ଅବସ୍ଥା ସଙ୍ଗୀନ, ଆହୁରି ୪୮ ଘଣ୍ଟା ବର୍ଷିବ

ଭୁବନେଶ୍ୱର: ପ୍ରବଳ ବର୍ଷାରେ ଅସ୍ତବ୍ୟସ୍ତ ହୋଇପଡ଼ିଛି ସାରା ରାଜ୍ୟ । ଭୁବନେଶ୍ୱର, କଟକ, ପୁରୀ, ବ୍ରହ୍ମପୁର ଆଦି ସହରରେ ନାହିଁ ନ ଥିବା ଅବସ୍ଥା । ଭୁବନେଶ୍ୱର ଓ କଟକରେ ଜଳବନ୍ଦୀ ହୋଇଛନ୍ତି ଶହ ଶହ ଲୋକ । ଗତ ରାତିରୁ ସେମାନେ ନିଜ ଘରେ ଜଳବନ୍ଦୀରେ ଅଛନ୍ତି । ଘର ଭିତରେ ଅଣ୍ଟେ ପାଣି । ପ୍ରଖର ସ୍ରୋତ । ଘରର ଆସବାବପତ୍ର ଛିନଛତ୍ର ଅବସ୍ଥାରେ ପାଣିରେ ଭାସୁଛି । କାର, ମଟର ସାଇକେଲ ଡୁବି ଯାଇଛି । ସହରର ତଳିଆ ଅଞ୍ଚଳର ରାସ୍ତା ଉପରେ ମୁଣ୍ଡେ ଉଚ୍ଚରେ ପାଣି । ସମୁଦ୍ର ପରି ବର୍ଷା ପାଣି ଲହଡ଼ି ଭାଙ୍ଗୁଛି । ଫାୟାର ବ୍ରିଗେଡ଼ ଓ ଓଡ୍ରାଫ୍ ଟିମ୍ ପଇଁତରା ମାରୁଛି ଟ୍ୱିନ୍ ସିଟିରେ । ସ୍ମାର୍ଟ ସିଟିରେ ରହୁଥିବା ଲୋକଙ୍କ ଅବସ୍ଥା ଦେଖି ଲଜ୍ଜାରେ ମୁଣ୍ଡ ନଇଁଯାଉଛି ।

ପୁରୀ ବଡ଼ଦାଣ୍ଡରେ ୪ ଫୁଟ ଉଚ୍ଚରେ ପାଣି ଚାଲୁଛି । ଶରଧାବାଲିରେ ୨ ଫୁଟ ଉଚ୍ଚରେ ପାଣି । ମହାପ୍ରଭୁ ଜଗନ୍ନାଥ, ବଳଭଦ୍ର ଓ ମା’ ସୁଭଦ୍ରାଙ୍କ ରଥ ଚକ ବୁଡ଼ିଛି ପାଣିରେ । ପୁରି ସାହି, ଗଳିରେ ବର୍ଷାପାଣିର ସୁଅ ଛୁଟିଛି ।

ଲଘୁଚାପଜନିତ ଲଗାଣ ବର୍ଷା ହେବ ବୋଲି ତିନି ଦିନ ଆଗରୁ ପାଣିପାଗ ବିଭାଗ ସତର୍କ କରାଇଛି । ହେଲେ ସରକାରଙ୍କ ନିଦ ଭାଙ୍ଗିଲାନି । ବିଶେଷକରି, ବିଏମସି ଏବଂ ସିଏମସି କର୍ତ୍ତୃପକ୍ଷଙ୍କୁ ସଜାଗ ରହିବା ପାଇଁ ତାଗିଦ୍ କଲେନି । ଲୋକ ବର୍ଷା ପାଣିରେ ଡୁବିବା ପରେ ସମସ୍ତଙ୍କ ନିଦ ଭାଙ୍ଗୁଛି ।

ଆଜି ସଚିବାଳୟରେ ମୁଖ୍ୟମନ୍ତ୍ରୀ ବର୍ଷା ସ୍ଥିତିର ସମୀକ୍ଷା କରିଛନ୍ତି । ସବୁ ବିଭାଗ ସଜାଗ ରହିବା ପାଇଁ ମୁଖ୍ୟମନ୍ତ୍ରୀ ତାଗିଦ୍ କରିଛନ୍ତି । ବିଏମସି କର୍ତ୍ତୃପକ୍ଷଙ୍କ ସକାଳୁ ନିଦ ଭାଙ୍ଗିଲା ପରେ ରିଲିଫ୍ ଓ ଉଦ୍ଧାର କାର୍ଯ୍ୟ ପାଇଁ ବାହାରିଛନ୍ତି । ୧୩ ଜଣ ନୋଡାଲ୍ ଅଫିସର ଓ ୪୦ ଜଣ ଇଂଜିନିୟରଙ୍କୁ କାମରେ ନିୟୋଜିତ କରାଯାଇଛି । ଜଳବନ୍ଦୀରୁ ଲୋକଙ୍କୁ ଉଦ୍ଧାର କରିବା ପାଇଁ ୩୦ ପମ୍ପ୍ ସେଟ୍, ୫ଟି ଜେସିବି ମେସିନ୍ ଲଗାଯାଇଛି । ସେହିଭଳି ସିଏମସି କର୍ତ୍ତୃପକ୍ଷ ୨୦୦ଟି ପମ୍ପସେଟ୍ କୁ ସହରରୁ ଜଳ ନିଷ୍କାସନ କାମରେ ଲଗାଇଛନ୍ତି । ଜଳବନ୍ଦୀରେ ଥିବା ୭ ହଜାର ଲୋକଙ୍କ ପାଇଁ ରନ୍ଧା ଖାଦ୍ୟର ବ୍ୟବସ୍ଥା କରାଯାଇଛି । କଟକ ଓ ଭୁବନେଶ୍ୱରରେ ଜଳବନ୍ଦୀରେ ଥିବା ସବୁ ଲୋକଙ୍କୁ ରନ୍ଧା ଖାଦ୍ୟ ଯୋଗାଇ ଦେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

ମାଲକାନଗିରି ଓ ଜୟପାଟଣାରେ ଅବସ୍ଥା ଜଟିଳ ହୋଇପଡ଼ିଛି । ସେଠାରେ ବହୁଲୋକ ଜଳବନ୍ଦୀ ଅବସ୍ଥାରେ ଅଛନ୍ତି । ବର୍ଷା ଓ ବନ୍ୟା ପରିସ୍ଥିତିର ମୁକାବିଲା ପାଇଁ ସାରା ରାଜ୍ୟରେ ୩୧୭ ଟି ଫାୟାର ୟୁନିଟ୍ ଓ ୨୦ ଓଡ୍ରାଫ୍ ଟିମ୍ କୁ ନିୟୋଜିତ କରାଯାଇଥିବା ସ୍ୱତନ୍ତ୍ର ରିଲିଫ୍ କମିଶନର ବିଷ୍ଣୁପଦ ସେଠୀ ସୂଚନା ଦେଇଛନ୍ତି । କଲ୍ୟାଣପୁରରେ କାନ୍ଥପଡ଼ି ଦୁଇଜଣଙ୍କର ମୃତ୍ୟୁ ହୋଇଥିବା ସେ କହିଛନ୍ତି ।

ଇତିମଧ୍ୟରେ ଉତ୍ତର ପଶ୍ଚିମ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଅବପାତର ରୂପ ନେଇଛି । ଏହାର ପ୍ରଭାବରେ ଆସନ୍ତା ୪୮ ଘଣ୍ଟା ପର୍ଯନ୍ତ ଉପକୂଳ ଅଞ୍ଚଳ ସମେତ ରାଜ୍ୟର ବିଭିନ୍ନ ସ୍ଥାନରେ ଭୀଷଣ ବର୍ଷା ଲାଗି ରହିବ ବୋଲି ଭୁବନେଶ୍ୱର ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ଉପକୂଳ ଅଞ୍ଚଳରେ ପ୍ରବଳରୁ ଅତି ପ୍ରବଳ ବର୍ଷା ହେବ ।  ଏହି ସମୟ ମଧ୍ୟରେ ମତ୍ସ୍ୟଜୀବୀମାନେ ସମୁଦ୍ରକୁ ନ ଯିବା ପାଇଁ ପରାମର୍ଶ ଦିଆଯାଇଛି । ଗତ ୨୪ ଘଣ୍ଟା ମଧ୍ୟରେ ପୁରୀରେ ସର୍ବାଧିକ ୩୨୨ ମିମି ବର୍ଷା ରେକର୍ଡ କରାଯାଇଛି । କଟକରେ ୨୦୫ ମିମି ବର୍ଷା ହୋଇଥିଲା ବେଳେ ଭୁବନେଶ୍ୱରରେ ୧୮୦ ମିମି ବର୍ଷା ହୋଇଛି । ୧୬ ଟି ଜିଲ୍ଲାରେ ହାରାହାରି ୨୦୦ ମିମି ବର୍ଷା ରେକର୍ଡ କରାଯାଇଛି ।