ପୁଣି ମନେପଡ଼ିଲା ବିଧାନ ପରିଷଦ

ଭୁବନେଶ୍ୱର: ବୋଧହୁଏ ରାଜ୍ୟ ସରକାର ଭୁଲି ଯାଇଥିଲେ । କମିଟିର ଆଉ ନାଁ ଗନ୍ଧ ନ ଥିଲା । ହେଲେ ବିଧାନ ପରିଷଦ ଗଠନ ନେଇ ମୁଖ୍ୟମନ୍ତ୍ରୀ ହଠାତ ତତ୍ପରତା ଦେଖାଇଛନ୍ତି । ବିଧାନ ପରିଷଦ ଗଠନ ସମ୍ପର୍କରେ ସବିଶେଷ ଅନୁଧ୍ୟାନ ପାଇ ଗଠିତ କମିଟି ଆନ୍ଧ୍ର ପ୍ରଦେଶ ଓ ବିହାର ଗସ୍ତରେ ଯିବେ । ସେଠାକାର ବିଧାନ ପରିଷଦର ଗଠନ ପ୍ରଣାଳୀ ଓ କାର୍ଯ୍ୟଧାରା ସମ୍ପର୍କରେ ବିଶଦ ଅନୁଧ୍ୟାନ କରି କମିଟି ରିପୋର୍ଟ ପ୍ରଦାନ କରିବାକୁ ମୁଖ୍ୟମନ୍ତ୍ରୀ ଆଜି ନିର୍ଦ୍ଦେଶ ଦେଇଛନ୍ତି ।

ରାଜ୍ୟରେ ବିଧାନ ପରିଷଦ ଗଠନ ପାଇଁ ରାଜ୍ୟ ସରକାର ବହୁ ପୂର୍ବରୁ ଆଗ୍ରହ ଦେଖାଇଛନ୍ତି । ଏ ସମ୍ପର୍କରେ ସବିଶେଷ ଅନୁଧ୍ୟାନ ପାଇଁ ୨୦୧୫ ଜାନୁଆରୀ ୨ ତାରିଖରେ ୫ ଜଣିଆ କମିଟି ଗଠନର ସୂଚନା ଦେଲେ । ଜାନୁଆରୀ ୭ ତାରିଖରେ କମିଟି ସଦସ୍ୟଙ୍କ ନାଁ ଘୋଷଣା କଲେ । ବିଧାୟକ ଡାକ୍ତର ନୃସିଂହ ସାହୁଙ୍କ ଅଧ୍ୟକ୍ଷତାରେ ଏହି କମିଟିରେ ପ୍ରମିଳା ମଲ୍ଲିକ, ମନୋହର ରନ୍ଧାରୀ, ଭୁଜବଳ ମାଝୀ ଏବଂ ନିତିଶ ଗଙ୍ଗଦେବଙ୍କୁ ସଦସ୍ୟ ରଖାଗଲା । ବିଧାନ ପରିଷଦ ଅନୁଧ୍ୟାନ ପାଇଁ କମିଟି ଜାନୁଆରୀ ୩୧ ତାରିଖରେ ମହାରାଷ୍ଟ୍ର ଓ ଆନ୍ଧ୍ର ପ୍ରଦେଶ ଗଲେ । ସେଠାରୁ ଆସି ମୁଖ୍ୟମନ୍ତ୍ରୀଙ୍କୁ ରିପୋର୍ଟ ଦେଲେ । ଆହୁରି ଅନୁଧ୍ୟାନର ଆବଶ୍ୟକତା ରହିଛି ବୋଲି କମିଟି ଅଧ୍ୟକ୍ଷ ଡାକ୍ତର ନୃସିଂହ ସାହୁ ମନ୍ତବ୍ୟ ଦେଲେ । ମାତ୍ର କମିଟି ଆଉ ଅନୁଧ୍ୟାନ ପାଇଁ ଗଲେନି କି ରାଜ୍ୟ ସରକାରଙ୍କ ପକ୍ଷରୁ କୌଣସି ପଦକ୍ଷେପ ନିଆଗଲାନି । ପ୍ରସ୍ତାବିତ ବିଧାନ ପରିଷଦ କଥା ସମସ୍ତେ ଯେମିତି ପାଶୋରି ଗଲେ ।

ମାତ୍ର ସାଧାରଣ ନିର୍ବାଚନ ହାତରେ ଆଉ କେତେ ମାସ ଥିବା ବେଳେ ରାଜ୍ୟ ସରକାର ତତ୍ପର ହୋଇଛନ୍ତି । ବିହାର, ଜାମ୍ମୁ ଓ କାଶ୍ମୀର, ମହାରାଷ୍ଟ୍ର, କର୍ଣ୍ଣାଟକ, ଆନ୍ଧ୍ରପ୍ରଦେଶ ଓ ଉତ୍ତରପ୍ରଦେଶ ପରି ରାଜ୍ୟ ମାନଙ୍କରେ ବିଧାନ ପରିଷଦ ଗଠନ କରାଯାଇ ବିଭିନ୍ନ କ୍ଷେତ୍ରରେ ପ୍ରତିଷ୍ଠା ଲାଭ କରିଥିବା ବ୍ୟକ୍ତିମାନଙ୍କୁ ଆଇନ ପ୍ରଣୟନ ପ୍ରକ୍ରିୟାରେ ଭାଗ ନେବା ପାଇଁ ସୁଯୋଗ ସୃଷ୍ଟି କରାଯାଇଛି ବୋଲି ମନେ ପକାଇଛନ୍ତି । ଅର୍ଥାତ୍ ଓଡ଼ିଶାରେ ବି ବିଧାନ ପରିଷଦ ଗଠନ କରାଯାଇ ପ୍ରତିଷ୍ଠିତ ବ୍ୟକ୍ତିଙ୍କୁ ଆଇନ ପ୍ରଣୟନ ପ୍ରକ୍ରିୟାରେ ଭାଗିଦାର କରିବାର ସୁଯୋଗକୁ ସରକାର ଚାହିଁ ବସିଛନ୍ତି ବୋଲି ଜଣେଇ ଦିଆଯାଇଛି ।

ମୁଖ୍ୟମନ୍ତ୍ରୀଙ୍କ ଏଭଳି ପଦକ୍ଷେପକୁ ବିରୋଧୀ ଦଳ କିନ୍ତୁ ଭଲ ଦୃଷ୍ଟିରେ ଦେଖିନାହାନ୍ତି । ବିଜେଡ଼ି ନେତାଙ୍କୁ ଥଇଥାନ କରିବାକୁ ସରକାର ତତ୍ପର ହୋଇଛନ୍ତି ବୋଲି ବିଜେପି ଅଭିଯୋଗ କରିଛି । ତେବେ ଏହାକୁ ରାଜନୈତିକ ରଙ୍ଗ ଦେବା ଉଦ୍ୟମରୁ ବିରୋଧୀ କ୍ଷାନ୍ତ ରହିବାକୁ ବିଜେଡ଼ି ପରାମର୍ଶ ଦେଇଛି ।