ସାମ୍ବାଦିକମାନଙ୍କ ସମସ୍ୟା ବୁଝିଲେ ସରକାର

ଭୁବନେଶ୍ୱର: ରାଜ୍ୟରେ କାର୍ଯ୍ୟରତ ସାମ୍ବାଦିକମାନଙ୍କ ସମସ୍ୟା ବୁଝିଛନ୍ତି ରାଜ୍ୟ ସରକାର । ନିକଟରେ ୨ ଲକ୍ଷ ଟଙ୍କାର ସ୍ୱାସ୍ଥ୍ୟବୀମା ଯୋଜନା କାର୍ଯ୍ୟକାରୀ କରିଥିବା ରାଜ୍ୟ ସରକାର ଆଜି ପୁଣି ଅନେକ ବଡ଼ ଯୋଜନା ଘୋଷଣା କରିଛନ୍ତି । ସବୁଠାରୁ ବଡ଼ ଯୋଜନାଟି ହେଲା କାର୍ଯ୍ୟରତ ସାମ୍ବାଦିକଙ୍କର ମୃତ୍ୟୁ ହେଲେ ତାଙ୍କ ପରିବାରକୁ ସରକାର ୪ ଲକ୍ଷ ଟଙ୍କା ସହାୟତା ଦେବେ ।  ସେହିଭଳି …

• ଦୂରାରୋଗ୍ୟରେ ପୀଡ଼ିତ ସାମ୍ବାଦିକଙ୍କ ଚିକିତ୍ସା ପାଇଁ ୨ ଲକ୍ଷ ଟଙ୍କାର ସ୍ୱାସ୍ଥ୍ୟ ବୀମା ସହ ଅଧିକ ଅଧିକ ଅର୍ଥ ଡିଏମଇଟିଙ୍କ ଅନୁମୋଦନକ୍ରମେ ଯୋଗାଇ ଦିଆଯିବ ।

• ସାମ୍ବାଦିକମାନେ ଘର କିଣିବା ପାଇଁ ୨୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ କଲେ ରାଜ୍ୟ ସରକାର ୩ ପ୍ରତିଶତ ସୁଧ ସହାୟତା ଦେବେ ।

• ୪ ଲକ୍ଷ ଟଙ୍କା ପର୍ଯ୍ୟନ୍ତ ଚାରି ଚକିଆ ଗାଡ଼ି କିଣିଲେ ୩ ପ୍ରତିଶତ ସୁଧ ରାଶି ସହାୟତା ଦେବେ ସରକାର ।

• ୫୦ ହଜାର ଟଙ୍କା ପର୍ଯ୍ୟନ୍ତ ଦୁଇଚକିଆ ଗାଡ଼ି କ୍ରୟ ଉପରେ ୩ ପ୍ରତିଶତ ସୁଧ ସହାୟତା ମିଳିବ ।

• ଦୁର୍ଘଟଣା କିମ୍ବା କୌଣସି ରୋଗରେ ସାମ୍ବାଦିକ ଅଚଳ ହୋଇଗଲେ ୨ ଲକ୍ଷ ଟଙ୍କାର ଆର୍ଥିକ ସହାୟତା ମିଳିବ ।

• ମୃତ ସାମ୍ବାଦିକଙ୍କ ସନ୍ତାନଙ୍କୁ ଦଶମ ଶ୍ରେଣୀ ପର୍ଯ୍ୟନ୍ତ ମାସିକ ୧୫୦୦ ଟଙ୍କା ଏବଂ ଉଚ୍ଚଶିକ୍ଷା ପାଇଁ ମାସିକ ୨୫୦୦ ଟଙ୍କା ପଢ଼ାଖର୍ଚ୍ଚ ମିଳିବ ।

• ୨୫ ବର୍ଷରୁ ୩୫ ବର୍ଷର ସାମ୍ବାଦିକମାନେ ଟ୍ରେନିଂ ନେବାକୁ ଚାହିଁଲେ ସରକାର ୧୦ ହଜାର ଟଙ୍କା ପର୍ଯ୍ୟନ୍ତ ଆର୍ଥିକ ସହାୟତା ପ୍ରଦାନ କରିବେ ।

ଆଜି ମୁଖ୍ୟମନ୍ତ୍ରୀ ଏହି ଯୋଜନାକୁ ଅନୁମୋଦନ ଦେବା ପରେ ସୂଚନା ଓ ଲୋକସମ୍ପର୍କ ମନ୍ତ୍ରୀ ପ୍ରତାପ ଜେନା ଗଣମାଧ୍ୟମରେ ଘୋଷଣା କରିଥିଲେ । ଜୁନ୍ ୧ ତାରିଖରୁ ଏହିସବୁ ଯୋଜନା କାର୍ଯ୍ୟକାରୀ ହେବ ବୋଲି ସେ ସୂଚନା ଦେଇଛନ୍ତି । ଗତ ସପ୍ତାହରେ ରାଜ୍ୟ ସରକାର କାର୍ଯ୍ୟରତ ସାମ୍ବାଦିକଙ୍କ ପାଇଁ ‘ଗୋପବନ୍ଧୁ ସାମ୍ବାଦିକ ସ୍ୱାସ୍ଥ୍ୟବୀମା ଯୋଜନା’ ଘୋଷଣା କରିଥିଲେ । ଏହି ଯୋଜନାରେ ସାମ୍ବାଦିକଙ୍କୁ ୨ ଲକ୍ଷ ଟଙ୍କାର ସ୍ୱାସ୍ଥ୍ୟ ବୀମାରେ ଅନ୍ତର୍ଭୁକ୍ତ କରାଯାଇଛି । ପ୍ରଥମ ପର୍ଯ୍ୟାୟରେ ରାଜ୍ୟର ୩୨୩୩ କାର୍ଯ୍ୟରତ ସାମ୍ବାଦିକଙ୍କୁ ସାମିଲ କରାଯାଇଛି ।