁ ସବୁଠାରୁ ବଡ଼ ଚାଲେଞ୍ଜ ହେଉଛି ଦାରିଦ୍ର୍ୟ ଦୂରୀକରଣ । ଅହିଂସା ବିନା ଏହା ହାସଲ କରିବା ସମ୍ଭବ ନୁହେଁ । ବିକାଶ ପାଇଁ ଶାନ୍ତି ଆବଶ୍ୟକ । ସମାଜକୁ ଜାତି, ଧର୍ମ ଓ ଶ୍ରେଣୀରେ ବିଭେଦ ସୃଷ୍ଟି କରୁଥିବା ଗୋଷ୍ଠୀ ବିକାଶରେ ପ୍ରତିବନ୍ଧକ ସାଜିଛନ୍ତି ।

ମୁଖ୍ୟମନ୍ତ୍ରୀ ଆହୁରି କହିଥିଲେ ଯେ ସମ୍ବିଧାନର ମୁଖବନ୍ଧରେ ଥିବା ସିଦ୍ଧାନ୍ତଗୁଡ଼ିକ ପାଶ୍ଚାତ୍ୟ ଚିନ୍ତାଧାରା ଉପରେ ଆଧାରିତ । ଭାରତୀୟ ପରମ୍ପରା ଓ ଦର୍ଶନର ନିଚ୍ଛକ ପ୍ରତିଫଳନ ‘ଅହିଂସା’ କୁ ସେଥିରେ ଯୋଡିବା ସପକ୍ଷରେ ମୁଖ୍ୟମନ୍ତ୍ରୀ ଯୁକ୍ତି ରଖିଥିଲେ । ତାହା ହିଁ ଗାନ୍ଧୀଜୀଙ୍କ ପ୍ରତି ଦେଶବାସୀଙ୍କ ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ ବୋଲି କହିଥିଲେ । ଏହାଦ୍ୱାରା କେବଳ ଭାରତ ନୁହେଁ, ସମଗ୍ର ବିଶ୍ୱର ଭବିଷ୍ୟତ ବଂଶଧରମାନେ ‘ଅହିଂସା’ର ବାସ୍ତବ ସତ୍ୟକୁ ହୃଦୟଙ୍ଗମ କରି ମନେ ରଖିବେ ବୋଲି ମୁଖ୍ୟମନ୍ତ୍ରୀ କହିଥିଲେ ।

ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ଆଜି ଦେଇଥିବା ଅଭିଭାଷଣକୁ ସେ ନିଜେ ଲେଖିଥିଲେ ।