ନୂଆଦିଲ୍ଲୀ: ଆଉ ଏକ ବିବାଦ ଘେରିଛି ବିଜେପି ରାଷ୍ଟ୍ରୀୟ ସଭାପତି ଅମିତ୍ ଶାହାଙ୍କୁ । ସେ ନିର୍ଦ୍ଦେଶକ ଥିବା ଅହମ୍ମଦାବାଦ ଡିଷ୍ଟ୍ରିକ୍ଟ କୋଅପରେଟିଭ୍ ବ୍ୟାଙ୍କ ବାଟେ ବିପୁଳ କଳାଟଙ୍କା ଧଳା ହୋଇଥିବା ସାମନାକୁ ଆସିଛି । ବିମୁଦ୍ରାକରଣ ଘୋଷଣାର ମାତ୍ର ୫ ଦିନ ମଧ୍ୟରେ ଏହି ବ୍ୟାଙ୍କର ଜମା ହୋଇଥିଲା ୭୪୫ କୋଟିର ୫୦୦ ଓ ୧୦୦୦ ଟଙ୍କିଆ ନୋଟ୍ । ଗୋଟେ ଡିଷ୍ଟ୍ରିକ୍ଟ କୋଅପରେଟିଭ୍ ବ୍ୟାଙ୍କରେ ଏତେ ଟଙ୍କାର ଅଚଳ ନୋଟ୍ ଜମା ହେବାର ତଥ୍ୟ ଆରଟିଆଇରେ ଆସିବା ରାଜନୈତିକ ମହଲରେ ଝଡ଼ ସୃଷ୍ଟି କରିଛି । ପୁଅ ଜୟ ଶାହାଙ୍କ ଦେବାଳିଆ କମ୍ପାନୀ ବର୍ଷକରେ ୧୬ ଲକ୍ଷ ପ୍ରତିଶତ ଆୟ ବଢ଼ାଇ ୮୦ କୋଟି ରୋଜଗାର କରିବା ଘଟଣାରେ ଛନ୍ଦି ହୋଇଥିବା ଅମିତ୍ ଶାହାଙ୍କ ପାଇଁ ଏହା ଦ୍ୱିତୀୟ ଝଟକା ଭାବେ ଛିଡ଼ା ହୋଇଛି ।
ମୁମ୍ବାଇର ଆରଟିଆଇ କର୍ମୀ ମନୋରଂଜନ ଏସ. ରାଏ ନାବାର୍ଡ଼ଠାରୁ ବିମୁଦ୍ରାକରଣ ପରବର୍ତ୍ତୀ ବ୍ୟାଙ୍କ ଜମା ଉପରେ ତଥ୍ୟ ମାଗିଥିଲେ । ନାବାର୍ଡର ଚିଫ୍ ଜେନେରାଲ୍ ମ୍ୟାନେଜର ତଥା ଆପେଲେଟ୍ ଅଥରିଟି ଏସ୍. ସରଭନାଭେଲ୍ ଦେଇଥିବା ତଥ୍ୟ ଅନୁଯାୟୀ ଡିଷ୍ଟ୍ରିକ୍ଟ କୋପରେଟିଭ୍ ବ୍ୟାଙ୍କମାନଙ୍କ ମଧ୍ୟରେ ଅହମ୍ମଦାବାଦ ଡିଷ୍ଟ୍ରିକ୍ଟ କୋଅପରେଟିଭ୍ ବ୍ୟାଙ୍କ(ଏଡ଼ିସିବି) ଅଚଳ ଟଙ୍କା ଜମା ଆଣିବାରେ ଶୀର୍ଷରେ ରହିଛି । ୨୦୧୬ ନଭେମ୍ବର ୮ ତାରିଖରେ କେନ୍ଦ୍ର ସରକାର ବିମୁଦ୍ରାକରଣ ଘୋଷଣା କଲେ । ଏହାର ୫ ଦିନ ମଧ୍ୟରେ ଏଡ଼ିସିବିରେ ଜମା ହୋଇଥିଲା ୭୪୫.୫୯ କୋଟିର ପୁରୁଣା ୫୦୦ ଓ ୧୦୦୦ ଟଙ୍କିଆ ନୋଟ୍ । ଏହି ବ୍ୟାଙ୍କର ନିର୍ଦ୍ଦେଶକ ଅଛନ୍ତି ଅମିତ୍ ଶାହା । ୨୦୦୦ ମସିହାରେ ସେ ଏହି ବ୍ୟାଙ୍କର ଅଧ୍ୟକ୍ଷ ପଦ ମଧ୍ୟ ମଣ୍ଡନ କରିଥିଲେ ।
ଏଡ଼ିସିବି ପଛକୁ ଅଚଳ ଟଙ୍କା ଜମାରେ ଦ୍ୱିତୀୟ ସ୍ଥାନରେ ରହିଛି ରାଜକୋଟ୍ ଡିଷ୍ଟ୍ରିକ୍ଟ କୋଅପରେଟିଭ୍ ବ୍ୟାଙ୍କ । ବିମୁଦ୍ରାକରଣ ଘୋଷଣାର ୫ ଦିନ ମଧ୍ୟରେ ଏହି ବ୍ୟାଙ୍କରେ ୬୯୩.୧୯ କୋଟିର ଅଚଳ ଟଙ୍କା ଜମା ହୋଇଥିଲା । ଏହି ବ୍ୟାଙ୍କର ଅଧ୍ୟକ୍ଷ ଜୟେଶଭାଇ ରାଜଦିୟା ବିଜୟ ରୂପାନୀଙ୍କ ସରକାରର ଜଣେ କ୍ୟାବିନେଟ୍ ମନ୍ତ୍ରୀ । ରାଜକୋଟକୁ ବିଜେପିର ମୁଖ୍ୟ ଶକ୍ତିକେନ୍ଦ୍ର ଗଣାଯାଉଥିବା ବେଳେ ଏଠାକାର ଡିଷ୍ଟ୍ରିକ୍ଟ କୋଅପରେଟିଭ୍ ବ୍ୟାଙ୍କରେ ଏହି କାରବାର ସମସ୍ତଙ୍କୁ ଆଚମ୍ବିତ କରିଛି ।
ଆଶ୍ଚର୍ଯ୍ୟର କଥା, ଅହମ୍ମଦାବାଦ ଓ ରାଜକୋଟ୍ ଡିଷ୍ଟ୍ରିକ୍ଟ କୋଅପରେଟିଭ୍ ବ୍ୟାଙ୍କରେ ଅଚଳ ଟଙ୍କାର ଜମାରାଶି ଗୁଜୁରାଟର ଆପେକ୍ସ ଷ୍ଟେଟ୍ କୋଅପରଟେିଭ୍ ବ୍ୟାଙ୍କଠାରୁ ଯଥେଷ୍ଟ ଅଧିକ । ଷ୍ଟେଟ୍ କୋଅପରଟେିଭ୍ ବ୍ୟାଙ୍କରେ ଅଚଳ ଟଙ୍କାର ଜମାରାଶି ଥିଲା ମାତ୍ର ୧.୧୧ କୋଟି ।
ଆରଟିଆଇରେ ଏହି ତଥ୍ୟ ଆସିଲା ପରେ ରାଜନୈତିକ ମହଲରେ ଉଷ୍ମତା ସୃଷ୍ଟି ହୋଇଛି । ଏହାର ତଦନ୍ତ ଦାବି ପାଇଁ ବିଭିନ୍ନ ମହଲରୁ ସ୍ୱର ଉଠିଛି । ସେପଟେ, କିଛି ଜାତୀୟ ୱେବସାଇଟ୍ ରେ ଏହି ରିପୋର୍ଟ ପ୍ରକାଶ ପାଇଥିଲେ ମଧ୍ୟ କିଛି ସମୟ ପରେ ଉଭାନ୍ ହୋଇଯିବା ପଛରେ ରାଜନୈତିକ ଚାପ ଥିବା ଚର୍ଚ୍ଚା ହେଉଛି ।
