ଭୁବନେଶ୍ୱର: ସବୁ ପ୍ରତୀକ୍ଷା, କଳ୍ପନାଜଳ୍ପନାର ଅବସାନ ଘଟିଛି । ନିରଞ୍ଜନ ପଟ୍ଟନାୟକଙ୍କୁ ଆଜି ପିସିସି ସଭାପତି ଘୋଷଣା କରାଯାଇଛି । ବିଧାୟକ ନବ ଦାସ, ଚିରଞ୍ଜିବୀ ବିଶ୍ୱାଳ ଏବଂ ପ୍ରଦୀପ ମାଝୀ କାର୍ଯ୍ୟକାରୀ ସଭାପତି ହୋଇଥିବା ବେଳେ ଭକ୍ତଚରଣ ଦାସଙ୍କୁ ପ୍ରଚାର କମିଟି ଅଧ୍ୟକ୍ଷ ନିଯୁକ୍ତି ଦିଆଯାଇଛି । ଏମାନଙ୍କୁ ମିଶାଇ ୫ଟି କମିଟିର ସମୁଦାୟ ୧୨ ଜଣିଆ ଶକ୍ତିଶାଳୀ ଟିମ୍ ଧରିବେ କଂଗ୍ରେସ ମଙ୍ଗ । ଆଜି ଦିଲ୍ଲୀଠାରେ ରାହୁଲ ଗାନ୍ଧୀ ବିଭିନ୍ନ ନେତାଙ୍କ ସହ ତିନି ପର୍ଯ୍ୟାୟ ଆଲୋଚନା କଲା ପରେ ଏଆଇସିସି ପକ୍ଷରୁ ଏହି ନାଁ ଘୋଷଣା କରାଯାଇଛି ।
ନୂଆ ଟିମ୍ ରେ ଓଡ଼ିଶା ପ୍ରଭାରୀ ଜିତେନ୍ଦ୍ର ସିଂହ କୋଅର୍ଡିନେସନ୍ କମିଟିର ଅଧ୍ୟକ୍ଷ ହୋଇଛନ୍ତି । ଜଗନ୍ନାଥ ପଟ୍ଟନାୟକ ଏହି କମିଟିର ଆବାହକ ହୋଇଛନ୍ତି । କୋର୍ କମିଟି ଅଧ୍ୟକ୍ଷ ଜୟଦେବ ଜେନା ହୋଇଥିବା ବେଳେ ଆବାହକ ହୋଇଛନ୍ତି ଶରତ ପଟ୍ଟନାୟକ । ହେମାନନ୍ଦ ବିଶ୍ୱାଳ ଶୃଙ୍ଖଳା କମିଟି ଅଧ୍ୟକ୍ଷ ହୋଇଥିବା ବେଳେ ଶ୍ରୀକାନ୍ତ ଜେନାଙ୍କୁ ଇସ୍ତାହାର କମିଟି ଅଧ୍ୟକ୍ଷ କରାଯାଇଛି । ଶରତ ରାଉତଙ୍କୁ ଇସ୍ତାହାର କମିଟିର ଆବାହକ ନିଯୁକ୍ତି ଦିଆଯାଇଛି ।
ଓଡ଼ିଶାରରେ ପିସିସିର ନବକେଳବର ପାଇଁ ଏଥର ରାହୁଲ ଗାନ୍ଧୀ ବ୍ୟାପକ ବିଚାର ବିମର୍ଷ କରିଥିଲେ । ଦଳର ସବୁବର୍ଗର ନେତାଙ୍କ ସହ ତାଙ୍କର ଆଲୋଚନା ହୋଇଥିଲା । ନବ ଦାସ, ଚିରଞ୍ଜିବୀ ବିଶ୍ୱାଳ ଓ ପ୍ରଦୀପ ମାଝୀଙ୍କ ସହ ଆଜି ପ୍ରଥମେ ରାହୁଲ ଆଲୋଚନା କଲା ପରେ ନିରଞ୍ଜନ ପଟ୍ଟନାୟକଙ୍କ ସହ ପୃଥକ୍ ଆଲୋଚନା କରିଥିଲେ । ଶେଷରେ ସବୁ ନେତାଙ୍କୁ ଏକାଠି କରି ରାହୁଲ ଆଲୋଚନା କରିଥିଲେ । ଏହା ପରେ ନିରଞ୍ଜନ ପଟ୍ଟନାୟକଙ୍କ ନାଁରେ ମୋହର ମାରିଥିଲେ ରାହୁଲ ।
ପୂର୍ବରୁ ୨୦୧୧ ମସିହାରେ ନିରଞ୍ଜନ ପିସିସି ସଭାପତି ଦାୟିତ୍ୱ ନେଇଥିଲେ । ମାତ୍ର ୨୦୧୩ ପଣା ସଂକ୍ରାନ୍ତିରେ ହଠାତ୍ ତାଙ୍କୁ ହଟାଇ ଦିଆଯାଇଥିଲା । ନିରଞ୍ଜନଙ୍କ ସଭାପତିତ୍ୱ କାଳରେ କଂଗ୍ରେସ ବେଶ୍ ସକ୍ରିୟ ଓ ସଂଗଠିତ ହୋଇ ଆସୁଥିଲା । କର୍ମୀମାନଙ୍କ ମଧ୍ୟରେ ପ୍ରବଳ ଉତ୍ସାହ ଦେଖାଦେଇଥିଲା । ମାତ୍ର ତାଙ୍କର ବିଦାୟ ପରଠୁ କଂଗ୍ରେସ ଦିନକୁ ଦିନ ଦୁର୍ବଳ ହୋଇଯାଇଛି । ପିସିସି ସଭାପତି ଭାବେ ପ୍ରସାଦ ହରିଚନ୍ଦନ ସମ୍ପୂର୍ଣ୍ଣ ଫେଲ୍ ମାରିଛନ୍ତି । ତେବେ ନିରଞ୍ଜନ ଦ୍ୱିତୀୟ ଥର ସଭାପତି ଦାୟିତ୍ୱ ପାଇଥିବାରୁ କଂଗ୍ରେସ ମହଲରେ ପୁନର୍ବାର ଉତ୍ସାହ ସୃଷ୍ଟି ହୋଇଛି । ସବୁ ବର୍ଗର ବରିଷ୍ଠ ଓ ଅଭିଜ୍ଞ ନେତାଙ୍କୁ ନେଇ ନୂଆ ଟିମ୍ କରାଯାଇଥିବାରୁ ଓଡ଼ିଶାରେ କଂଗ୍ରେସ ପୁର୍ନଜୀବନ ପାଇଥିବା କୁହାଯାଉଛି ।
