ବୀର ସହିଦଙ୍କୁ ଶ୍ରଦ୍ଧାଞ୍ଜଳି; ସାରା ଦେଶ କାନ୍ଦିଲା,ଏକଜୁଟ ହେଲା

ନୂଆଦିଲ୍ଲୀ: ପୁଲୱାମା ଆତଙ୍କାବାଦୀ ହମଲାରେ ସହିଦ ହୋଇଥିବା ବୀର ଜବାନଙ୍କ ପାଇଁ ସାରା ଦେଶ କାନ୍ଦୁଛି । ୪୦ ଜଣ ବୀର ସନ୍ତାନଙ୍କୁ ହରାଇଥିବା ଦେଶବାସୀଙ୍କୁ ଆତଙ୍କବାଦ ବିରୋଧରେ ଲଢ଼ିବା ପାଇଁ ଏହା ଏକଜୁଟ କରିଦେଇଛି । “ବୀର ସହିଦଙ୍କୁ ଶ୍ରଦ୍ଧାଞ୍ଜଳି, ବ୍ୟର୍ଥ ଯିବନି ବଳିଦାନ”.. ଆଜି କୋଟି କୋଟି ଭାରତୀୟଙ୍କ ମନରେ ସ୍ପନ୍ଦନ ସୃଷ୍ଟି କରିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ସମେତ ସବୁ ରାଜନୈତିକ ଦଳର ନେତୃବୃନ୍ଦ ଏକାଠି ହୋଇଛନ୍ତି । ରାଜନୈତିକ ମତଭେଦ, ଜାତି, ଧର୍ମ ଭୁଲି ସବୁ ଭାରତୀୟ ଏହାର ଜବାବୀ ହମଲା ପାଇଁ ଆଜି ଏକଜୁଟ । ଆଉ ସହି ହେବନାହିଁ । ପାକିସ୍ଥାନକୁ ଜବାବ ଦେବାକୁ ହେବ ହିଁ ହେବ.. ଆଜି ସବୁ ଭାରତୀୟଙ୍କ ମୁହଁରୁ ଏଇ ଗୋଟିଏ ସ୍ୱର । ଆମ ବୀର ସନ୍ତାନଙ୍କ ପାଇଁ ଏହା ହିଁ ହେବ ଶ୍ରେଷ୍ଠ ଶ୍ରଦ୍ଧାଞ୍ଜଳି ।

ଆଜି ସଂଧ୍ୟାରେ ପୁଲୱାମା(ଦକ୍ଷିଣ କାଶ୍ମୀର)ରୁ ଦିଲ୍ଲୀ ଅଣାଯାଇଛି ୪୦ ବୀର ସିଆରପିଏଫ୍ ଜବାନଙ୍କ ପାର୍ଥିବ ଶରୀର । ସି-୧୩୦ ଜେ ସୁପର୍ ହରକ୍ୟୁଲେସ୍ ଏୟାରକ୍ରାଫ୍ଟ ଯୋଗେ ଏହି ପାର୍ଥିବ ଶରୀରଗୁଡ଼ିକ ଦିଲ୍ଲୀର ପାଲାମ ବିମାନବନ୍ଦରରେ ପହଞ୍ଚିଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ଗୃହମନ୍ତ୍ରୀ ରାଜନାଥ ସିଂ, ପ୍ରତିରକ୍ଷା ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ, ତିନି ସେନା ବାହିନୀର ମୁଖ୍ୟ ସେଠାରେ ଉପସ୍ଥିତ ରହି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସେନାବାହିନୀ ପକ୍ଷରୁ ସେମାନଙ୍କୁ ଗାର୍ଡ ଅଫ ଅନର୍ ଦିଆଯାଇଥିଲା । ଆସନ୍ତାକାଲି ପାର୍ଥିବ ଶରୀରଗୁଡ଼ିକୁ ସେମାନଙ୍କ ଘରକୁ ପଠାଯିବ ।

ପୁଲୱାମା ବର୍ବରକାଣ୍ଡକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଠୋର ହୋଇଛନ୍ତି । ପାକିସ୍ଥାନକୁ ଏହାର ପରିମାଣ ଭୋଗିବାକୁ ପଡ଼ିବ ବୋଲି ରୋକଠୋକ ଶୁଣାଇ ଦେଇଛନ୍ତି । ପାକିସ୍ଥାନ ଏଥର ବହୁତ ବଡ଼ ଭୁଲ୍ କରିଛି ବୋଲି ପ୍ରଧାନମନ୍ତ୍ରୀ କହିଛନ୍ତି । ସୁରକ୍ଷାକର୍ମୀଙ୍କୁ ପୂର୍ଣ୍ଣ ସ୍ୱାଧୀନତା ସହ ଖୋଲା ହାତରେ ଛାଡ଼ିଦେଇଛନ୍ତି ପ୍ରଧାନମନ୍ତ୍ରୀ । ବୀର ଜବାନଙ୍କ ମୃତ୍ୟୁର ସେମାନେ କଡ଼ା ଜବାବ ଦେବାକୁ ପ୍ରଧାନମନ୍ତ୍ରୀ ଆହ୍ୱାନ ଦେଇଛନ୍ତି । ଆଜି ସକାଳେ ସୁରକ୍ଷା ସମ୍ପର୍କିତ କ୍ୟାବିନେଟ୍ କମିଟି ବୈଠକ ଡାକିଥିଲେ ପ୍ରଧାନମନ୍ତ୍ରୀ । ସେଥିରେ ପାକିସ୍ଥାନକୁ ଦିଆଯାଇଥିବା ମୋଷ୍ଟ ଫେଭରଡ଼ ନେସନ୍ ମାନ୍ୟତାକୁ ପ୍ରତ୍ୟାହାର କରି ନିଆଯାଇଥିଲା ।

ସେପଟେ ସିଆରପିଏଫ୍ ବାହିନୀ ନଛୋଡ଼ବନ୍ଧା ହୋଇଉଠିଛନ୍ତି । ଆମେ ଏହି ଘଟଣାକୁ ଭୁଲିବୁନି କି ଛାଡ଼ିବୁନି ବୋଲି ସିଆରପିଏଫ ମୁଖ୍ୟ କହିଛନ୍ତି ।

ଓଡ଼ିଆ ବୀର ସହିଦଙ୍କ ପାଇଁ ଲୁହ:

ସହିଦ ହୋଇଥିବା ବୀର ଜବାନଙ୍କ ମଧ୍ୟରେ ଅଛନ୍ତି ଦୁଇ ଓଡ଼ିଆ ପ୍ରସନ୍ନ ସାହୁ ଓ ମନୋଜ ବେହେରା । ପ୍ରସନ୍ନ ଜଗତସିଂହପୁର ଜିଲ୍ଲାର ନାଉଗାଁ ଅଞ୍ଚଳର ହୋଇଥିବା ବେଳେ ମନୋଜ କଟକ ଜିଲ୍ଲା ନିଆଳି ଅଞ୍ଚଳର ଅଧିବାସୀ । ଏହି ଦୁଇ ବୀର ସହିଦଙ୍କ ପାଇଁ ସାରା ରାଜ୍ୟର କୋଣ ଅନୁକୋଣରେ ଦୁଃଖ ପ୍ରକାଶ ପାଇଛି । ରାଜ୍ୟବାସୀଙ୍କ ଆଖିରୁ ଲୁହ ଗଡ଼ିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସକାଳେ ଏହି ପ୍ରସନ୍ନଙ୍କ ମା ଏବଂ ମନୋଜଙ୍କ ଧର୍ମପତ୍ନୀଙ୍କ ସହ କଥା ହୋଇଥିଲେ । ପୁଲୱାମା ଘଟଣାକୁ ମୁଖ୍ୟମନ୍ତ୍ରୀ କଠୋର ଶବ୍ଦରେ ନିନ୍ଦା କରିଛନ୍ତି । ସହିଦଙ୍କ ନିକଟତମ ଆତ୍ମୀୟଙ୍କ ପାଇଁ ୧୦ ଲକ୍ଷ ଟଙ୍କା ଲେଖାଏଁ ଅନୁକମ୍ପା ଘୋଷଣା କରିଛନ୍ତି । ଦୁଇ ସହିଦଙ୍କ ପରିବାରକୁ ବ୍ୟକ୍ତିଗତ ଭାବେ ଭେଟି ସମବେଦନା ଜଣାଇବାକୁ ଅର୍ଥମନ୍ତ୍ରୀ ଶଶୀଭୂଷଣ ବେହେରା ଓ ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନାଙ୍କୁ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ ।

ଦେଶମାତୃକା ପାଇଁ ସହିଦ ହୋଇଥିବା ୪୦ ଜଣ ଜବାନଙ୍କ ତ୍ୟାଗ ଓ ବଳିଦାନକୁ ସମ୍ମାନ ଜଣାଇ ଆସନ୍ତାକାଲି(ଶନିବାର) ଦିନ ୧୧ଟା ସମୟରେ ରାଜ୍ୟର ସମସ୍ତ ଶିକ୍ଷାନୁଷ୍ଠାନମାନଙ୍କରେ ଦୁଇ ମିନିଟ୍ ନିରବ ପ୍ରାର୍ଥନା କରାଯିବ । ମୁଖ୍ୟମନ୍ତ୍ରୀ ଆଜି ଏହି ଅନୁରୋଧ କରିଛନ୍ତି ।