କାଟତି ଫେରିପାଇଲେ ସଞ୍ଜୟ ଦାସବର୍ମା

ଯୋଜନା ବୋର୍ଡ ଉପାଧ୍ୟକ୍ଷ(କ୍ୟାବିନେଟ୍ ପାହ୍ୟା)ରେ ନିଯୁକ୍ତି

ଭୁବନେଶ୍ୱର: ପୂର୍ବତନ ମନ୍ତ୍ରୀ ତଥା ବିଜେଡ଼ିର ଟାଣୁଆ ନେତା ସଞ୍ଜୟ କୁମାର ଦାସବର୍ମାଙ୍କୁ ଯୋଜନା ବୋର୍ଡ ଉପାଧ୍ୟକ୍ଷ ପଦରେ ନିଯୁକ୍ତି ଦିଆଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ କ୍ୟାବିନେଟ୍ ପାହ୍ୟା ସହ ଏହି ଗୁରୁତ୍ୱପୂର୍ଣ୍ଣ ପଦରେ ନିଯୁକ୍ତି ଦେଇଛନ୍ତି । ଗତ ନିର୍ବାଚନରେ ବ୍ରହ୍ମଗିରି ଆସନରୁ ହାରିଯାଇଥିଲେ ସଞ୍ଜୟ । ଦଳ ପାଇଁ ବଡ଼ ଆସେଟ୍ କୁହାଯାଉଥିବା ଏହି ଟାଣୁଆ ନେତାଙ୍କୁ ସରକାରର କୌଣସି ଏକ ଗୁରୁତ୍ୱପୂର୍ଣ୍ଣ ପଦବୀରେ ଥଇଥାନ କରିବାକୁ ମୁଖ୍ୟମନ୍ତ୍ରୀ ଯୋଜନା କରୁଥିବା ବହୁ ପୂର୍ବରୁ ଶୁଣାଯାଉଥିଲା । ଯାହା ଆଜି ସତ ପ୍ରମାଣିତ ହୋଇଛି ।

ଯୋଜନା ବୋର୍ଡ ଉପାଧ୍ୟକ୍ଷ ପଦରେ ନିଯୁକ୍ତି ପାଇଲା ପରେ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ସଞ୍ଜୟ ଦାସବର୍ମା । ରାଜ୍ୟ ଯୋଜନା ବୋର୍ଡର ନୂଆ ରୂପରେଖ ପ୍ରସ୍ତୁତ କରାଯାଇ କ୍ରିୟାଶୀଳ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି । ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରି କାର୍ଯ୍ୟକ୍ରମ ଆରମ୍ଭ କରାଯିବ ବୋଲି କହିଛନ୍ତି ।

୨୦୦୯ ଏବଂ ୨୦୧୪ରେ ବ୍ରହ୍ମଗିରି ଆସନରୁ କଂଗ୍ରେସର ଟାଣୁଆ ନେତା ଲୁଲୁ ମହାପାତ୍ରଙ୍କୁ ହରାଇ ବିଧାୟକ ନିର୍ବାଚିତ ହୋଇଥିଲେ ସଞ୍ଜୟ । ଦ୍ୱିତୀୟ ଥରରେ ମନ୍ତ୍ରୀମଣ୍ଡଳରେ ସେ ସ୍ଥାନ ପାଇଥିଲେ । ଖାଦ୍ୟ ଓ ସାଧାରଣ ଯୋଗାଣ ବିଭାଗ ଦାୟିତ୍ୱରେ ସେ ନିଜର ଦକ୍ଷତା ଦେଖାଇଥିଲେ । ଦୀର୍ଘ ବର୍ଷ ଧରି ଯୁବ ବିଜେଡ଼ିର ନେତୃତ୍ୱ ସହ ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱରେ ସଂଗଠନକୁ ଶକ୍ତିଶାଳୀ କରିଥିଲେ । ଏଥର ନିର୍ବାଚନରେ ପରାଜିତ ହେଲା ପରେ ମୁଖ୍ୟମନ୍ତ୍ରୀ ତାଙ୍କ ଦକ୍ଷତାର ଉପଯୋଗ କରିବା ପାଇଁ ସଂଗଠନ ଦାୟିତ୍ୱ ଦେଇଥିଲେ । ବିଜେଡ଼ି ମୁଖ୍ୟାଳୟ(ସଂଗଠନ)ର ସାଧାରଣ ସମ୍ପାଦକ ଭାବେ ଏବେ ସେ ଦାୟିତ୍ୱ ତୁଲାଉଛନ୍ତି ।

ସଞ୍ଜୟଙ୍କୁ ମୁଖ୍ୟମନ୍ତ୍ରୀ ରାଜ୍ୟସଭା ପଠାଇବେ ବୋଲି ବିଭିନ୍ନ ଗଣମାଧ୍ୟମରେ ଚର୍ଚ୍ଚା ହେଉଥିଲା । ଏବେ ନୂଆ ନିଯୁକ୍ତି ପାଇଲା ପରେ ରାଜ୍ୟସଭା ଚର୍ଚ୍ଚାରୁ ତାଙ୍କ ନାଁ ହଟିଯାଇଛି ।