ବୋରିଗୁମ୍ମାର ଆଦିବାସୀ ଅପାଠୁଆ ମହିଳା ବନାମ ସହରୀ ପାଠୁଆ ମଣିଷ

ଭୁବନେଶ୍ୱର: ଉପରୋକ୍ତ ଫଟୋଟି ଉପରେ ନଜର ପକାନ୍ତୁ । କୋରାପୁଟ ବୋରିଗୁମ୍ମା ଅନ୍ତର୍ଗତ ଖୁନ୍ତିଆପଲା ଗାଁର ଏହି ଦୃଶ୍ୟ । ଗରା, ଡେକଚି ଧରି ନଳକୁଅରୁ ପାଣି ନେବାକୁ ଛିଡ଼ା ହୋଇଛନ୍ତି ଗାଁ ର ମା, ଭଉଣୀମାନେ । ଆଗ ପାଣି ନେବାକୁ ସେମାନଙ୍କ ମଧ୍ୟରେ ପ୍ରତିଯୋଗିତା, ଠେଲାପେଲା ହେଉନାହିଁ । ସାମାଜିକ ଦୂରତ୍ୱ ନିୟମକୁ କଡ଼ାକଡ଼ି ପାଳନ କରୁଛନ୍ତି ।

ବଡ଼କଥା ହେଲା, ନିୟମର ଅନୁପାଳନ ପାଇଁ ସେମାନଙ୍କୁ କେହି ନାଲି ଆଖି ଦେଖାଇନାହାନ୍ତି କି ପୁଲିସ ଜଗିକି ବସିନାହାନ୍ତି । ବରଂ ନିଜେ ନିଜେ ସଚେତନ ହୋଇ ନିୟମକୁ ଅକ୍ଷରେ ଅକ୍ଷରେ ମାନୁଛନ୍ତି । ନଳକୂପ ପାଖରେ ୨ ମିଟର ବ୍ୟବଧାନରେ ଗୋଲ୍ ବୁଲାଇ ନିର୍ଦ୍ଦିଷ୍ଟ ଜାଗା ବନାଇଛନ୍ତି । ମୋଟାମୋଟି କହିଲେ, ଶୃଙ୍ଖଳାର ସହ ସାମାଜିକ ଦୂରତ୍ୱ ନିୟମ ପାଳନ କରୁଛନ୍ତି ଏହି ଦୁର୍ଗମ ଆଦିବାସୀ ଇଲାକାର ଅଶିକ୍ଷିତ ମହିଳାମାନେ ।

ଏପଟେ ଆମ ରାଜଧାନୀ ଭୁବନେଶ୍ୱର, କଟକ, ଭଦ୍ରକ ଆଦି ସହରର ଦୃଶ୍ୟ ଟିଭିରୁ ସମସ୍ତେ ଦେଖୁଛନ୍ତି । ଦେଖିଲା ବେଳକୁ ମୁଣ୍ଡ ଲଜ୍ଜାରେ ତଳକୁ କରିଦେଉଛି । କରୋନାର ଏପିସେଣ୍ଟର ପାଲଟିଛି ଏହି ଭୁବନେଶ୍ୱର । ଏଠାରୁ କେବଳ ୩୨ ଜଣ କରୋନା ପଜିଟିଭ୍ ବାହାରିଲେଣି । ଭୁବନେଶ୍ୱର ସମେତ ସମଗ୍ର ଉପକୂଳ ଇଲାକାରେ ଏବେ ଆତଙ୍କର ଛାଇ । ସଂକ୍ରମଣ ଆଶଙ୍କାରେ ରାଜଧାନୀର ସୂର୍ଯ୍ୟନଗର, ବମିଖାଲ, ସୁନ୍ଦରପଦା, ଯଦୁପୁର ଭଳି ପ୍ରମୁଖ ଅଞ୍ଚଳଗୁଡ଼ିକ ସିଲ୍ ହୋଇସାରିଛି । ଭୁବନେଶ୍ୱର, କଟକ ଓ ଭଦ୍ରକ ସହରରେ ୪୮ ଘଣ୍ଟିଆ ସଟ୍ ଡାଉନ୍ ଗତକାଲି ସଂଧ୍ୟାରେ ଉଠିଛି । ଅତ୍ୟାବଶ୍ୟକ ସାମଗ୍ରୀ ପାଇଁ ଲୋକମାନେ ଦୋକାନରେ ଅଯଥା ଭିଡ଼ ନ କରି ସାମାଜିକ ଦୂରତ୍ୱ ରକ୍ଷା କରନ୍ତୁ ବୋଲି ମୁଖ୍ୟମନ୍ତ୍ରୀ ବାରମ୍ବାର ନିବେଦନ କରିଛନ୍ତି, କାଲି ବି କରିଥିଲେ । ନିୟମ ଉଲ୍ଲଂଘନକାରୀଙ୍କୁ କଡ଼ା ସତର୍କ ବି କରାଇଥିଲେ । ପ୍ରଶାସନ ପକ୍ଷରୁ ୨୪ ଘଣ୍ଟିଆ ସତର୍କ କରାଯାଉଛି । ରାସ୍ତାରେ ଲୋକମାନେ ଗାଡ଼ିମଟର ଧରି ନ ବୁଲିବା ଉପରେ କଟକଣା ଜାରି ହୋଇଛି । ନିୟମ ପାଳନକୁ ଜଗିବା ପାଇଁ ସାରା ସହରରେ ପୁଲିସ ଛାଉଣୀ ହୋଇଛନ୍ତି ।

ତେବେ ଆଜିର ଦୃଶ୍ୟ ଦେଖିବା ପରେ ଅବାକ୍ ଲାଗୁଛି । ଏତେ ସବୁ ପରେ ବି କିଛି ଲୋକ ନା ସଚେତନ ହେଉଛନ୍ତି ନା କଟକଣା ମାନୁଛନ୍ତି । ଆଜି ସକାଳୁ ସକାଳୁ ଭୁବନେଶ୍ୱର, କଟକ ସମେତ ରାଜ୍ୟର ପ୍ରମୁଖ ସହରଗୁଡ଼ିକରେ ଲୋକମାନେ ସଉଦା, ପନିପରିବା କିଣିବା ପାଇଁ ଅସମ୍ଭାଳ ଭିଡ଼ କରିଛନ୍ତି । ସାମାଜିକ ଦୂରତ୍ୱ ନିୟମକୁ କାଣିଚାଏ ମାନିନାହାନ୍ତି । ମୁଖ୍ୟମନ୍ତ୍ରୀଙ୍କ ନିବେଦନ, କାର୍ଯ୍ୟାନୁଷ୍ଠାନର ଚେତାବନୀ ବି ସେମାନଙ୍କୁ କାଟୁ କରିନି । ପୁଲିସର ନାଲିଆଖି, ମାଡ଼କୁ ସେମାନେ ଭୃକ୍ଷେପ କରିନାହାନ୍ତି । ପୂର୍ବରୁ ସହରରେ ସଟ୍ ଡାଉନ୍ ବେଳେ ବି ଅମାନିଆ, ଡିହ ଗାଲୁଆଙ୍କୁ ଦେଖିବାକୁ ମିଳିଥିଲା ।

ଏହି ଅମାନିଆ ସହରବାସୀ କେହି ମୁର୍ଖ, ଅଶିକ୍ଷିତ ନୁହଁନ୍ତି । ପାଠଶାଠ ପଢ଼ି କେହି ଏଠି ଚାକିରି କରିଛନ୍ତି ତ ଆଉ କେହି ଅନ୍ୟ ଧନ୍ଦା କରୁଛନ୍ତି । ହାତରେ ମୋବାଇଲ୍ ଧରୁଛନ୍ତି । ଘରେ ଟିଭି ଦେଖୁଛନ୍ତି । କରୋନା ମହାମାରୀର ଖବର ପ୍ରତି ମୁହୁର୍ତ୍ତରେ ରଖୁଛନ୍ତି । ସରକାରଙ୍କ ସଚେତନାର ବାର୍ତ୍ତା କାନରେ ଶୁଣୁଛନ୍ତି । ହେଲେ ନିଜକୁ ନିର୍ବୋଧ, ବଧିର କରିଦେଇଛନ୍ତି । ସଚେତନ ହୋଇ ନିୟମ ମାନିବା ବଦଳରେ ବେପରୁଆ ଓ ନିୟମଭଙ୍ଗ କରି ସମସ୍ତଙ୍କ ପାଇଁ ବିପଦର କାରଣ ହୋଇଛନ୍ତି । ନିଜର, ପରିବାରର ଏବଂ ରାଜ୍ୟବାସୀଙ୍କ ଜୀବନକୁ ବାଜି ଲଗାଇବାକୁ ସାହାସ କରୁଛନ୍ତି ।

ଗୋଟେ ପଟେ ସୁଦୂର ବୋରିଗୁମ୍ମା ଖୁନ୍ତିଆପଲା ଗାଁର ଦୃଶ୍ୟ । ଅନ୍ୟପଟେ ଭୁବନେଶ୍ୱର, କଟକ, ଭଦ୍ରକ ଆଦି ସହରର ପ୍ରମୁଖ ରାସ୍ତାଘାଟ ଓ ହାଟର ଦୃଶ୍ୟ । କିଏ ଶିକ୍ଷିତ, କିଏ ସଚେତନ ଏବଂ ସମାଜ ପାଇଁ କିଏ ଘାତକ ତାହା ଆଉ କହିବାର ଆବଶ୍ୟକତା ନାହିଁ । ଏହା ଯେତିକି ଲଜ୍ଜାଜନକ ସେତିକି ଦୁଃଖଦାୟକ ବୋଲି ସହରର ସଚେତନ ନାଗରିକମାନଙ୍କ ମତ ।

ସୂଚନାଯୋଗ୍ୟ, ଲକ୍ ଡାଉନ୍ ନିୟମ ଭାଙ୍ଗି ଗତ ୨୪ ଘଣ୍ଟାରେ ୪୨୭ ଜଣ ଗିରଫ ହୋଇଛନ୍ତି । ୨୪୯ଟି ମାମଲା ରୁଜୁ ହୋଇଛି । ଭୁବନେଶ୍ୱର ଓ କଟକରେ ୨ ହଜାରରୁ ଅଧିକ ଗାଡ଼ିକୁ ପୁଲିସ ସିଜ୍ କରିଛି ।