ଭୁବନେଶ୍ୱର: ଓଡ଼ିଶାର ପର୍ଯ୍ୟଟନ ଇତିହାସରେ ପ୍ରଥମ ଥର ପାଇଁ ଏକ ଅଭିନବ ପ୍ରୟାସ । କୋଣାର୍କ ନିକଟବର୍ତ୍ତୀ ରାମଚଣ୍ଡୀ ବେଳାଭୂମିରେ ଆରମ୍ଭ ହୋଇଛି “ମେରାଇନ୍ ଡ୍ରାଇଭ୍ ଇକୋ-ରିଟ୍ରିଟ୍’ । ୪୯ ଦିନ ଧରି ଅନୁଷ୍ଠିତ ହେବାକୁ ଥିବା ଏହି ଉତ୍ସବକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶନିବାର ସଂଧ୍ୟାରେ ଉଦଘାଟନ କରିଛନ୍ତି । ମୁଖ୍ୟମନ୍ତ୍ରୀ ବେଲୁନ୍ ଉଡ଼ାଇ ଉତ୍ସବର ଶୁଭାରମ୍ଭ କରିବା ପରେ ବେଳାଭୂମି ପରିଭ୍ରମଣ କରିଥିଲେ ।
ଉତ୍ସବ ଆରମ୍ଭ ସହ ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ହୋଇପଡ଼ିଛି ପୁରୀ-କୋଣାର୍କ ମେରାଇନ୍ ଡ୍ରାଇଭ୍ । ଉତ୍ସବସ୍ଥଳ ରାମଚଣ୍ଡୀ ବେଳାଭୂମି ନିଆରା ଢ଼ଙ୍ଗରେ ସଜେଇ ହୋଇଛି । ଇକୋ-ରିଟ୍ରିଟ୍ କୁ ତିନି ଭାଗରେ ବିଭକ୍ତ କରାଯାଇଛି । ପ୍ରଥମରେ ରହିଛି ଇନ୍ ଆଉସ୍ ଅଞ୍ଚଳ । ଯେଉଁଠି କେବଳ ଟେଣ୍ଟ ବୁକିଂ କରି ପର୍ଯ୍ୟଟକ ରହିବେ । ଦ୍ୱିତୀୟଟି ପବ୍ଲିକ୍ ଏରିଆ ବା ବିଚ୍ ମାର୍କେଟ୍ । ଏଠାରେ ହସ୍ତତନ୍ତ, ହସ୍ତଶିଳ୍ପ ମେଳା ସାଙ୍ଗକୁ ବିଭିନ୍ନ ତାରକା ହୋଟେଲ୍ ଓ ରେସ୍ତୋରାଁ ଖାଦ୍ୟ ମିଳୁଛି । ସାଧାରଣ ଲୋକଙ୍କ ପାଇଁ ଏହାକୁ ଉନ୍ମୁକ୍ତ ରଖାଯାଇଛି । ତୃତୀୟଟି ସାଂସ୍କୃତିକ ମଂଚ ଅଞ୍ଚଳ । ସେଠି ନୃତ୍ୟ ସଙ୍ଗୀତର କାର୍ଯ୍ୟକ୍ରମ ଆୟୋଜନ କରାଯାଇଛି । ସେଠାରେ ପ୍ରବେଶ ପାଇଁ ଲୋକଙ୍କୁ ଫି ଦେବାକୁ ପଡ଼ିବ ।
ରାମଚଣ୍ଡୀ ବେଳାଭୂମିରେ ୫୦ଟି ୨ ଶଯ୍ୟା ବିଶିଷ୍ଟ ବିଳାସପୂର୍ଣ୍ଣ ଅସ୍ଥାୟୀ ଟେଣ୍ଟ ବା କଟେଜ୍ ନିର୍ମାଣ କରାଯାଇଛି । ସେଠାରେ ଠିକ୍ ପଞ୍ଚ ତାରକା ହୋଟେଲର ଅନୁଭବ ବାରି ହେଉଛି । ବିଭିନ୍ନ ବର୍ଗର ପର୍ଯ୍ୟଟକମାନଙ୍କ ରହିବା ପାଇଁ ସେଗୁଡ଼ିକୁ ଶ୍ରେଣୀଭୁକ୍ତ କରାଯାଇଛି । ଜଣଙ୍କ ପିଛା ରାତିକ ପାଇଁ ମୂଲ୍ୟ ରଖାଯାଇଛି ୭ ହଜାରରୁ ୨୨ ହଜାର ଟଙ୍କା । ଏହି ପଇସାରେ ପର୍ଯ୍ୟଟକ ଭୁବନେଶ୍ୱରଠାରୁ ବାହାରିବାଠାରୁ ଆରମ୍ଭ କରି ରହିବା, ଖାଇବା ବିଚ୍ ସ୍ପା, ଦୁଃସାହସିକ ଜଳକ୍ରୀଡ଼ା, ନେଚର୍ ଟ୍ରାଏଲସ୍ ସମେତ ସାଂସ୍କୃତିକ କାର୍ଯ୍ୟକ୍ରମ ଉପଭୋଗ କରିବାର ସୁଯୋଗ ପାଇପାରିବେ । ଏଥିପାଇଁ ଆଜି ଉଦଘାଟନ ଦିନରେ ହିଁ ୨୨ଟି ଟେଣ୍ଟ ବୁକିଂ ହୋଇଯାଇଛି ।
