ନୂଆଦିଲ୍ଲୀ: ରାହୁଲ ଗାନ୍ଧୀଙ୍କ ମନ୍ତବ୍ୟକୁ ନେଇ ପାର୍ଲିଆମେଣ୍ଟରେ ଝଡ଼ ବୋହିଛି । କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ନିଆଁବାଣ ହୋଇଛନ୍ତି । ବିଜେପି ନେତା, ନେତ୍ରୀମାନେ ରାହୁଲଙ୍କ ଧ୍ୱଜା ଉଡ଼ାଇଛନ୍ତି । ଗୁରୁବାର ଦିନ ଝାଡ଼ଖଣ୍ଡରେ ଏକ ନିର୍ବାଚନ ରାଲିରେ ରାହୁଲ ଦେଇଥିବା ଭାଷଣକୁ ନେଇ ଏହି ଝଡବାତ୍ୟା । ରାହୁଲ ତାଙ୍କ ଭାଷଣରେ କୁଆଡେ କହିଥିଲେ ଯେ ଭାରତୀୟ ମହିଳାମାନେ ରେପ୍ ହେବା ଉଚିତ । ଭାରତର ସବୁ ପୁରୁଷଙ୍କର ଇଚ୍ଛା ମହିଳାଙ୍କୁ ରେପ୍ କରିବାକୁ ।
ଶୁକ୍ରବାର ପାର୍ଲିଆମେଣ୍ଟ ଆରମ୍ଭରୁ ସ୍ମୃତି ଇରାନୀ ଏଭଳି ଭାଷାରେ ରାହୁଲଙ୍କ ଭାଷଣ ଉଦ୍ଧୃତ କରି ତାତି ଯାଇଥିଲେ । ଦଳର ମହିଳା ସହଯୋଗୀଙ୍କ ସହ ଗୃହରେ ହଙ୍ଗାମା କରିଥିଲେ । ଦେଶବାସୀଙ୍କ ଆଗରେ ରାହୁଲ ନିଜର ମନ୍ତବ୍ୟ ପାଇଁ କ୍ଷମା ମାଗନ୍ତୁ ବୋଲି ବଜ୍ରବାଣ କରିଥିଲେ । ଏଭଳି କଦର୍ଯ୍ୟ ମନ୍ତବ୍ୟ ଦେଇଥିବା ରାହୁଲଙ୍କୁ ଦଣ୍ଡ ଦେବା ପାଇଁ ଦାବି କରିଥିଲେ । ଇରାନୀଙ୍କ ମୁହଁରେ ରାହୁଲଙ୍କ ତଥାକଥିତ ମନ୍ତବ୍ୟ ଲୋକସଭାକୁ ଥରହର କଲା । ସବୁ ଟିଭିରେ ବ୍ରେକିଂ ଖବର ହେଲା । ସୋସିଆଲ୍ ମିଡ଼ିଆରେ ରାହୁଲଙ୍କର ସାତପୁରୁଷ ଉଦ୍ଧାର କଲେ ବିଜେପି ଭକ୍ତ ।
ସେପଟେ ରାହୁଲ ଏଭଳି କହିନାହାନ୍ତି ବୋଲି ଯେତେ ସଫେଇ ଦେଲେ ବି ବିଜେପିବାଲା ଆଡ଼େଇ ଦେଇଥିଲେ ।
ବାସ୍ତବରେ ଝାଡ଼ଖଣ୍ଡର ଗୋଦା ସାଧାରଣ ସଭାରେ ରାହୁଲ କ’ଣ କହିଥିଲେ ତାହା ଅନ୍ୟ ମୁହଁରୁ ଶୁଣିବା ଦରକାର ନାହିଁ । ସେହି ଭାଷଣର ଭିଡ଼ିଓ ରେକର୍ଡିଂ ସବୁଆଡ଼େ ବୁଲୁଛି । ଭାରତରେ ମହିଳା ବିରୋଧୀ ଅପରାଧ ବଢ଼ି ଚାଲିଥିବାରୁ ମୋଦି ସରକାରଙ୍କୁ କଟୁ ସମାଲୋଚନା କରିଥିଲେ ରାହୁଲ । କହିଥିଲେ,
“ମୋଦିଜୀ ଦେଶବାସୀଙ୍କୁ ମେକ୍ ଇନ ଇଣ୍ଡିଆର ସ୍ୱପ୍ନ ଦେଖାଇଥିଲେ । ମାତ୍ର ଏବେ ହେଉଛି କ’ଣ? ମେକ୍ ଇନ୍ ଇଣ୍ଡିଆ ବଦଳରେ ‘ରେପ୍ ଇନ୍ ଇଣ୍ଡିଆ’ ହୋଇଛି । ପ୍ରତିଦିନ ଖବରକାଗଜ ପୃଷ୍ଠା ଖୋଲିଲେ ମହିଳାଙ୍କୁ ରେପ୍ ଖବର ଦେଖିବାକୁ ପଡୁଛି । ଉତ୍ତରପ୍ରଦେଶରେ ନରେନ୍ଦ୍ର ମୋଦିଙ୍କର ଜଣେ ବିଧାୟକ ମହିଳାଙ୍କୁ ରେପ୍ କଲେ ଏବଂ ପୀଡ଼ିତାଙ୍କ କାର୍ ଦୁର୍ଘଟଣାର ଶିକାର ହେଲା । ସେ ସମ୍ପର୍କରେ ମୋଦି ପଦୁଟିଏ ବି କହିଲେନି । ଭାରତର ସବୁ ରାଜ୍ୟରେ ସବୁଦିନ ରେପ୍ ଘଟଣା ଘଟୁଛି । ନରେନ୍ଦ୍ର ମୋଦି କହୁଛନ୍ତି ‘ବେଟି ପଢ଼ୋ ବେଟି ବଚୋ’ । କିନ୍ତୁ କାହାଠାରୁ ସେମାନେ ରକ୍ଷା ପାଇବେ ମୋଦିଜୀ କହୁନାହାନ୍ତି । ବିଜେପି ବିଧାୟକଙ୍କଠାରୁ ସେମାନଙ୍କୁ ରକ୍ଷା କରନ୍ତୁ ।”
ସୁତରାଂ ରାହୁଲ ଗାନ୍ଧୀ ତାଙ୍କ ଭାଷଣରେ କେଉଁଠି ବି ଭାରତର ମହିଳାମାନେ ରେପ୍ ହେବା ଉଚିତ ଭଳି କଦର୍ଯ୍ୟ କଥା କହିନାହାନ୍ତି । ମାତ୍ର ସ୍ମୃତି ଇରାନୀ ତାହାକୁ କଦର୍ଥ କରି ପାର୍ଲିଆମେଣ୍ଟରେ ରଖିଛନ୍ତି । ଆଉ ଇରାନୀଙ୍କ ସ୍ୱରରେ ସ୍ୱର ମିଳାଇ ବିଜେପି ନେତାମାନେ ରାହୁଲଙ୍କୁ ନିର୍ଘାତ୍ ଆଟାକ୍ କରୁଛନ୍ତି ।
ରାହୁଲ ଗାନ୍ଧୀ ତାଙ୍କର ସେହି ଭାଷଣ କ୍ଲିପିଂକୁ ଟୁଇଟରେ ଅପଲୋଡ଼ କରି ବିଜେପିବାଲା ତାହାକୁ କିଭଳି ବିକୃତ କରୁଛନ୍ତି ତାହା ଦର୍ଶାଇବାକୁ ଚେଷ୍ଟା କରିଛନ୍ତି । ସେ ‘ରେପ୍ ଇନ୍ ଇଣ୍ଡିଆ’ ବୋଲି କହିଛନ୍ତି ଏବଂ ଏବେ ବି କହୁଛନ୍ତି । ସେଥିପାଇଁ କ୍ଷମା ମାଗିବାର ପ୍ରଶ୍ନ ଉଠୁନାହିଁ ବୋଲି ରୋକଠୋକ୍ ଜଣାଇଛନ୍ତି । ଓଲଟି ବିଜେପିକୁ କଡ଼ା ଜବାବ ଦେବାକୁ ଯାଇ ଅତୀତର ଗୋହି ଖୋଳିଛନ୍ତି । ଅତୀତରେ ନରେନ୍ଦ୍ର ମୋଦି ଏକ ସାଧାରଣ ସଭାରେ ଦିଲ୍ଲୀକୁ ରେପ୍ କ୍ୟାପିଟାଲ୍ ବୋଲି କହିଥିଲେ । ଏହାର ପ୍ରମାଣସ୍ୱରୂପ ଟୁଇଟରରେ ସେହି ଭାଷଣର ଭିଡ଼ିଓ କ୍ଲିପିଂ ଛାଡ଼ିଛନ୍ତି ରାହୁଲ । ମୋଦି ସେଥିପାଇଁ କ୍ଷମା ମାଗିବେ କି ବୋଲି ପଚାରିଛନ୍ତି ।
