ଅପରାଜିତାଙ୍କ ସମର୍ଥକ ବି ମାନିଲେନି କୋଭିଡ୍ ନିୟମ

ଭୁବନେଶ୍ୱର: ଉପରୋକ୍ତ ଫଟୋ ଉପରେ ନଜର ପକାନ୍ତୁ । ରାଜଧାନୀ ଉପକଣ୍ଠରେ ଏହି ଯୁବକମାନେ ବୃକ୍ଷରୋପଣ ନାଁରେ ଏକାଠି ହୋଇଛନ୍ତି । ଭୁବନେଶ୍ୱର ଓ ଆଖପାଖ ଅଞ୍ଚଳରେ କରୋନା ସଂକ୍ରମଣ ଭୟଙ୍କର ଅବସ୍ଥାକୁ ଆସିଥିବା ବେଳେ ଏହି ଯୁବକମାନେ ସାମାଜିକ ଦୂରତ୍ୱ ନିୟମ ମାନିନାହାନ୍ତି । କାହା ମୁହଁରେ ମାସ୍କ ଅଛି ତ କାହାରି ନାହିଁ । କୋଭିଡ୍ ନିୟମର ଧଜ୍ଜିଆ ଉଡ଼ାଉଛନ୍ତି ଏମାନେ । ବୃକ୍ଷରୋପଣ ଭଳି ମହତ୍ କାର୍ଯ୍ୟ କରିବାକୁ ଯାଇ କରୋନା ଭୂତାଣୁକୁ ଆମନ୍ତ୍ରଣ କରୁଛନ୍ତି ।

ଏମାନେ ହେଉଛନ୍ତି ‘ୟୁଥ୍ ଫର୍ ଆକ୍ସନ୍’ ର ସଦସ୍ୟବୃନ୍ଦ । ଯାହାର ମୁଖିଆ ହେଉଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ତାଙ୍କ ନିର୍ଦ୍ଦେଶନା ଓ ସଂଯୋଜନାରେ ୟୁଥ୍ ଫର୍ ଆକ୍ସନ ସଭ୍ୟମାନେ ବିଭିନ୍ନ ସାମାଜିକ କାର୍ଯ୍ୟକ୍ରମ କରୁଛନ୍ତି । ଆଜି ୱାର୍ଡ ନଂ ୧୪ ରେ ସଂସ୍ଥା ପକ୍ଷରୁ ଏକ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ ହୋଇଥିଲା । ତେବେ ବୃକ୍ଷରୋପଣ ଭଳି ମହତ୍ କାର୍ଯ୍ୟରେ ଯାଇଥିବା ୟୁଥ୍ ଫର୍ ଆକ୍ସନ୍ ସଦସ୍ୟମାନଙ୍କ ଅମାନିଆ ମେଳିର ଫଟୋ ସୋସିଆଲ୍ ମିଡ଼ିଆରେ ଘୂରିଲାଣି । କୋଭିଡ୍ ନିୟମ ନଗ୍ନ ଉଲ୍ଲଂଘନର ଏହି ଚିତ୍ର ସଂପୃକ୍ତ ସଦସ୍ୟମାନେ ନିଜର ସୋସିଆଲ୍ ମିଡ଼ିଆରେ ସେୟାର୍ କରିଛନ୍ତି ।

କୋଭିଡ୍ ନିୟମ ବାରମ୍ବାର ଉଲ୍ଲଂଘନ କରୁଥିବା ନେଇ ସବୁଠାରୁ ଅଧିକ ଚର୍ଚ୍ଚାରେ ଥିବା ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ଏହି ସମର୍ଥକମାନେ ତାଙ୍କୁ ଅନୁସରଣ କରୁଥିବା ସାଧାରଣରେ ଧାରଣା ସୃଷ୍ଟି ହେଲାଣି । କରୋନା ଆଜି ମଣିଷର ଜୀବନକୁ ସଙ୍କଟକୁ ଟାଣି ନେଉଥିବା ବେଳେ ବିପଦକୁ ବରଣ କଲା ଭଳି ଏଭଳି ଅମାନିଆ ଆଚରଣ ଦେଖିବାକୁ ମିଳୁଛି ।

ସାମାଜିକ ଦୂରତା, ମାସ୍କ ପିନ୍ଧିବା ଭଳି ନିୟମକୁ କଡ଼ାକଡ଼ି ପାଳନ କରିବା ପାଇଁ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାରମ୍ବାର ନିବେଦନ କରୁଥିବା ବେଳେ ତାଙ୍କର ଅନୁଗାମୀମାନଙ୍କର ଏଭଳି ଅମାନିଆ ଆଚରଣକୁ ସାଧାରଣରେ ନାପସନ୍ଦ କରାଯାଉଛି ।