ସାବରକରଙ୍କଠୁଁ ମୋଦି.. ନିଆଁ ଚେଙ୍ଗିଦେଲେ ରାହୁଲ

ନୂଆଦିଲ୍ଲୀ: ମୋ ନାଁ ରାହୁଲ ଗାନ୍ଧୀ । ରାହୁଲ ସାବରକର ନୁହେଁ । ମରିଯିବି ପଛେ କ୍ଷମା ମାଗିବି ନାହିଁ । ଯାହା କହିଛି ସତ କହିଛି । ନରେନ୍ଦ୍ର ମୋଦି ଏବଂ ତାଙ୍କର ଆସିଷ୍ଟାଣ୍ଟ ଅମିତ୍ ଶାହା ଦେଶର ଅର୍ଥନୀତିକୁ ନଷ୍ଟଭ୍ରଷ୍ଟ କରିଥିବାରୁ ଦେଶବାସୀଙ୍କ ପାଖରେ ବରଂ କ୍ଷମା ମାଗନ୍ତୁ ।

ଆଜି ଦିଲ୍ଲୀର ରାମଲୀଳା ମୈଦାନରେ ଅନୁଷ୍ଠିତ କଂଗ୍ରେସର ଭାରତ ବଚାଓ ରାଲିରେ ଏହି ଅଗ୍ନିବର୍ଷୀ ଭାଷଣ ଦେଇଛନ୍ତି ରାହୁଲ ଗାନ୍ଧୀ । ଝାଡ଼ଖଣ୍ଡ ନିର୍ବାଚନ ପ୍ରଚାର ରାଲିରେ ତାଙ୍କର ‘ରେପ୍ ଇନ୍ ଇଣ୍ଡିଆ’ ବୟାନ ପାଇଁ ବିଜେପି ତାଙ୍କଠାରୁ କ୍ଷମା ପ୍ରାର୍ଥନା ଚାହୁଁଥିବା ବେଳେ ରାହୁଲ କଡ଼ା ଜବାବ ଦେଇଛନ୍ତି । ପ୍ରଧାନମନ୍ତ୍ରୀ ମୋଦି ଏବଂ ଗୃହମନ୍ତ୍ରୀ ଅମିତ୍ ଶାହାଙ୍କୁ ଦେଶର ଭିଲିଆନ୍ ଭାବେ ଚିତ୍ରଣ କରିଛନ୍ତି । କ୍ଷମତା ପାଇଁ ମୋଦି ସବୁ କିଛି କରିପାରିବେ ବୋଲି ରାହୁଲ କହିଛନ୍ତି ।

ଧର୍ମ ନାଁରେ ରାଜନୀତି, ମହିଳା ଅତ୍ୟାଚାର ଏବଂ ଦେଶର ଆର୍ଥିକ ସ୍ଥିତିକୁ ନେଇ ପ୍ରଧାନମନ୍ତ୍ରୀଙ୍କୁ ସିଧାସଳଖ ଆକ୍ରମଣ କରିଥିଲେ ରାହୁଲ ।

ଦେଶ ଆଜି ଘୋର ଆର୍ଥିକ ସଙ୍କଟ ଦେଇ ଗତି କରୁଛି । ଜିଡ଼ିପି ହାର ୪ ପ୍ରତିଶତରେ ପହଞ୍ଚିଲାଣି । ଗତ ୪୫ ବର୍ଷ ଭିତରେ ବେକାରୀ ହାର ସର୍ବାଧିକସ୍ତରକୁ ଆସିଛି । ବିମୁଦ୍ରାକରଣ ଏବଂ ତ୍ରୁଟିପୂର୍ଣ୍ଣ ଜିଏସଟି ନୀତି ଦେଶର ଅର୍ଥନୀତିକୁ ବରବାଦ କରିଛି । ହାତଗଣତି ଶିଳ୍ପପତିଙ୍କର ୧ ଲକ୍ଷ ୪୫ ହଜାର କୋଟି ବ୍ୟାଙ୍କ ଋଣ ଛାଡ଼ କରାଯାଇଥିବା ବେଳେ ଗରିବଙ୍କ ପାଇଁ ଦରଦ ନାହିଁ । କୃଷକଙ୍କ ଅବସ୍ଥା ଆହୁରି ଦହନୀୟ । ପିଆଜ କିଲୋ ୨୦୦ ଟଙ୍କା ହେଲାଣି । ଭାରତର ଏଭଳି ଅବସ୍ଥା ପାଇଁ କୌଣସି ଶତ୍ରୁ ଦାୟୀ ନୁହଁନ୍ତି, ଖୋଦ୍ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ଦେଶର ଶତ୍ରୁ ହୋଇ ଆର୍ଥିକ ବ୍ୟବସ୍ଥାକୁ ଧ୍ୱଂସ କଲେଣି ବୋଲି ରାହୁଲ କହିଥିଲେ ।

ନାଗରିକତା ସଂଶୋଧନ ଆଇନକୁ ନେଇ ରାହୁଲ କହିଥିଲେ, ମୋଦି ଏବଂ ତାଙ୍କର ଆସିଷ୍ଟାଣ୍ଟ ଅମିତ୍ ଶାହା ଦେଶର ଧର୍ମନିରପେକ୍ଷତାକୁ କୁଠାରଘାତ କରିଛନ୍ତି । ଉତ୍ତର ପୂର୍ବ ରାଜ୍ୟଗୁଡ଼ିକ ଆଜି ଜଳୁଛି । ଦେଶର ଶାନ୍ତି, ସଂହତି ବିପନ୍ନ ହୋଇପଡ଼ିଛି । ମୋଦି ସରକାର ଦେଶକୁ ବିଭାଜନ ଏବଂ ଦୁର୍ବଳ କରିବା କାମରେ ମାତିଛନ୍ତି । ଏହି ଶାସନ କବଳରୁ ଦେଶକୁ ରକ୍ଷା କରିବା ପାଇଁ କଂଗ୍ରେସ କର୍ମୀମାନେ ସ୍ୱର ଉଠାନ୍ତୁ ବୋଲି ଆହ୍ୱାନ ଦେଇଥିଲେ ରାହୁଲ ।

ଗତ ସାଧାରଣ ନିର୍ବାଚନରେ ଶୋଚନୀୟ ପରାଜୟ ବରଣ କରିଥିବା କଂଗ୍ରେସ କିଛି ମାସ ଚୁପ୍ ରହିବା ପରେ ଏହି ବିଶାଳ ସମାବେଶ ଜରିଆରେ ନିଜର ଶକ୍ତି ପ୍ରଦର୍ଶନ କରିଥିଲା । ଦଳର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀ, ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ, ପୂର୍ବତନ ପ୍ରଧାନମନ୍ତ୍ରୀ ଡ. ମନମୋହନ ସିଂ, ପୂର୍ବତନ ଅର୍ଥମନ୍ତ୍ରୀ ପି.ଚିଦାମ୍ବରମ୍ ଙ୍କ ସମେତ ଦଳର ତୁଙ୍ଗନେତା ମୋଦି ସରକାରଙ୍କ କୁଶାସନ ଏବଂ ଆର୍ଥିକ ନୀତିକୁ କଡ଼ା ସମାଲୋଚନା କରିଥିଲେ ।

କଂଗ୍ରେସର ଏହି ଭାରତ ବଚାଓ ରାଲିରେ ହଜାର ହଜାର ସମର୍ଥକଙ୍କ ପ୍ରବଳ ଉତ୍ସାହ ଦେଖିବାକୁ ମିଳିଥିଲା ।

‘ମୁଁ ରାହୁଲ ସାବରକର ନୁହେଁ’

“ମୋ ନାଁ ରାହୁଲ ଗାନ୍ଧୀ । ରାହୁଲ ସାବରକର ନୁହେଁ । ମରିଯିବି ପଛେ କ୍ଷମା ମାଗିବି ନାହିଁ ।”

ରାହୁଲଙ୍କର ଏହି ମନ୍ତବ୍ୟ ଆଜି ସମଗ୍ର ଦେଶରେ ଚର୍ଚ୍ଚାର ବିଷୟ ହୋଇଛି । ରାଜନୈତିକ କମ୍ପନ ବି ସୃଷ୍ଟି କରିଛି । ରାହୁଲଙ୍କର ଏଭଳି ଗୁଗୁଲ୍ ପଛର ଟେର୍ ଖୋଜୁଛନ୍ତି ରାଜନୈତିକ ପଣ୍ଡିତ ।

ଏହା ସ୍ପଷ୍ଟ ଯେ ହିନ୍ଦୁତ୍ୱ ଆଦର୍ଶପନ୍ଥୀ ସାବରକରଙ୍କ ନାଁ ନେଇ ରାହୁଲ କଟାକ୍ଷ କରିଛନ୍ତି । ଅର୍ଥାତ୍ ସେ ରାହୁଲ ସାବରକର ନୁହଁନ୍ତି ଯେ କ୍ଷମା ମାଗିଦେବେ । ସୁତରାଂ ରାହୁଲଙ୍କ ମନ୍ତବ୍ୟରୁ କ’ଣ ବୁଝିବାକୁ ପଡ଼ିବ ଯେ ସାବରକର ଏତେ ଦୁର୍ବଳ ଥିଲେ ଯେ ସତ କଥାରେ ବି ନଇଁ ପଡୁଥିଲେ । ସତ କହି କ୍ଷମା ପ୍ରାର୍ଥନା କରୁଥିଲେ । ଏହି ପ୍ରଶ୍ନ ଏବେ ଜାତୀୟ ଗଣମାଧ୍ୟମରେ ଚର୍ଚ୍ଚା ।

ରାହୁଲଙ୍କ ମନ୍ତବ୍ୟରେ ସ୍ୱାଭାବିକ ଭାବେ ବିଜେପି କ୍ଷୁବ୍ଧ । ଅମିତ୍ ଶାହା ରାହୁଲଙ୍କ ମନ୍ତବ୍ୟକୁ ନେଇ ଭୀଷଣ କଟାକ୍ଷ କରିଛନ୍ତି । ନାଗରିକତା ସଂଶୋଧିନ ବିଲ୍ ପାସ୍ ହୋଇ ଆଇନରେ ପରିଣତ ହୋଇଥିବାରୁ ରାହୁଲ ଏବଂ ତାଙ୍କ କଂଗ୍ରେସ ବ୍ୟସ୍ତବିବ୍ରତ ହୋଇପଡ଼ିଥିବା ଶାହା କହିଛନ୍ତି । ଦଳର ମୁଖପାତ୍ର ସମ୍ବିତ ପାତ୍ର କହିଛନ୍ତି, ରାହୁଲ ହଜାର ଥର ଜନ୍ମ ନେଲେ ବି ସାବରକର ହୋଇପାରିବେ ନାହିଁ ।

ଦଳର ବରିଷ୍ଠ ନେତା ତଥା କେନ୍ଦ୍ରମନ୍ତ୍ରୀ ଗିରିରାଜ ସିଂ ରାହୁଲଙ୍କ ସାବରକର ମନ୍ତବ୍ୟ ଉପରେ ପ୍ରତିକ୍ରିୟାଶୀଳ ହୋଇ ତାଙ୍କର ବ୍ୟକ୍ତିଗତ ଧ୍ୱଜା ଉଡ଼ାଇଛନ୍ତି । ତାଙ୍କ ମାଆ ସୋନିଆ ଗାନ୍ଧୀଙ୍କ ଜନ୍ମସ୍ଥାନକୁ ଆକ୍ଷେପ କରି ମନ୍ତବ୍ୟ ଦେଇଛନ୍ତି । କେବଳ ସାଙ୍ଗିଆ ଯୋଡିଦେଲେ କେହି ଗାନ୍ଧୀ ଏବଂ ଦେଶଭକ୍ତ ହୋଇଯିବେନି । ପ୍ରକୃତ ଦେଶପ୍ରେମୀ ହେବାକୁ ହେଲେ ଭାରତର ରକ୍ତ ଲୋଡା ବୋଲି ଗିରିରାଜ ଆକ୍ଷେପ କରିଛନ୍ତି ।

ସୂଚନାଥାଉ କି ସ୍ୱର୍ଗତ୍ ବିନାୟକ ଦାମୋଦର ଓରଫ୍ ବୀର ସାବରକରଙ୍କୁ ହିନ୍ଦୁତ୍ୱ ଆଇକନ୍ ଭାବେ ବିଚାର କରାଯାଏ । ହିନ୍ଦୁ ରାଷ୍ଟ୍ରବାଦୀର ସେ ଥିଲେ ଦୃଢ଼ ସମର୍ଥକ । ସ୍ୱାଧୀନତା ସଂଗ୍ରାମର ଜଣେ ମହାନ ଯୋଦ୍ଧା ଭାବେ ଦକ୍ଷିଣପନ୍ଥୀମାନେ ତାଙ୍କୁ ସମ୍ମାନ କରୁଥିବା ବେଳେ ମହାତ୍ମା ଗାନ୍ଧୀଙ୍କ ହତ୍ୟା ପଛରେ ତାଙ୍କର ଷଡ଼ଯନ୍ତ୍ର ରହିଥିବା ବି ଅଭିଯୋଗ ହୁଏ । ଅବଶ୍ୟ କୋର୍ଟରେ ଏହା ପ୍ରମାଣିତ ହୋଇପାରିନାହିଁ ।

ସେ ଯାହା ହେଉ, ସାବରକରଙ୍କୁ ମହାନ୍ ଦେଶଭକ୍ତ ଭାବେ ବିଜେପି ଏବଂ ଶିବସେନା ମୂଳରୁ ଗ୍ରହଣ କରିଛନ୍ତି । ଏଭଳି ଦେଶଭକ୍ତଙ୍କୁ ଭାରତରତ୍ନ ଉପାଧିରେ ଭୂଷିତ କରିବାକୁ ଶିବସେନା ଦୃଢ଼ ଦାବି କରୁଥିବା ବେଳେ ରାହୁଲଙ୍କ ଆଜିର ମନ୍ତବ୍ୟ ନିଆଁ ଲଗେଇଛି ।

ମହାରାଷ୍ଟ୍ରରେ ଏନସିପି, କଂଗ୍ରେସ ସହ ମିଶି ମେଣ୍ଟ ସରକାର ଗଢ଼ିଥିବା ଶିବସେନାର ମୁଖପାତ୍ର ସଞ୍ଜୟ ରାଉତ କହିଛନ୍ତି, ଜଣେ କିମ୍ବଦନ୍ତୀ ମଣିଷଙ୍କୁ ସମ୍ମାନ ଦେବା ଉଚିତ । ବୀର ସାବରକରଙ୍କୁ କେବଳ ମହାରାଷ୍ଟ୍ରର ଭାବିବା ଠିକ୍ ନୁହେଁ, ଭାରତବର୍ଷ ପାଇଁ ସେ ଜଣେ ଆଦର୍ଶ ପୁରୁଷ । ନେହେରୁ ଏବଂ ଗାନ୍ଧୀଙ୍କ ପରି ସାବରକାର ମଧ୍ୟ ଦେଶପାଇଁ ବଳିଦାନ ଦେଇଛନ୍ତି । ଏଭଳି ମହାନ୍ ବ୍ୟକ୍ତିମାନଙ୍କୁ ସମ୍ମାନ ଦେବା ଆମ ସମସ୍ତଙ୍କର କର୍ତ୍ତବ୍ୟ ।

ସାବରକରଙ୍କୁ ଭଗବାନ ମାନୁଥିବା ଶିବସେନା ଯଦି କଠୋର ହୁଏ, ତେବେ ମହାରାଷ୍ଟ୍ର ମେଣ୍ଟ ସରକାରକୁ ଏହା ବିପଦରେ ପକାଇବ ବୋଲି କିଛି ମହଲ ଆଶଙ୍କା କଲେଣି ।