ଆସୁଛି ଲକଡାଉନ୍ ୪.୦!

ନୂଆଦିଲ୍ଲୀ: ଦେଶରେ କରୋନା ଲକଡାଉନ୍ ପରିସ୍ଥିତିକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଭିଡ଼ିଓ କନଫରେନ୍ସିଂରେ ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା କରିଛନ୍ତି । ସାମ୍ପ୍ରତିକ ସ୍ଥିତିର ମୁକାବିଲା ଏବଂ ଲକଡାଉନ୍ ପ୍ରସଙ୍ଗରେ ମୁଖ୍ୟମନ୍ତ୍ରୀମାନଙ୍କଠାରୁ ମତାମତ ଲୋଡ଼ିଥିଲେ ମୋଦି । ତାମିଲନାଡୁ, ପଞ୍ଜାବ, ମହାରାଷ୍ଟ୍ର, ପଶ୍ଚିମବଙ୍ଗ ମୁଖ୍ୟମନ୍ତ୍ରୀମାନେ ଲକଡାଉନ୍ ବୃଦ୍ଧି ସପକ୍ଷରେ ସିଧାସଳଖ ମତ ରଖିଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ଅଧିକଂଶ ରାଜ୍ୟର ମୁଖ୍ୟମନ୍ତ୍ରୀମାନେ କିଛି ସର୍ତ୍ତ ଓ ପ୍ରସ୍ତାବ ସହ ପରୋକ୍ଷରେ ଲକଡାଉନ୍ ସପକ୍ଷ ମତ ରଖିଥିଲେ । ଲକଡାଉନ୍ ଉପରେ ୧୫ ତାରିଖ ସୁଦ୍ଧା ରାଜ୍ୟ ସରକାରମାନେ କେନ୍ଦ୍ରକୁ ମତାମତ ଜଣାଇବାକୁ ପ୍ରଧାନମନ୍ତ୍ରୀ କହିଛନ୍ତି ।

ଦେଶରେ ମାଡ଼ି ଚାଲିଛି କରୋନା । କିନ୍ତୁ ଦେଖିବାକୁ ଗଲେ ଭାରତର ଗ୍ରାମାଞ୍ଚଳ ପ୍ରାୟ ସୁରକ୍ଷିତ ରହିଛି । ତେଣୁ ଗ୍ରାମାଞ୍ଚଳକୁ ଯେମିତି ମହାମାରୀ ନ ବ୍ୟାପେ ସେଥିପ୍ରତି ରାଜ୍ୟ ସରକାରମାନେ ଧ୍ୟାନ ଦିଅନ୍ତୁ । ଗ୍ରାମାଞ୍ଚଳକୁ ଯଥା ସମ୍ଭବ କରୋନାମୁକ୍ତ ରଖିବାକୁ ମୁଖ୍ୟମନ୍ତ୍ରୀ ମାନଙ୍କୁ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ ମୋଦି ।  ଏଥି ସହିତ କଣ୍ଟେନମେଣ୍ଟ ବା ସମ୍ପୂର୍ଣ୍ଣ ଆବଦ୍ଧ ଅଞ୍ଚଳରେ ଲକ୍ ଡାଉନ୍ କଟକଣା ବଳବତ୍ତର ରଖିବା ସହ ଆର୍ଥିକ କାରବାରକୁ ଧୀରେ ଧୀରେ ସୁଯୋଗ ଦେବାକୁ ମୁଖ୍ୟମନ୍ତ୍ରୀମାନଙ୍କୁ ପ୍ରଧାନମନ୍ତ୍ରୀ କହିଛନ୍ତି ।

ଲକ୍ ଡାଉନ୍ ବଢ଼ାଇବା ସପକ୍ଷରେ ମତ ରଖିଥିବା ମମତା ବାନାର୍ଜୀ କରୋନାକୁ ନେଇ ରାଜନୀତି କରା ନଯାଉ ବୋଲି କହିଛନ୍ତି ।  ଦିଲ୍ଲୀ ସରକାର ଆର୍ଥିକ କାରବାର ଉପରେ ଗୁରୁତ୍ୱ ଦେଇଥିବା ବେଳେ ଟ୍ରେନ୍ ଓ ଉଡ଼ାଜାହାଜ ଚଳାଚଳକୁ ବିରୋଧ କରିଛନ୍ତି ତାମିଲନାଡୁ ଓ ତେଲେଙ୍ଗନା ସରକାର । ରେଡ୍ ଜୋନରୁ ଗ୍ରୀନ୍ କିମ୍ବା ଅରେଞ୍ଜ ଜୋନକୁ ଗାଡ଼ି ଚଳାଚଳ ସମ୍ପୂର୍ଣ୍ଣ ବନ୍ଦ ରଖିବାକୁ ଦାବି କରିଛନ୍ତି ରାଜସ୍ଥାନର ଅଶୋକ ଗେହଲଟ୍ ସରକାର । ସେହିଭଳି ଗୁଜରାଟର ବିଜୟ ରୂପାନି ସରକାର, ଗ୍ରୀନ୍ ଜୋନରେ ମେଟ୍ରୋ ସର୍ଭିସ୍ ଆରମ୍ଭ ପାଇଁ ଅନୁମତି ମାଗିଛନ୍ତି ।

ମୋଦିଙ୍କୁ ନବୀନଙ୍କ ୫ ପ୍ରସ୍ତାବ

ପ୍ରଧାନମନ୍ତ୍ରୀଙ୍କ ସହ ଆଲୋଚନା କାଳରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୁଚିନ୍ତିତ ମତ ରଖିଛନ୍ତି । * ଲକଡାଉନ୍ ପ୍ରସଙ୍ଗରେ ଜାତୀୟସ୍ତରରେ ଏ ସମ୍ପର୍କରେ ବିସ୍ତୃତ ନୀତି ପ୍ରସ୍ତୁତ ହେବା ଦରକାର । ତେବେ ଏହାର କାର୍ଯ୍ୟକାରିତା ବିକେନ୍ଦ୍ରୀକରଣ କରାଯାଇ ସ୍ଥାନୀୟ ପ୍ରଶାସନ ଉପରେ ଦାୟିତ୍ୱ ଛଡ଼ାଯାଉ ବୋଲି ମୁଖ୍ୟମନ୍ତ୍ରୀ ପ୍ରସ୍ତାବ ଦେଇଛନ୍ତି ।

ପ୍ରଧାନମନ୍ତ୍ରୀଙ୍କ ପାଖରେ ମୁଖ୍ୟମନ୍ତ୍ରୀ ଅନ୍ୟ ୪ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବ ରଖିଥିଲେ ।

* ଜିଲ୍ଲାଗୁଡ଼ିକୁ କ୍ଷୁଦ୍ର ଏବଂ ସାଇଣ୍ଟିଫିକ୍ ୟୁନିଟ୍ ହିସାବରେ ଜୋନିଂ କରାଯାଉ । ଏହି କାର୍ଯ୍ୟ ପାଇଁ ସ୍ଥାନୀୟ ପ୍ରଶାସନକୁ ଅନୁମତି ଦିଆଯାଉ ।

* ଲୋକଙ୍କ ଜୀବନ ସହିତ ଜୀବିକା ବି ଗୁରୁତ୍ୱପୂର୍ଣ୍ଣ । ତେଣୁ ଅର୍ଥନୈତିକ କାର୍ଯ୍ୟକଳାପ ତେଜ୍ କରିବା ପାଇଁ କେନ୍ଦ୍ର ସରକାର ଏକ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର୍(ଏସଓପି) ପ୍ରସ୍ତୁତ କରନ୍ତୁ । ରାଜ୍ୟ ରାଜ୍ୟ ଭିତରେ ଅର୍ଥନୈତିକ ଲିଙ୍କେଜ୍ ଥିବାରୁ କେନ୍ଦ୍ର ସରକାରଙ୍କ ଏସଓପି ଅର୍ଥନୈତିକ କାର୍ଯ୍ୟକଳାପକୁ ତ୍ୱରାନ୍ୱିତ କରିପାରିବ ।

* କୋଭିଡ୍ ପରିଚାଳନାରେ ପଞ୍ଚାୟତରାଜ ଅନୁଷ୍ଠାନକୁ ଅଧିକ ଗୁରୁତ୍ୱ ଦିଆଯାଉ । ଆମେ ଏକ ଲମ୍ବା ଯୁଦ୍ଧ ଲଢୁଥିବାରୁ ପଞ୍ଚାୟତର ଭୂମିକା ଅତ୍ୟନ୍ତ ଗୁରୁତ୍ୱ ହୋଇପଡ଼ିଛି । ଏହାକୁ ଦୃଷ୍ଟିରେ ରଖି ପ୍ରଚଳିତ କେନ୍ଦ୍ରୀୟ ସ୍କିମ୍ ଏବଂ ଅନ୍ୟାନ୍ୟ ଯୋଜନାରେ ସଂଶୋଧନ ଅଣାଯାଉ ।

* ରେଳ ଚଳାଚଳ ନିଷ୍ପତ୍ତି କ୍ଷେତ୍ରରେ ରାଜ୍ୟମାନଙ୍କ ସହ ବିଚାରବିମର୍ଷ କରାଯାଉ ।