ଅନନ୍ତ ଜେନାଙ୍କ ଉପରେ ବୋମାମାଡ଼

ଭୁବନେଶ୍ୱର: ଦୁର୍ବୃତ୍ତଙ୍କ ବୋମାମାଡ଼ରେ ଭୁବନେଶ୍ୱର ମଧ୍ୟ ଆସନର ବିଜେଡ଼ି ପ୍ରାର୍ଥୀ ଅନନ୍ତ ନାରାୟଣ ଜେନା ଗୁରୁତର ଆହତ ହୋଇଛନ୍ତି । ତାଙ୍କୁ କ୍ୟାପିଟାଲ୍ ହସ୍ପିଟାଲ୍ ରେ ଭର୍ତ୍ତି କରାଯାଇଛି । ଅନନ୍ତଙ୍କ ସହଯୋଗୀ ଟିମା ମଧ୍ୟ ଗୁରୁତର ଆହତ ହୋଇଛନ୍ତି । ଦୁର୍ବୃତ୍ତମାନେ ବୋମାମାଡ଼ କରିବା ପରେ ତାଙ୍କୁ ଖଣ୍ଡାରେ ହାଣି ଥିବା ଅଭିଯୋଗ ହୋଇଛି । ଅନନ୍ତଙ୍କ ଉପରେ ଆକ୍ରମଣ ଖବର ପାଇ ତାଙ୍କର ସମର୍ଥକମାନେ କ୍ୟାପିଟାଲ୍ ହସ୍ପିଟାଲ୍ ରେ ରୁଣ୍ଡ ହୋଇଛନ୍ତି ।

ଅନନ୍ତଙ୍କ ଉପରେ ଆକ୍ରମଣ ହେବାର ଦୁଇଘଣ୍ଟା ପୂର୍ବରୁ ତାଙ୍କର ବିଜେପି ପ୍ରତିଦ୍ୱନ୍ଦୀ ଜଗନ୍ନାଥ ପ୍ରଧାନଙ୍କ ଗାଡ଼ି ଉପରେ ବୋମାମାଡ଼ ହୋଇଥିଲା । ଡେଲଟା ଛକ ନିକଟରେ କିଛି ଦୁର୍ବୃତ୍ତ ତାଙ୍କ ଗାଡ଼ି ଉପରକୁ ବୋମା ଫିଙ୍ଗିଥିଲେ । ଏଥିରେ ଜଗନ୍ନାଥଙ୍କ ଦେହରେ ଆଘାତ ଲାଗିଛି । ମଧ୍ୟ ଆସନର ଦୁଇ ପରଷ୍ପର ପ୍ରତିଦ୍ୱନ୍ଦୀଙ୍କ ଉପରେ ଆକ୍ରମଣକୁ ନେଇ ସହରରେ ତୀବ୍ର ଉତ୍ତେଜନା ସୃଷ୍ଟି ହୋଇଛି । ଦୁଇପକ୍ଷ ଛକାଛକି ହୋଇ ରହିଥିବାରୁ ଅଶାନ୍ତ ହୋଇପଡ଼ିଛି ଭୁବନେଶ୍ୱର ।

ରବିବାର ରାତି ୧୦ଟା ପାଖାପାଖି ବେଳକୁ ବିଜେଡ଼ି ପ୍ରାର୍ଥୀ ଅନନ୍ତ ଜେନା ତାଙ୍କର ସହଯୋଗୀ ଟିମାଙ୍କୁ ଧରି ଏକ ମାରୁତି ୮୦୦ କାର୍ (ଓଆର ୦୨ ୧୪୦୪)ରେ ଝାରପଡ଼ା ଯାଇଥିଲେ । କେନାଲ ରୋଡ଼ରେ ଫେରୁଥିବା ବେଳେ କିଛି ଦୁର୍ବୃତ୍ତ ଏକ ମଟରସାଇକେଲରେ ଆସି ଗାଡ଼ି ଉପରକୁ ବୋମା ଫିଙ୍ଗିଥିଲେ । ଗାଡ଼ିର ପଛକାଚ ଦେଇ ଗୋଟିଏ ବୋମା ସିଧା ଯାଇ ବାଜିଥିଲା ଅନନ୍ତ ଓ ତାଙ୍କ ସହଯୋଗୀଙ୍କ ଉପରେ । ଏଥିରେ ଅନନ୍ତଙ୍କ ମୁଣ୍ଡପଛ ଗୁରୁତର ଆଘାତ ହୋଇଛି । ସହଯୋଗୀ ଟିମାଙ୍କ ଅବସ୍ଥା ଅଧିକ ଗୁରୁତର ହୋଇଛି । ଅଭିଯୋଗ ଅନୁଯାୟୀ ଦୁର୍ବୃତ୍ତମାନେ ବୋମାମାଡ଼ କରିବା ପରେ ଖଣ୍ଡାରେ ଆକ୍ରମଣ କରିଥିଲେ । ଖଣ୍ଡା ଆକ୍ରମଣରୁ ଅନନ୍ତ ବର୍ତ୍ତି ଯାଇଥିବା ବେଳେ ଟିମାଙ୍କ ଦେହରେ ଶକ୍ତ ଚୋଟ ଲାଗିଛି ।

ସଂଧ୍ୟାରେ ଜଗନ୍ନାଥ ପ୍ରଧାନଙ୍କ ଉପରେ ଆକ୍ରମଣ ଖବର ପାଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବିଜେପି ଲୋକସଭା ପ୍ରାର୍ଥୀ ଅପରାଜିତା ଷଡ଼ଙ୍ଗୀ ପ୍ରମୁଖ କ୍ୟାପିଟାଲ୍ ହସ୍ପିଟାଲ୍ ରେ ପହଞ୍ଚିଥିଲେ । ବିଜେଡ଼ି ଆତଙ୍କରାଜ ଚଳାଇଥିବା ସେମାନେ ଅଭିଯୋଗ କରିଛନ୍ତି । ଅନ୍ୟପକ୍ଷରେ ଏହି ସବୁ ବୋମାମାଡ଼ ପଛରେ ଧର୍ମେନ୍ଦ୍ର ପ୍ରଧାନଙ୍କ ହାତ ଥିବା ବିଜେଡ଼ି ପାଲଟା ଅଭିଯୋଗ କରିଛି । ବିଜେଡ଼ିକୁ ବଦନାମ କରିବା ଲକ୍ଷ୍ୟରେ ନିର୍ବାଚନରେ ହିଂସାକାଣ୍ଡ ସୃଷ୍ଟି କରିବାକୁ ଧର୍ମେନ୍ଦ୍ର ପୂର୍ବରୁ ମସୁଧା କରିଥିବା ବିଜେଡ଼ି କହିଛି ।