ଚୋରି ଗାଡ଼ିରେ ସପରିବାର ପୁରୀ ଭ୍ରମଣ କରିଥିଲେ ଥାନାବାବୁ

ଭୁବନେଶ୍ୱର: ଲକ୍ ଡାଉନ୍ ନିୟମକୁ ରାଜ୍ୟ ସରକାର କଡ଼ାକଡ଼ି କରିଥିବା ବେଳେ ତାହାକୁ କାର୍ଯ୍ୟକାରୀ କରିବା ଦାୟିତ୍ୱରେ ଥିବା ଜଣେ ଥାନା ବାବୁଙ୍କ କାରନାମା ଏବେ ଚର୍ଚ୍ଚାର ବିଷୟ ହୋଇଛି । ଯାଜପୁର ଜିଲ୍ଲା ବଡ଼ଚଣା ଥାନାର ଆଇଆଇସି ଦୀପକ ଜେନା ରବିବାର ସଂଧ୍ୟାରେ ନିଜ ପତ୍ନୀ ଏବଂ ଦୁଇ ଝିଅଙ୍କୁ ଧରି ଶ୍ରୀମନ୍ଦିର ଦର୍ଶନ ପାଇଁ ଯାଇଥିଲେ । ତାହା ପୁଣି ଲକ୍ ଡାଉନ୍ ଏବଂ ଶ୍ରୀମନ୍ଦିର ପ୍ରବେଶ କଟକଣା ଭାଙ୍ଗି । ତେବେ ଧରାପଡ଼ି ତୁରନ୍ତ ଚାକିରିରୁ ସସପେଣ୍ଡ ହୋଇଥିଲେ ମଧ୍ୟ ହଳିଦିଆ ବତୀ ଲଗାଇ ପୁରୀ ନେଇଥିବା ସ୍ପର୍ପିଓଟି ଚୋରା ଗାଡ଼ି ବୋଲି ଚାଞ୍ଚଲ୍ୟକର ତଥ୍ୟ ଆସିଛି ।

ଆଇଆଇସି ଶ୍ରୀ ଜେନା ଏକ ଧଳାରଙ୍ଗର ସ୍କର୍ପିଓ ନଂ ଓଆର-୦୫-ଏଏଫ୍ ୦୫୦୦ ରେ ପରିବାରକୁ ଧରି ପୁରୀ ବୁଲେଇ ନେଇଥିଲେ । ଗାଡ଼ି ଉପରେ ହଳଦିଆ ବତୀ ବି ଲଗାଇଥିଲେ । ତେବେ ଏହି ଗାଡ଼ିଟି ପୁଲିସର ନୁହେଁ କି ତାଙ୍କ ନିଜର ନୁହଁ । ଚୋରି ହୋଇଥିବା ଏକ ସିଜ୍ ଗାଡ଼ି କୁ ସେ ନିଜ ଭ୍ରମଣ ପାଇଁ ବ୍ୟବହାର କରିଥିବା ଜଣାପଡ଼ିଛି ।

କଟକର ଜଣେ ଠିକାଦାର ସୁକାନ୍ତ ଦଳେଇଙ୍କର ଏହି ଗାଡ଼ିଟିକୁ ଗତମାସ ୨୦ ତାରିଖରେ ବଡ଼ଚଣା ଅଞ୍ଚଳରୁ ଦୁବୃର୍ତ୍ତ ଛଡ଼ାଇ ନେଇଥିଲେ । ଦାଦାବଟି ନ ଦେବାରୁ ଏଭଳି କାଣ୍ଡ କରିଥିଲେ । ଶ୍ରୀ ଦଳେଇ ମାର୍ଚ୍ଚ ୨୧ ତାରିଖରେ ବଡ଼ଚଣା ଥାନାରେ ଗାଡ଼ି ଚୋରି ସମ୍ପର୍କରେ ଏତଲା ଦେଇଥିଲେ । ଗାଡ଼ି ଚୋରି କରିଥିବା ଦୁବୃର୍ତ୍ତ ଆଇଆଇସିଙ୍କର ଖାସ୍ ଲୋକ ବୋଲି ବି ଜାଣିବାକୁ ପାଇଥିଲେ ।

ଇତିମଧ୍ୟରେ ଗାଡ଼ିଟିକୁ ଥାନାରେ ଦେଖିଥିଲେ ଶ୍ରୀ ଦଳାଇ । ଗାଡ଼ିଟିକୁ ଫେରାଇ ଦେବା ପାଇଁ ଆଇଆଇସିଙ୍କୁ ଅନୁରୋଧ କରିଥିଲେ । ମାତ୍ର ଗାଡ଼ିଟିକୁ ଲକ୍ ଡାଉନ୍ ପରେ ଫେରାଯିବ ବୋଲି ଆଇଆଇସି ଶ୍ରୀ ଜେନା କହିଥିଲେ । ମାତ୍ର ଏହି ସିଜ୍ ଗାଡ଼ିଟିକୁ ଆଇଆଇସି ନିଜର କରି ଭ୍ରମଣ ପାଇଁ ବ୍ୟବହାର କରୁଥିବା ଏବେ ଅଭିଯୋଗ ହୋଇଛି ।

ଭକ୍ତଙ୍କ ପାଇଁ ଶ୍ରୀମନ୍ଦିର ଦ୍ୱାର ମାସେ ହେଲା ବନ୍ଦ ରହିଛି । ଘରୁ କେହି ନ ବାହାରିବା ପାଇଁ ଲକ୍ ଡାଉନ୍ କଟକଣା ବି ଲାଗିଛି । ମାତ୍ର ଏଭଳି ସମୟରେ ଥାନାବାବୁ ଡ୍ୟୁଟି ଛାଡ଼ି ପ୍ରାୟ ୧୨୦ କିମି ଦୂର ପୁରୀକୁ ପରିବାର ସହ ବୁଲି ଆସିଥିଲେ । ଶ୍ରୀମନ୍ଦିର ବାହାରେ ପୁଲିସର କଡ଼ା ପ୍ରହରା ସତ୍ତ୍ୱେ ଦକ୍ଷିଣଦ୍ୱାର ବାଟେ ଭିତରକୁ ପ୍ରବେଶ କରିଥିଲେ । କିଛି ସେବାୟତ ମଧ୍ୟ ସପରିବାରେ ତାଙ୍କୁ ମହାପ୍ରଭୁଙ୍କ ଦର୍ଶନ କରାଇଥିଲେ । ତେବେ ଖବର ପ୍ରଘଟ ହୋଇଯିବାରୁ ଡ୍ୟୁଟିରେ ଥିବା ହାବିଲଦାର ସିଂହଦ୍ୱାର ଥାନାକୁ ଜଣାଇଥିଲେ । ଆଉ ସିଂହଦ୍ୱାର ପୁଲିସ ସେମାନଙ୍କୁ ଥାନାକୁ ନେଇ ମାମଲା ରୁଜୁ କରିଥିଲା ।

ଏହି ଘଟଣାରେ ପୁଲିସ ଡିଜି ଶ୍ରୀ ଅଭୟ ତୁରନ୍ତ ଶ୍ରୀ ଜେନାଙ୍କୁ ଚାକିରିରୁ ସସପେଣ୍ଡ କରିଛନ୍ତି । ତେବେ ଆଜି ଚୋରି ଗାଡ଼ି ବ୍ୟବହାର କରିଥିବାର ନୂଆ ତଥ୍ୟ ସାମନାକୁ ଆସିବା ପରେ ମାମଲା ଆହୁରି ସଙ୍ଗୀନ ହୋଇଛି । ତାଙ୍କ ବିରୋଧରେ ଆଉ ଏକ ମାମଲା ରୁଜୁ ହୋଇଛି । ଶ୍ରୀ ଜେନାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ହେବ ବୋଲି ସୂଚନା ମିଳିଛି । ଅନ୍ୟପକ୍ଷରେ ଆଇଆଇସିଙ୍କୁ ଶ୍ରୀମନ୍ଦିର ଦର୍ଶନ କରାଇଥିବା ଜଣେ ସେବାୟତଙ୍କ ବିରୋଧରେ ପୁଲିସ ମାମଲା ରୁଜୁ କରି ଅଧିକ ତଦନ୍ତ ଚଳାଇଛି ।