ଟିକେଟ ପାଇଲେନି ଦେବାଶିଷ ନାୟକ, ଶଶୀ ବେହେରା

ଭୁବନେଶ୍ୱର: କଟକ ଲୋକସଭା ଆସନ ସମେତ ୯ଟି ବିଧାନସଭା ଆସନ ପାଇଁ ବିଜେଡ଼ି ପ୍ରାର୍ଥୀ ତାଲିକା ଘୋଷଣା ହୋଇଛି । କଟକରୁ ପୁନର୍ବାର ଭର୍ତ୍ତୃହରି ମହତାବଙ୍କୁ ପ୍ରାର୍ଥୀ କରାଯାଇଛି । ସବୁଠାରୁ ବଡ଼ କଥାଟି ହେଲା, ବରୀ ଆସନ ଦଖଲରେ ରହିଥିବା ଦେବାଶିଷ ନାୟକଙ୍କୁ ଏଥର ଟିକେଟ ଦେଇନାହାନ୍ତି ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ । ତାଙ୍କ ଜାଗାରେ ଜଣେ ନୂଆମୁହଁ ସୁନନ୍ଦା ଦାସଙ୍କୁ ନବୀନ ସୁଯୋଗ ଦେଇଛନ୍ତି । ସେହିଭଳି ଅର୍ଥମନ୍ତ୍ରୀ ଶଶୀଭୂଷଣ ବେହେରାଙ୍କ ଟିକେଟ କଟିଯାଇଛି । ତାଙ୍କ ଜାଗାରେ ଅରବିନ୍ଦ ଢ଼ାଲିଙ୍କୁ ଜୟଦେବ ଆସନକୁ ଫେରାଇ ଅଣାଯାଇଛି ।

ବେଗୁନିଆ ଆସନରୁ ବିଧାୟକ ପ୍ରଶାନ୍ତ ଜଗଦ୍ଦେବଙ୍କୁ ହଟାଯାଇ ଚିଲିକା ଆସନ ଦିଆଯାଇଛି । ବେଗୁନିଆରୁ ପ୍ରାର୍ଥୀ ହୋଇଛନ୍ତି ଖୋର୍ଦ୍ଧା ବିଧାୟକ ରାଜେନ୍ଦ୍ର ସାହୁ । ଖୋର୍ଦ୍ଧା ଆସନରୁ ଜିତୁ ମିତ୍ରଙ୍କୁ ପ୍ରାର୍ଥୀ କରିଛି ଦଳ । ନିକଟରେ ବିଜେପି ଛାଡ଼ି ବିଜେଡ଼ିରେ ଯୋଗଦେଇଥିଲେ ଶ୍ରୀ ମିତ୍ର । ସେହିଭଳି ବିଜେପି ଛାଡ଼ି ଆସିଥିବା ରାଜକିଶୋର ଦାସଙ୍କୁ ମୋରଡ଼ା ଆସନରୁ ପ୍ରାର୍ଥୀ କରାଯାଇଛି । ଏହି ଆସନରେ ଥିବା ବିଧାୟକ ପ୍ରବୀଣ ଚନ୍ଦ୍ର ଭଂଜଦେଓ ଆଜି ବିଜେଡ଼ିରୁ ଇସ୍ତଫା ଦେଇଥିଲେ । ବସ୍ତାରୁ ନିତ୍ୟାନନ୍ଦ ସାହୁ ପୁନର୍ବାର ପ୍ରାର୍ଥୀ ହୋଇଛନ୍ତି । ରାଇରଙ୍ଗପୁରରୁ ବାସନ୍ତୀ ମାରାଣ୍ଡି ପ୍ରାର୍ଥୀ ହୋଇଥିବା ବେଳେ ଦେବଗଡ଼ରୁ ରୋମାଞ୍ଚ ରଂଜନ ବିଶ୍ୱାଳ ପ୍ରାର୍ଥୀ ହୋଇଛନ୍ତି ।

ବିଜେଡ଼ି ପ୍ରାର୍ଥୀ ତାଲିକା
ଲୋକସଭା
କଟକ- ଭର୍ତ୍ତୃହରି ମହତାବ
ବିଧାନସଭା
ଚିଲିକା- ପ୍ରଶାନ୍ତ ଜଗଦ୍ଦେବ
ବେଗୁନିଆ- ରାଜେନ୍ଦ୍ର ସାହୁ
ଖୋର୍ଦ୍ଧା- ଜିତୁ ମିତ୍ର
ଜୟଦେବ- ଅରବିନ୍ଦ ଢ଼ାଲି
ବରି- ସୁନନ୍ଦା ଦାସ
ଦେବଗଡ଼- ରୋମାଞ୍ଚ ରଞ୍ଜନ ବିଶ୍ୱାଳ
ମୋରଡ଼ା- ରାଜକିଶୋର ଦାସ
ରାଇରଙ୍ଗପୁର- ବାସନ୍ତୀ ମାରାଣ୍ଡି
ବସ୍ତା- ନିତ୍ୟାନନ୍ଦ ସାହୁ