ଅପରାଜିତାଙ୍କୁ ନେଇ ଧର୍ମେନ୍ଦ୍ର-ବିଜେଡ଼ି ଲଢ଼େଇ

ଭୁବନେଶ୍ୱର: ବିଜେପିରେ ମିଶିଥିବା ବ୍ୟୁରୋକ୍ରାଟ୍ ଶ୍ରୀମତୀ ଅପରାଜିତା ଷଡ଼ଙ୍ଗୀଙ୍କୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେଡ଼ି ଲଢ଼ାଲଢ଼ି ହୋଇଛନ୍ତି । ଅପରାଜିତାଙ୍କୁ ବିଜେପି ପକ୍ଷରୁ ଆଜି ଦିଆଯାଇଥିବା ସ୍ୱାଗତ ସମ୍ବର୍ଦ୍ଧନା ଉତ୍ସବ ଅବସରରେ ଧର୍ମେନ୍ଦ୍ର କହିଥିଲେ, ସ୍ୱେଚ୍ଛାକୃତ ଅବସର ଯୋଜନା(ଭିଆରଏସ୍) ରେ ଶ୍ରୀମତୀ ଷଡ଼ଙ୍ଗୀଙ୍କ ଆବେଦନକୁ ରାଜ୍ୟ ସରକାର ୨ ମାସ ବିଳମ୍ବ କରିଥିଲେ । ତେବେ ଧର୍ମେନ୍ଦ୍ରଙ୍କ ଏହି ମନ୍ତବ୍ୟ ଉପରେ ପ୍ରତିକ୍ରିୟା ରଖିଛି ବିଜେଡ଼ି । ଦଳର ମୁଖପାତ୍ର ଶ୍ରୀମତୀ ସୁଲୋଚନା ଦାସ କହିଛନ୍ତି, ଧର୍ମେନ୍ଦ୍ରଙ୍କ ଅଭିଯୋଗ ଭିତ୍ତିହୀନ, ଅସତ୍ୟ ଓ ତଥ୍ୟ ଉପରେ ଆଧାରିତ ନୁହେଁ । ଶ୍ରୀମତୀ ଷଡ଼ଙ୍ଗୀ ସଂଯୁକ୍ତ ରାଷ୍ଟ୍ରର ଏକ ସମାଜସେବୀ ଏନଜିଓରେ କାର୍ଯ୍ୟ କରିବାକୁ କହି ସ୍ୱେଚ୍ଛାକୃତ ଅବସର ଚାହିଁଥିଲେ । ଏହା ସେ ତାଙ୍କ ଆବେଦନରେ ଜଣାଇଥିଲେ । କିନ୍ତୁ କିଛି ଦିନ ପରେ ସେ ବିଜେପିରେ ଯୋଗଦେଇଥିବାରୁ ତାଙ୍କ ମିଛ ଧରାପଡ଼ିଲା । ଏପ୍ରକାର ମିଥ୍ୟାବାଦିତା ତାଙ୍କଠାରୁ ଆଶା କରାଯାଏନି ଏବଂ ଏ ପ୍ରକାର ଅସତ୍ୟ ବକ୍ତବ୍ୟ ଅତ୍ୟନ୍ତ ଦୁର୍ଭାଗ୍ୟଜନକ ଓ ଦୁଃଖଦାୟକ ।

କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଓଡ଼ିଆ ସ୍ୱାଭିମାନ ବିଷୟରେ ଅନେକ କଥା କହୁଛନ୍ତି । ଏବଂ ଅଣଓଡ଼ିଆ ଅଫିସରମାନଙ୍କୁ କଟୁ ଭାଷାରେ ଲାଂଛିତ କରନ୍ତି । କିନ୍ତୁ ଶ୍ରୀମତୀ ଷଡ଼ଙ୍ଗୀଙ୍କ ଭଳି ଜଣେ ଅଣଓଡ଼ିଆ ବିହାରୀ ଅଫିସରଙ୍କୁ ବିଜେପିରେ ସାମିଲ କରାଇଲେ । ରାଜ୍ୟ ବିଜେପିରେ ଓଡ଼ିଆ ରାଜନେତାଙ୍କ କ’ଣ ଏମିତି ଦୁର୍ଭିକ୍ଷ ପଡ଼ିଲା ଯେ ଜଣେ ଅଣଓଡ଼ିଆ ବିହାରୀ ଅଫିସରଙ୍କୁ ଆଣିବାକୁ ପଡ଼ିଲା ବୋଲି ବିଜେଡ଼ି ପକ୍ଷରୁ ପ୍ରଶ୍ନ କରାଯାଇଛି ।

ପରିବର୍ତ୍ତନର ଆହ୍ୱାନ ଦେଲେ ଅପରାଜିତା

ରାଜନୀତିର ପ୍ରଥମ ପ୍ରବେଶ ଓ ପ୍ରଥମ ମଂଚରେ ଶ୍ରୀମତୀ ଅପରାଜିତା ଷଡ଼ଙ୍ଗୀ ଆଜି ରାଜ୍ୟ ସରକାରଙ୍କୁ ତେର୍ଚ୍ଛେଇ ମାରିଛନ୍ତି । ରାଜ୍ୟରେ ବିକାଶ ହେଉଛି, ହେଲେ ଯେଉଁ ଧାରାରେ ହେବା କଥା ହେଉନାହିଁ । ତେଣୁ ପରିବର୍ତ୍ତନର ଆବଶ୍ୟକତା ରହିଛି । ବିଜେପି ହିଁ ରାଜ୍ୟକୁ ବିକାଶପଥରେ ଆଗେଇ ନେଇପାରିବ ବୋଲି ସେ କହିଥିଲେ । ବିଜେପି ରାଜ୍ୟ କାର୍ଯ୍ୟାଳୟଠାରେ ସ୍ୱାଗତ ସମ୍ବର୍ଦ୍ଧନା ପାଇବା ଅବସରରେ ସେ ଓଡ଼ିଶାର ଗରିବୀ, ସରକାରରେ ପିସି କାରବାର ଆଦି ପ୍ରସଙ୍ଗ ଉଠାଇଥିଲେ । ଓଡ଼ିଶାର ଗ୍ରାମାଞ୍ଚଳରେ ୬୬% ଲୋକ ଦରିଦ୍ର । ରାଜ୍ୟ ସରକାର ଏହି ତଥ୍ୟ ୨୦୧୬ ମସିହାରେ କେନ୍ଦ୍ର ସରକାରଙ୍କ ପାଖରେ ଉପସ୍ଥାପନ କରିଛନ୍ତି । ଓଡ଼ିଶାରେ ସବୁ ଥାଇ ରାଜ୍ୟ ଏତେ ପଛୁଆ ଓ ଗରିବ କାହିଁକି ବୋଲି ତାଙ୍କ ମନକୁ ପ୍ରଶ୍ନ ଆସିଛି । ଏହି ପଛୁଆ ଓ ଗରିବ ଟ୍ୟାଗ୍ କୁ ହଟାଇବାକୁ ପଡ଼ିବ ବୋଲି ସେ କହିଥିଲେ ।

ରାଜନୀତିରେ ସାମିଲ ହେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହା ଏବଂ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରତି ସେ କୃତଜ୍ଞତା ଜଣାଇଥିଲେ । ଧର୍ମେନ୍ଦ୍ର ପ୍ରଧାନ, ବସନ୍ତ ପଣ୍ଡା ଓ କନକ ବର୍ଦ୍ଧନ ସିଂହଦେଓ ରାଜ୍ୟର ବିକାଶ ପାଇଁ ଅଙ୍ଗୀକାରବୋଧ ବୋଲି ଜଣାଇ ସେମାନଙ୍କର ପ୍ରଶଂସା କରିଥିଲେ । ସମସ୍ତେ ମିଳିମିଶି କାମ କରିବାକୁ ବିଜେପି କର୍ମୀଙ୍କୁ ଆହ୍ୱାନ ଦେଇଥିଲେ ।

ସୂଚନାଥାଉକି, ଅପରାଜିତା ବିଜେପିରେ ଯୋଗଦେବା ପରେ ତାଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ବିଭିନ୍ନ ମିଡ଼ିଆରେ ଉପସ୍ଥାପନ କରାଯାଉଛି । ଏପର୍ଯ୍ୟନ୍ତ ଧର୍ମେନ୍ଦ୍ର ପ୍ରଧାନଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ବିଚାର କରାଯାଉଥିବାରୁ ଏହା ତାଙ୍କ ଗୋଷ୍ଠୀକୁ କୁଆଡ଼େ ବିଚଳିତ କରିଛି । ଅପରାଜିତାଙ୍କ ବିଜେପି ଯୋଗଦାନରେ ନିଜେ ଧର୍ମେନ୍ଦ୍ର ଅସୁଖୀ ଥିବା ବି କୁହାଯାଉଛି । ତେବେ ବାହାରକୁ ଖରାପ ବାର୍ତ୍ତା ନଯିବା ପାଇଁ ସମସ୍ତେ ଯଥାସମ୍ଭବ ଉଦ୍ୟମ କରିଥିବା ଚର୍ଚ୍ଚା ହେଉଛି ।