ଭୁବନେଶ୍ୱର: ରାଜ୍ୟର ସହରାଞ୍ଚଳରେ ସମୁଦାୟ କେତେ ବସ୍ତି ଅଛି ? ସେହି ବସ୍ତିଗୁଡ଼ିକରେ କେତେ ଭୂମିହୀନ ଅଛନ୍ତି ? ରାଜ୍ୟ ସରକାରଙ୍କ ଯୋଜନାରେ କେତେ ଭୂମିହୀନ ଉପକୃତ ହେବେ ? ସେମାନଙ୍କୁ ରାଜ୍ୟ ସରକାର କେଉଁଠୁ ଜାଗା ଦେବେ ? ସେଥିପାଇଁ କେତେ ରାଜସ୍ୱ ଜମି ଦରକାର ? ଯୋଜନା କାର୍ଯ୍ୟକାରୀ କରିବାକୁ କେତେ ଟଙ୍କା ଖର୍ଚ୍ଚ ହେବ ? ସହରାଞ୍ଚଳ ଭୂମିହୀନ ବସ୍ତିବାସିନ୍ଦାଙ୍କ ପାଇଁ ରାଜ୍ୟ କ୍ୟାବିନେଟ୍ ନେଇଥିବା ନିଷ୍ପତ୍ତିରେ ଏହି ପ୍ରଶ୍ନଗୁଡ଼ିକ ଅସମାହିତ ରହିଛି । ସରକାରଙ୍କ ପାଖରେ ତଥ୍ୟ ନାହିଁ । ବିନା ଆକଳନରେ ରାଜ୍ୟ ସରକାର ତରବରିଆ ଭାବେ ନିଷ୍ପତ୍ତି ଘୋଷଣା କରିଛନ୍ତି ।
ଖାଲି ସେତିକି ନୁହେଁ, କ୍ୟାବିନେଟ୍ ବୈଠକର ପ୍ରୋସିଡିଂ ତଳୁ ପୁଟ୍ ଅପ୍ ହୋଇ ମୁଖ୍ୟମନ୍ତ୍ରୀଙ୍କ ମୋହର ବାଜିବାକୁ ମାତ୍ର ଘଣ୍ଟାଏ ସମୟ ଲାଗିନି । ଘଣ୍ଟାକ ମଧ୍ୟରେ ରାଜ୍ୟପାଳଙ୍କ ପାଖକୁ ଫାଇଲ୍ ପଠାଇ ଦିଆଯାଇଛି । ପୌର ଭୋଟ ହାତେଇବା ପାଇଁ ସରକାର କେତେ ତତ୍ପର ତାହା ଏଥିରୁ ସ୍ପଷ୍ଟ ହୋଇଛି । ପୌର ନିର୍ବାଚନ ଘୋଷଣାକୁ ଆଉ ଯେ ଡେରି ନାହିଁ ତାହା ରାଜ୍ୟ ସରକାରଙ୍କ ତରବରିଆ ପଦକ୍ଷେପରୁ ସ୍ପଷ୍ଟ ହୋଇଯାଇଛି ।
ରାଜ୍ୟ ସରକାରଙ୍କ ନିଷ୍ପତ୍ତିକୁ ମୁଖ୍ୟମନ୍ତ୍ରୀ ଐତିହାସିକ କହିଥିଲେ ମଧ୍ୟ ସେଥିରେ କୌଣସି ନୂତନତ୍ୱ ନାହିଁ । ୨୦୧୨ ମସିହାରେ ସରକାର ସମାନ ନିଷ୍ପତ୍ତି ନେଇଥିଲେ ଏବଂ ମୁଖ୍ୟମନ୍ତ୍ରୀ ତାହାକୁ ଐତିହାସିକ ପଦକ୍ଷେପର ଆଖ୍ୟା ଦେଇଥିଲେ । ମିଳିଥିବା ସୂଚନା ଅନୁଯାୟୀ, ଗତ ପୌର ନିର୍ବାଚନ ପୂର୍ବରୁ ରାଜ୍ୟ ସରକାର ବସ୍ତିବାସିନ୍ଦାଙ୍କୁ ମନେଇବା ପାଇଁ ସ୍ଲମ୍ ଡୁଏଲର୍ ପ୍ରପର୍ଟି ରାଇଟସ୍ ୨୦୧୨ ବିଲ୍ ଆଣିଥିଲେ । ଆଜି କ୍ୟାବିନେଟ୍ ଯେଉଁ ନିଷ୍ପତ୍ତି ନେଇଛି ବିଲ୍ ରେ ଏକା ପ୍ରାବଧାନ ଥିଲା । ଚିଠା ପ୍ରସ୍ତାବଟି କ୍ୟାବିନେଟ୍ ମୋହର ପାଇଲା ପରେ ଯାଇଥିଲା ବିଧାନସଭା । ବିଧାନସଭାରେ ତାହା ଆଗତ ହୋଇଥିଲେ ମଧ୍ୟ ବିରୋଧୀ ଦଳର ଦାବିକ୍ରମେ ଅଧିକ ତର୍ଜମା ପାଇଁ ସିଲେକ୍ଟ କମିଟିକୁ ପଠାଯାଇଥିଲା । ନିୟମ କହୁଛି, ଗୋଟେ ବିଧାନସଭାର ୫ ବର୍ଷିଆ କାର୍ଯ୍ୟକାଳ ଭିତରେ ଆଗତ ବିଲ୍ ପାସ୍ ହେବା କଥା । ବିଧାନସଭା କାର୍ଯ୍ୟକାଳ ସରିଗଲେ ତାହା ଅକାମୀ ହୋଇଯିବା କଥା । ମାତ୍ର ଚତୁର୍ଦ୍ଦଶ ଯାଇ ପଞ୍ଚଦଶ ବିଧାନସଭା ସରିବାକୁ ବସିଥିଲେ ମଧ୍ୟ ସ୍ଲମ୍ ଡୁଏଲର୍ ପ୍ରପର୍ଟି ରାଇଟସ୍ ୨୦୧୨ ସେମିତି ପଡ଼ିରହିଛି । ମୂଳ ଫର୍ମାଟ୍ ରେ କାର୍ଯ୍ୟକ୍ଷମ ହୋଇପାରିନି । ଓଲଟି ୨୦୧୫ ରେ ଏକ ନୂଆ ଫର୍ମାଟ୍ ରେ ବିଲ୍ ଆସିଛି ।
ତେବେ ସେ ଯାହା ହେଉ, ସହରାଞ୍ଚଳ ଭୂମିହୀନ ବସ୍ତିବାସିନ୍ଦାଙ୍କ ପାଇଁ ଏତବଡ଼ ନିଷ୍ପତ୍ତି ଉପରେ ସରକାର ଆଦୌ ହୋମ୍ ୱାର୍କ କରିନାହାନ୍ତି । ଖୋଦ୍ ବିଭାଗୀୟ ମନ୍ତ୍ରୀଙ୍କୁ ଏ ବିଷୟରେ ଜମାରୁ ମାଲୁମ୍ ନାହିଁ । ଗତ ସପ୍ତାହରେ ବିଭାଗର ସଚିବ ଏକ ଇଂରାଜୀ ଖବରକାଗଜକୁ ସାକ୍ଷାତକାର ଦେଇ ପ୍ରସ୍ତାବିତ ଯୋଜନା ସମ୍ପର୍କରେ ନିଜର ଅଜ୍ଞତା ପ୍ରକାଶ କରିଥିଲେ । ଏହା ତାଙ୍କ ବିଭାଗର କାମ ନୁହେଁ, ରାଜସ୍ୱ ବିଭାଗର କାମ ବୋଲି ଓଲଟି ସଫେଇ ଦେଇଥିଲେ । ମାତ୍ର ସେହି ନଗର ଉନ୍ନୟନ ବିଭାଗ ଆଜି ଏହି ପଦକ୍ଷେପ ନେଇଛି । ନିଷ୍ପତ୍ତିଟି ଅତ୍ୟନ୍ତ ସ୍ୱାଗତଯୋଗ୍ୟ ହୋଇଥିଲେ ମଧ୍ୟ ସରକାର ଅତର୍ଚ୍ଛିଆ ହୋଇ ବିନା ତଥ୍ୟରେ ଅନ୍ଧାରରେ ବାଡ଼ି ବୁଲାଇଛନ୍ତି । ଭୋଟ ପାଇଁ ଲୋକଙ୍କୁ ଭୂଆଁ ବୁଲାଇଲା ଭଳି କଥା ହୋଇଛି ।
