ଭୁବନେଶ୍ୱର: ସରିଲା ପାଟକୁରା ନିର୍ବାଚନ । ସକାଳ ୭ଟାରୁ ଆରମ୍ଭ ହୋଇଥିବା ମତଦାନ ମୋଟାମୋଟି ଶାନ୍ତିପୂର୍ଣ୍ଣ ଭାବେ ଶେଷ ହୋଇଛି । ଅପରାହ୍ନ ୫ଟା ସୁଦ୍ଧା ୬୭% ମତଦାନ ହୋଇଥିବା ରାଜ୍ୟ ନିର୍ବାଚନ ଅଧିକାରୀ କହିଛନ୍ତି । ତେବେ ସଂଧ୍ୟା ୬ଟା ପରେ ମଧ୍ୟ ମତଦାନ କେନ୍ଦ୍ର ଭିତରେ ଭୋଟରଙ୍କ ଧାଡ଼ି ରହିଥିବାରୁ ଏହି ହାର ବଢ଼ିବ ବୋଲି କୁହାଯାଉଛି ।
ପାଟକୁରା ନିର୍ବାଚନ ଶେଷ ସହ ସିଲ୍ ହୋଇଛି ୧୦ ଜଣ ପ୍ରାର୍ଥୀଙ୍କ ଭାଗ୍ୟ । ତେବେ ୧୦ ଜଣ ପ୍ରାର୍ଥୀ ସେମାନଙ୍କ ଭାଗ୍ୟ ପରୀକ୍ଷା ଦେଇଥିଲେ ମଧ୍ୟ ବିଜେପି ପ୍ରାର୍ଥୀ ବିଜୟ ମହାପାତ୍ର ଏବଂ ବିଜେଡ଼ି ପ୍ରାର୍ଥୀ ସାବିତ୍ରୀ ଅଗ୍ରୱାଲ୍ ଙ୍କ ମଧ୍ୟରେ ମୁଖ୍ୟତଃ ଲଢ଼େଇ ହୋଇଛି । ଏପ୍ରିଲ୍ ୨୯ ରେ ହେବାକୁ ଥିବା ନିର୍ବାଚନ ଦୁଇଥରରେ ଜୁଲାଇ ୨୦କୁ ଘୁଞ୍ଚିବା ଯୋଗୁଁ ରାଜନୈତିକ ଦଳଗୁଡ଼ିକ ନିର୍ବାଚନ ପ୍ରଚାର ପାଇଁ ଲମ୍ବା ସମୟ ପାଇଥିଲେ ।
ସଂଖ୍ୟା ଦୃଷ୍ଟିରୁ ନିର୍ବାଚନ ଫଳାଫଳ ଦୁଇ ପ୍ରମୁଖ ଦଳ ପାଇଁ ଗୁରୁତ୍ୱ ରଖୁ ନ ଥିଲେ ମଧ୍ୟ ବିଜୟ ମହାପାତ୍ରଙ୍କୁ ଚେକ୍ ଦେବା ପାଇଁ ବିଜେଡ଼ି ସବୁ ଉଦ୍ୟମ ଖଟାଇଥିଲା । ଦଳୀୟ ପ୍ରାର୍ଥୀଙ୍କୁ ଜିତାଇବା ପାଇଁ ବିଜେଡ଼ି ପଲଟନ ପାଟକୁରାର ସବୁ ପଞ୍ଚାୟତରେ ଖେଦି ରହିଥିଲେ । ମାସେ କାଳ ମନ୍ତ୍ରୀ, ବିଧାୟକ ଡେରା ପକାଇଥିଲେ । ପ୍ରଚାର ଶେଷର ଦିନକ ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ରୋଡ ସୋ କରି ନିଜ ପ୍ରାର୍ଥୀଙ୍କ ପାଇଁ ଭୋଟ ଭିକ୍ଷା କରିଥିଲେ ।
ଅନ୍ୟପକ୍ଷରେ ଏହି ଆସନଟି ବିଜେପି ପାଇଁ ଯେତିକି ଗୁରୁତ୍ୱପୂର୍ଣ୍ଣ ନୁହେଁ, ପ୍ରାର୍ଥୀ ବିଜୟ ମହାପାତ୍ରଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିଛି । ୨୦୦୦ ମସିହାରୁ ବିଧାନସଭା ମାଡ଼ି ନ ଥିବା ବିଜୟଙ୍କ ପାଇଁ ଏହା ଶେଷ ସୁଯୋଗ ବୋଲି ବିଚାର କରାଯାଉଛି । ଜିତିଲେ ତାଙ୍କର ପୂର୍ବ ସ୍ଥିତି ଫେରି ପାଇପାରନ୍ତି, ହାରିଲେ ତାଙ୍କ କ୍ୟାରିୟର୍ ଖତମ୍ ବୋଲି ବୁଝିବାକୁ ପଡ଼ିବ । ବିଜେଡ଼ି ପ୍ରାର୍ଥୀଙ୍କ ଭଳି ତାଙ୍କ ପଛରେ ଦଳୀୟ ବଳର ଅନୁଭବ ହୋଇ ନ ଥିଲେ ମଧ୍ୟ ସ୍ୱାଭିମାନର ନାରା ଦେଇ ଭୋଟରଙ୍କ ଅନୁକମ୍ପା ହାସଲ ପାଇଁ ଉଦ୍ୟମ କରିଛନ୍ତି ବିଜୟ ମହାପାତ୍ର ।
ତେବେ କାହା ସପକ୍ଷରେ ପାଟକୁରାବାସୀ ସେମାନଙ୍କ ରାୟ ଶୁଣାଇଛନ୍ତି, ଆସନ୍ତା ୨୪ ତାରିଖରେ ଭେଟ ବାକ୍ସ ଖୋଲିଲା ପରେ ଜଣାପଡ଼ିବ ।
