ଭୁବନେଶ୍ୱର: ବିଜେପୁର ସିଂହାସନ ପାଇଁ ଆଜି ହେବ ଫଇସଲା । ୨ ଲକ୍ଷ ୨୧ ହଜାର ୧୪୯ ଭୋଟର ସେମାନଙ୍କ ବିଧାୟକ ପ୍ରତିନିଧି ବାଛିବେ । ୨୮୧ ବୁଥ୍ ରେ ସକାଳ ୮ଟାରୁ ମତଦାନ ଆରମ୍ଭ ହୋଇ ଅପରାହ୍ନ ୫ଟା ପର୍ଯ୍ୟନ୍ତ ଚାଲିବ । ଆଜିର ଏହି ଉପନିର୍ବାଚନ ପାଇଁ ଅଦ୍ଭୂତପୂର୍ବ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ପୂରା ବିଜେପୁର ନିର୍ବାଚନମଣ୍ଡଳୀକୁ କଡ଼ା ସୁରକ୍ଷା ବଳୟକୁ ଅଣାଯାଇଛି । ମୋଟ ୧୫୫ ଅତି ସମ୍ବେଦନଶୀଳ(କ୍ରିଟିକାଲ୍) ବୁଥ୍ ଚିହ୍ନଟ କରାଯାଇ ସେଠାରେ ସୁରକ୍ଷା ବ୍ୟବସ୍ଥାକୁ ଅତ୍ୟନ୍ତ କଡ଼ାକଡ଼ି କରାଯାଇଛି ।
ବରଗଡ଼ ଏସପି ଙ୍କ ସୂଚନା ଅନୁଯାୟୀ ସମଗ୍ର ନିର୍ବାଚନମଣ୍ଡଳୀ ପାଇଁ ୧୨ଟି ସ୍ୱତନ୍ତ୍ର ସ୍କ୍ୱାଡ୍ ଗଠନ କରାଯାଇଛି । ବିଭିନ୍ନ ସ୍ଥାନରେ ସଶସ୍ତ୍ର ଜବାନ୍ ଓ ଏକଜ୍ୟୁଟିଭ୍ ମାଜିଷ୍ଟ୍ରେଟଙ୍କୁ ମୁତୟନ କରାଯାଇଛି । ରାଜ୍ୟ ସଶସ୍ତ୍ର ପୁଲିସର ୩୬ ପ୍ଲାଟୁନ୍ ଫୋର୍ସ ମୁତୟନ ହୋଇଥିବା ବେଳେ ବିଏସଏଫ୍ ଏବଂ ସିଆରପିଏଫ୍ ର ୫ କମ୍ପାନୀ ଫୋର୍ସ ବିଜେପୁରରେ ପହଞ୍ଚିଛନ୍ତି । ବାହାର ଜିଲ୍ଲାରୁ ୩୦ ଜଣ ଆଇଆଇସି ଏବଂ ୧୫୦ ଏସଆଇଙ୍କୁ ମୁତୟନ କରାଯାଇଛି । ୪୦ଟି ମୋବାଇଲ୍ ପାର୍ଟି ୫ଟି ଦଳରେ ବିଭକ୍ତ ହୋଇ ବୁଥୱାରୀ ତଦାରଖ କରିବେ । ୮ଟି ସ୍ୱତନ୍ତ୍ର ଷ୍ଟ୍ରାଇକିଂ ଫୋର୍ସ ଏବଂ ଗୋଟିଏ କମ୍ପାନୀ ଓଡ଼ିଶା ସ୍ୱିଫ୍ଟ ଫୋର୍ସ ମଧ୍ୟ ମୁତୟନ କରାଯାଇଛି । ୪୦ଟି ସମ୍ବେଦନଶୀଳ ଭୋଟକେନ୍ଦ୍ରରେ ମାଇକ୍ରୋ ଅବଜରଭର ରହିଛନ୍ତି । ଭୋଟଗ୍ରହଣଙ୍କୁ ଶାନ୍ତିଶୃଙ୍ଖଳାର ସହ କରିବା ପାଇଁ ଜିଲ୍ଲା ପ୍ରଶାସନ ସହ ମୁଖ୍ୟ ନିର୍ବାଚନ ଅଧିକାରୀ ବରାବର ଯୋଗାଯୋଗରେ ଅଛନ୍ତି ।
ଉପନିର୍ବାଚନ ପ୍ରଚାରବେଳେ ମୁଖ୍ୟମନ୍ତ୍ରୀଙ୍କ ଉପରକୁ ଜୋତା ଫିଙ୍ଗି ଆକ୍ରମଣ ଉଦ୍ୟମ ଏବଂ ମନ୍ତ୍ରୀ ସୁଶାନ୍ତ ସିଂ ଙ୍କ ଭାଇଙ୍କ ଉପରକୁ ଫାୟାରିଂ ଘଟଣାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ବେଶ୍ ସକ୍ରିୟ ରହିଛି । ଭୋଟଗ୍ରହଣ ବେଳେ ଅଞ୍ଚଳରେ କୌଣସି ସନ୍ଦେହଜନକ ବ୍ୟକ୍ତିଙ୍କୁ ତୁରନ୍ତ ଗିରଫ କରିବା ପାଇଁ ପୁଲିସକୁ ସଜାଗ କରାଯାଇଛି । କୌଣସି ଅପ୍ରୀତିକର ପରିସ୍ଥିତିକୁ କଡ଼ା ହସ୍ତରେ ଦମନ କରିବା ପାଇଁ ନିର୍ଦ୍ଦେଶ ଦିଆଯାଇଛି ।
