ଆରପାରିରେ ଆଲବମ୍ ଅଭିନେତ୍ରୀ ଦୀପା ସାହୁ

ଭୁୁବନେଶ୍ୱର: ଓଡ଼ିଶାର ଆଲବମ୍ କୁଇନ୍ ଭାବେ ଜଣାଶୁଣା ଅଭିନେତ୍ରୀ ଦୀପା ସାହୁଙ୍କର ଆଜି ପରଲୋକ ହୋଇଯାଇଛି । ମୃତ୍ୟୁ ବେଳକୁ ତାଙ୍କୁ ମାତ୍ର ୩୫ ବର୍ଷ ହୋଇଥିଲା । ବର୍ଷେ ତଳେ କ୍ୟାନସର୍ ରେ ପୀଡ଼ିତା ଦୀପା ଗତ ଜୁନ୍ ୨୦ରେ ଗୁରୁତର ଅବସ୍ଥାରେ କ୍ୟାପିଟାଲ୍ ହସ୍ପିଟାଲ୍ ରେ ଭର୍ତ୍ତି ହୋଇଥିଲେ । ସେଠାରେ କିଛି ଦିନ ଚିକିତ୍ସିତ ହେବା ପରେ ତାଙ୍କୁ ଏମସ୍ ଏବଂ ପରେ ଏକ ଘରୋଇ ହସ୍ପିଟାଲ୍ କୁ ସ୍ଥାନାନ୍ତର କରାଯାଇଥିଲା । ଦୁଇ ଦିନ ହେଲା ତାଙ୍କର ଅବସ୍ଥା ସଙ୍କଟାପନ୍ନ ରହିଥିଲା । ଆଜି ଅପରାହ୍ନ ୪.୦୨ ମିନିଟ୍ ରେ ଆଖି ବୁଜି ଦେଇଥିଲେ ଦୀପା ।

୧୯୮୫ ଅକ୍ଟୋବର ୨୫ରେ ଢ଼େଙ୍କାନାଳରେ ଜନ୍ମିତ ଦୀପା ୨୦୦୦ ମସିହା ପ୍ରାରମ୍ଭରେ ଓଡ଼ିଆ ଆଲବମ୍ ଜଗତର ସୁପର ହିଟ୍ ହୀରୋଇନ୍ ଥିଲେ । ‘ଏକଡ଼ା ଏକଡ଼ା ରାମ୍’, ‘କୃଷ୍ଣ ଚୂଡ଼ା ରଙ୍ଗର ନାଲି ଓଢ଼ଣୀ’, ‘ହାଇ ହାଇ ତୋ ମଲ୍ଲୀ ଫୁଲ ଗଜରା’ ଭଳି ହିଟ୍ ଆଲବମ୍ ଦେଇ ଓଡ଼ିଶାର ଘରେ ଘରେ ପରିଚିତ ହୋଇଥିଲେ । ଖାଲି ଆଲବମ୍ ଗୀତ ନୁହେଁ ଆକ୍ଟି କ୍ଷେତ୍ରରେ ମଧ୍ୟ ନିଜର ଦକ୍ଷତା ପ୍ରତିପାଦିତ କରିଥିଲେ । ଅନେକ ଟେଲିଫିଲ୍ମ ଧାରାବାହିକରେ ଅଭିନୟ କରିବା ସହ ଓଡ଼ିଆ ଫିଲ୍ମ ‘ନାରୀ ଆଖିରେ ନିଆଁ’ ରେ ଅଭିନୟ କରି ପ୍ରଶଂସା ସାଉଁଟିଥିଲେ ।

ପାଖାପାଖି ବର୍ଷେ ତଳେ ଓଭାରିଆନ୍ କ୍ୟାନସର୍ ରେ ପୀଡ଼ିତା ହୋଇଥିଲେ ଦୀପା । ଚିକିତ୍ସିତ ହୋଇ ଘରକୁ ଫେରି ଆସିଥିଲେ । ମାସେ ତଳେ ତାଙ୍କ ଅବସ୍ଥା ଗୁରୁତର ହୋଇପଡ଼ିଥିଲେ ମଧ୍ୟ ଚିକିତ୍ସାରେ ପ୍ରତିବନ୍ଧକ ହୋଇଥିଲା ଅର୍ଥ । ଖବର ପାଇ ଅଭିନେତା ଅଖିଳ ପଟ୍ଟନାୟକ ଏବଂ ସାମାଜିକ କର୍ମୀ ପ୍ରଶାନ୍ତ ନାୟକ ଚିକିତ୍ସା ପାଇଁ ଦୀପାଙ୍କୁ କ୍ୟାପିଟାଲ୍ ହସ୍ପିଟାଲ୍ ଆଣିଥିଲେ । ତାଙ୍କୁ ଭଲ କରିବା ପାଇଁ କଳାକାରମାନେ ସହାୟତାର ହାତ ବଢ଼ାଇଥିଲେ ।

ଦୀପାଙ୍କର ସ୍ୱାମୀ ମନୀନ୍ଦ୍ର ଦତ୍ତ ଏବଂ ଏକମାତ୍ର ଝିଅ ଅଛନ୍ତି ।

ଦାପାଙ୍କ ମୃତ୍ୟୁରେ ଓଲିଉଡ୍ ଏବଂ ଆଲବମ୍ ଜଗତରେ ଶୋକର ଛାୟା ଖେଳିଯାଇଛି । ଗତ ସପ୍ତାହରେ କିମ୍ବଦନ୍ତୀ ଅଭିନେତା ବିଜୟ ମହାନ୍ତିଙ୍କ ମୃତ୍ୟୁ ଓଲିଉଡ୍ ଜଗତକୁ ସ୍ତବ୍ଧ କରି ରଖିଥିବା ବେଳେ ଆଜି ଏହି ଯୁବ ପ୍ରତିଭାଙ୍କ ବିୟୋଗ କଳାକାର ଜଗତ ପାଇଁ ଅପୂରଣୀୟ କ୍ଷତି ଆଣିଛି ।