ବାରିପଦା: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଆଜି ସାମ୍ବାଦିକମାନେ ବାରିପଦାରେ ଭଲ କରି ପାନେ ଦେଇଛନ୍ତି । ଧର୍ମେନ୍ଦ୍ର ଡାକିଥିବା ସାମ୍ବାଦିକ ସମ୍ମିଳନୀକୁ ସାମ୍ବାଦିକମାନେ ବର୍ଜନ କରି ବିଜେପିର ଫୁଟାଣି ଭାଙ୍ଗିଛନ୍ତି । କ୍ଷମତା ଓ ଟଙ୍କା ସବୁଠି କାମ ଦିଏନି ଅନ୍ତତଃ ଏହି ବାର୍ତ୍ତା ସ୍ଥାନୀୟ ସାମ୍ବାଦିକମାନେ ଧର୍ମେନ୍ଦ୍ର ଓ ତାଙ୍କ ବିଜେପି ନେତାମାନଙ୍କୁ ଦେଇଛନ୍ତି ।
ବାରିପଦାରେ ଅନୁଷ୍ଠିତ ବିଜେପିର ଦୁଇଦିନିଆ ରାଜ୍ୟ କାର୍ଯ୍ୟକାରିଣୀର ଆଜି ଥିଲା ଶେଷ ଦିନ । ଆଜି ବୈଠକରେ ଉପସ୍ଥିତ ଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦିନ ଗୋଟାଏରେ ଏକ ସାମ୍ବାଦିକ ସମ୍ମିଳନୀ ଡାକିଥିଲେ । ସହିଦ ସ୍ମୃତି ଭବନସ୍ଥିତ କାର୍ଯ୍ୟକାରିଣୀ ବୈଠକ ଜାଗାରେ ଏହି ସାମ୍ବାଦିକ ସମ୍ମିଳନୀ ଡକାଯାଇଥିଲା । ପ୍ରବଳ ଖରା ସତ୍ତ୍ୱେ ସ୍ଥାନୀୟ ସାମ୍ବାଦିକମାନେ ନିର୍ଦ୍ଧାରିତ ସମୟରେ ସେଠାରେ ଉପସ୍ଥିତ ହୋଇଥିଲେ । ତେବେ ଗୋଟାଏ ଯାଇ ଦିଟା ଓ ତିନିଟା ହେଲା ପଛେ ଧର୍ମେନ୍ଦ୍ରଙ୍କୁ ସେଠାରେ ଦେଖିବାକୁ ମିଳିଲା ନାହିଁ । ଆମନ୍ତ୍ରିତ ସାମ୍ବାଦିକମାନଙ୍କୁ ବିଳମ୍ବ ସମ୍ପର୍କରେ କୌଣସି ସୂଚନା ଦିଆଗଲା ନାହିଁ । ଓଲଟି ସାମ୍ବାଦିକମାନେ ଜାଣିବାକୁ ଚାହିଁବାରୁ ବିଜେପିର କିଛି ନେତା ସେମାନଙ୍କୁ ସତେ ଯେମିତି ତାଙ୍କ ଘରର ଚାକର ଭଳି ବ୍ୟବହାର କରିଥିଲେ । ଏଥିରେ ସାମ୍ବାଦିକମାନେ ଉତକ୍ଷିପ୍ତ ହୋଇ ସେଠାରୁ ଚାଲିଯାଇଥିଲେ । ଧର୍ମେନ୍ଦ୍ର ସେ ଜାଗା ଆସିବା ବେଳକୁ ଆଉ କେଉଁ ସାମ୍ବାଦିକ ନ ଥିଲେ । ବିଚାରା ଧର୍ମେନ୍ଦ୍ର ଏଥିରେ ପ୍ରବଳ ଅପମାନିତ ହେଲେ । ଅନୋନ୍ୟପାୟ ହୋଇ ଯାହା କହିବା କଥା ଟ୍ୱିଟ୍ କରି ଜଣାଇଦେଲେ ।
ସମନ୍ୱୟର ଅଭାବ ଯୋଗୁଁ ଏଭଳି ଘଟିଲା ବୋଲି ବିଜେପି ପକ୍ଷରୁ ସଫେଇ ଦିଆଯାଇଛି । ଦଳର ମୁଖପାତ୍ର ସଜ୍ଜନ ଶର୍ମା କହିଛନ୍ତି, ଅନିବାର୍ଯ୍ୟ କାରଣଯୋଗୁଁ କାର୍ଯ୍ୟକାରିଣୀ ବୈଠକ ନିର୍ଦ୍ଧାରିତ ସମୟରେ ଶେଷ ହୋଇପାରିଲା ନାହିଁ । ଭୁଲ୍ ବୁଝାମଣା ହୋଇ ଏଭଳି ଘଟଣା ଘଟିଲା ବୋଲି କହି ଦଳ ଆଡୁ ଦୋଷ ଛଡ଼ାଇବାକୁ ଉଦ୍ୟମ କରିଛନ୍ତି । ତେବେ ଖାଲି ବାରିପଦା ନୁହେଁ, ଭୁବନେଶ୍ୱରରେ ବିଜେପିର ସଂକଳ୍ପ ସମାବେଶଠାରୁ ଆରମ୍ଭ କରି ବିଭିନ୍ନ ସମାବେଶରେ ସାମ୍ବାଦିକମାନଙ୍କୁ ଦଳର ନେତାଙ୍କ ର୍ଦୁବ୍ୟବହାର ମାମୁଲି ହୋଇଯାଇଛି । ତଥାକଥିିତ ଉତଥାନରେ ଅହଂକାର ହୋଇ ଗଣମାଧ୍ୟମକୁ ସେମାନଙ୍କ ଚାମଚା ବୋଲି ଭାବୁଛନ୍ତି । କ୍ଷମତା ନ ପାଉଣୁ ନେତାଙ୍କ ଆଚାର ବ୍ୟବହାର ଇନ୍ଦ୍ର ଚନ୍ଦ୍ର ଭଳି ହୋଇଛି । ଖାସ୍ କରି ଧର୍ମେନ୍ଦ୍ର ପ୍ରଧାନ ଓଡ଼ିଶାରେ ଏହି ଟ୍ରେଣ୍ଡ ଆରମ୍ଭ କରିଥିବା କୁହାଯାଉଛି ।