ଭୁବନେଶ୍ୱର(ମିଡ-ଡେ ଓଡ଼ିଶା): ମନୋଜ କୁମାର ବେହେରା ଅନେକ ବର୍ଷରୁ ପୁରୀରେ ଇନ୍ସପେକ୍ଟର ଭାବେ ଅବସ୍ଥାପିତ । ଏହା ଭିତରେ ତାଙ୍କର ବହୁ ଥର ଜିଲ୍ଲା ପାର୍ ବଦଳି ଅର୍ଡର ବାହାରିଛି ହେଲେ ତାହା କାର୍ଯ୍ୟକାରୀ ହୋଇପାରିନି । ଅର୍ଡର ବାହାରିଲା କ୍ଷଣି ଅଦୃଶ୍ୟ ଶକ୍ତି ବଳରେ ତାହା ବାତିଲ୍ ହୋଇଛି । ପୁରୀ ରହଣୀ କାଳରେ ସର୍ବାଧିକ ସମୟ ତାଙ୍କର କଟିଛି ବଳିଆପଣ୍ଡା ଥାନାରେ । ନିକଟରେ ଫେବୃଆରୀ ୨୩ ତାରିଖରେ ବେହେରା ବାବୁଙ୍କର କଟକକୁ ବଦଳି ଅର୍ଡର ବାହାରିଥିଲା । ମାତ୍ର ତାହା ବି ବାତିଲ ହୋଇଯାଇଥିଲା । ଶେଷରେ ଏଇ ଏପ୍ରିଲ୍ ୨ ତାରିଖରେ ତାଙ୍କର ରାୟଗଡ଼ାକୁ ବଦଳି ହୋଇଛି । ମାତ୍ର ଆଜି ବି ପୁରୀ ପୁଲିସର ୱେବସାଇଟ୍ରେ ମନୋଜ ବେହେରାଙ୍କୁ ବଳିଆପଣ୍ଡା ଥାନା ଆଇଆଇସି ଭାବେ ଦେଖିବାକୁ ମିଳୁଛି ।
ନିଜର ବଦଳି ଅର୍ଡର ବାରମ୍ବାର ବାତିଲ କରାଉଥିବା ଆଇଆଇସି ମନୋଜ ବେହେରା ଯେ ପ୍ରଭାବଶାଳୀ ତାହା ଏଥିରୁ ସ୍ପଷ୍ଟ । ଆଉ ଏହା ଯେ ମନ୍ତ୍ରୀ/ବିଧାୟକଙ୍କ ବିନା ଆର୍ଶିବାଦରେ, ତାହା କଦାପି ସମ୍ଭବ ନୁହେଁ । ନିର୍ଦ୍ଦିଷ୍ଟ ବଡ଼ବଡ଼ିଆଙ୍କ ଆର୍ଶିବାଦ ପାଇ ସ୍ୱଇଚ୍ଛାରେ ପୁରୀରେ ଏତେ ଦିନ ଧରି ଆସ୍ଥାନ ଜମାଇଛନ୍ତି ନଚେତ୍ ସେହି ବଡ଼ବଡ଼ିଆଙ୍କ ମମତାର ଡୋରି ତାଙ୍କୁ ପୁରୀରେ ଏତେ ଦିନ ବାନ୍ଧି ରଖିଛି । ଯେଉଁ ଇନସପେକ୍ଟର ମନୋଜ ବେହେରାଙ୍କ କଥା କୁହାଯାଉଛି ତାଙ୍କ ଠିକଣା ହୁଏତ ଅନେକ ଜାଣି ନ ଥିବେ । ସେ ହେଉଛନ୍ତି ଅର୍ଥତତ୍ତ୍ୱ ମାଲିକ ବହୁ ଚର୍ଚ୍ଚିତ ପ୍ରଦୀପ ସେଠୀଙ୍କ ନିଜ ବଡ଼ ଭିଣୋଇ ।
ସଂଯୋଗ ହେଉ କି ଦୁର୍ଯୋଗ ହେଉ, ପ୍ରଦୀପ ସେଠୀଙ୍କ ଏହି ଭିଣୋଇ ଯେଉଁ ବଳିଆପଣ୍ଡା ଥାନାରେ ବହୁ ଦିନ କାର୍ଯ୍ୟ କରୁଛନ୍ତି ସେହି ଇଲାକାର ମାଲିକ ହେଉଛନ୍ତି ମନ୍ତ୍ରୀ ସଞ୍ଜୟ ଦାସବର୍ମା । ପୁରୀ ନିର୍ବାଚନମଣ୍ଡଳୀ ଅନ୍ତର୍ଗତ ଏହି ଥାନାଟି ରହିଛି ବ୍ରହ୍ମଗିରି ତହସିଲରେ । ସୁତରାଂ ଏହି ଥାନାରେ ବ୍ରହ୍ମଗିରି ବିଧାୟକ ଭାବେ ସଞ୍ଜୟ ଦାସବର୍ମାଙ୍କର ନିୟନ୍ତ୍ରଣ ରହିବାଟା ସ୍ୱାଭାବିକ । ଏହି ଥାନାରେ କିଏ ଇନସପେକ୍ଟର ରହିବେ ନ ରହିବେ ତାହା ଯେ ସ୍ଥାନୀୟ ବିଧାୟକ ଓ ପାୱାରଫୁଲ ମନ୍ତ୍ରୀଙ୍କ ଅଜାଣରେ ହେବ ତାହା ଜମାରୁ ବିଶ୍ୱାସ ନୁହେଁ । ଏହି ହିସାବରେ ମନୋଜ ବେହେରାଙ୍କୁ ବଳିଆପଣ୍ଡା ଥାନା ନଚେତ୍ ଆଖପାଖରେ ରଖିବା ପଛରେ ସଞ୍ଜୟଙ୍କ ଭୂମିକା ଏବେ ନୂଆ ସନ୍ଦେହ ଆଣିଛି । ମନୋଜ ବେହେରାଙ୍କୁ ଦରଦ ଦେଖାଇବା ପଛରେ ସଳା ପ୍ରଦୀପ ସେଠୀଙ୍କ ସମ୍ପର୍କ କାମ କରିଥାଇପାରେ ବୋଲି ସନ୍ଦେହ ଆରମ୍ଭ ହୋଇଛି । ପ୍ରଦୀପ ସେଠୀଙ୍କଠାରୁ ପାଜେରୋ ନେଇଥିବା ଅଭିଯୋଗ ଉପରେ ସିବିଆଇ ସ୍କାନରକୁ ଆସି ସାରିଛନ୍ତି ସଞ୍ଜୟ । ସିବିଆଇ ତାଙ୍କଠାରୁ ପାଜେରୋର ସବୁ କାଗଜପତ୍ର ମାଗି ଛାନଭିନ୍ ଆରମ୍ଭ କରିଛି । ସଞ୍ଜୟ ଏବେ ବି ନିଜକୁ ନିର୍ଦୋଷ ସଫେଇ ଦେଉଥିବା ବେଳେ ଆଇଆଇସି ମନୋଜ ବେହେରାଙ୍କ ପ୍ରତି ତାଙ୍କର ତଥାକଥିତ ଅନୁକମ୍ପା ଓ ଦରଦ ପଛରେ ଚିଟ୍ଫଣ୍ଡ ସମ୍ପର୍କର ନୂଆ ଅଧ୍ୟାୟ ଯୋଡି ହୋଇଛି ।
